LISON 42
Kuzê ki Bíblia ta fla sobri vida di solteru i di kazadu?
Na alguns kultura, pesoas ta kridita ma un algen sô ta pode ser filís si el kaza. Má, é ka tudu algen kazadu ki é filís i é ka tudu algen solteru ki é infilís. Bíblia ta fla ma tantu vida di solteru i di kazadu é un prezenti di Jeová.
1. Kal ki é alguns vantaji di ser solteru?
Bíblia ta fla: ‘Ken ki kaza sta faze dretu, má ken ki ka kaza ta faze midjór.’ (Lé 1 Coríntios 7:32, 33, 38.) Di ki manera ki un algen solteru ta ‘faze midjór’? Un kriston solteru ka meste fika ta preokupa ku nisisidadis di un maridu ô di un mudjer. Pur isu, txeu bês el ten más liberdadi. Pur izénplu, alguns solteru ta konsigi faze más pa Jeová, sima viaja pa otu país pa ba prega notísias sábi. Má más inportanti inda, es ten más ténpu pa es bira ses amizadi ku Jeová más fórti.
2. Kal ki é alguns vantaji di kaza na rejistu?
Tantu vida di kazadu i di solteru ten ses própi vantaji. Bíblia ta fla ma ‘dôs é midjór ki un’. (Eclesiastes 4:9) Kel-li ta kontise prinsipalmenti ku kristons ki ta sigi prinsípius di Bíblia na ses kazamentu. Kes ki ta kaza na rejistu ta promete ma es ta ama, ruspeta i da kunpanheru valor. Pur isu, txeu bês es ta xinti más suguru di ki kes algen ki ta vive djuntu sen sta kazadu. Tanbê ses fidju ta xinti más suguru.
3. Kuzê ki Jeová ta pensa sobri kazamentu?
Kantu Jeová faze kel primeru kazamentu, el fla: ‘Ómi ta dexa se pai ku se mai i el ta djunta ku se mudjer’. (Génesis 2:24) Jeová krê pa maridu ku mudjer ama kunpanheru i vive djuntu timenti es sta bibu. Sô el ta seta pa un algen divôrsia di se maridu ô di se mudjer si un di es faze adultériu. Na kel situason la, Jeová ta da kel maridu ô kel mudjer inosenti direitu di disidi si el ta divôrsia ô nau.a (Mateus 19:9) Jeová ka ta seta pa kristons ten más di ki un mudjer ô un maridu. — 1 Timóteo 3:2.
SABE MÁS
Prende modi ki bu pode ser filís i poi Jeová filís tanbê, ka ta nporta si abo é solteru ô kazadu.
4. Uza bu vida di solteru dretu
Jizus ta odjaba vida di solteru sima un prezenti. (Mateus 19:11, 12) Lé Mateus 4:23, i dipôs pâpia sobri kel pergunta li:
Modi ki Jizus uza se vida di solteru pa sirbi se Pai i pa djuda otus?
Kristons solteru pode xinti alegria óras ki es ta uza ses vida sima Jizus. Odja VÍDIU, i dipôs pâpia sobri kel pergunta li:
Modi ki kristons pode uza ses vida di solteru di un manera ki ta da-s alegria?
Bu sabia?
Bíblia ka ta fla ku kantu anu ki un algen debe kaza. Má, el ta insentiva un algen pa spéra ti ki pasa ‘flor di juventudi’, ki é un ténpu ki dizejus seksual ta sta fórti i pode fika difísil pa un algen toma bons disizon. — 1 Coríntios 7:36.
5. Skodje dretu ken ki bu ta kaza ku el
Skodje kel algen ki bu ta kaza ku el é un di kes disizon más inportanti ki bu pode toma. Lé Mateus 19:4-6, 9, i dipôs pâpia sobri kel pergunta li:
Pamodi ki un kriston debe pensa dretu antis di el kaza?
Bíblia pode djuda-u sabe ki kualidadis bu debe djobe na un algen antis di bu kaza. Má, más inportanti inda, djobe un algen ki ta ama Jeová.b Lé 1 Coríntios 7:39 i 2 Coríntios 6:14. Dipôs pâpia sobri kes pergunta li:
Pamodi ki nu debe kaza sô ku un algen ki ta sirbi Jeová?
Kuzê ki bu ta atxa ma Jeová ta xinti si bu disidi kaza ku un algen ki ka ta ama-L?
Si dôs animal diferenti podu na mésmu kanga, es ta sufri. Di mésmu manera, si un kriston kaza ku un algen ki ka ta sirbi Jeová, es ta ten txeu prubléma.
6. Odja kazamentu sima Jeová ta odja
Na Israel antigu, alguns ómi ta divorsiaba di ses mudjer pamodi es ta pensaba sô na ses kabésa. Lé Malaquias 2:13, 14, 16, i dipôs pâpia sobri kel pergunta li:
Pamodi ki Jeová ta ôdia óras ki un algen ta divôrsia sen ten bazi na Bíblia?
Adultériu i divórsiu ta poi kel maridu ô mudjer inosenti i ses fidjus ta sufri
Odja VÍDIU, i dipôs pâpia sobri kel pergunta li:
Si bu sta kazadu ku un algen ki ka ta sirbi Jeová, kuzê ki bu pode faze pa bu ten un kazamentu filís?
7. Sigi kes lei di Jeová sobri kazamentu
Un algen talvês meste faze txeu sforsu pa sigi kes lei di Jeová sobri kazamentu.c Má Jeová ta abênsua kes algen ki ta faze kel-la. Odja VÍDIU.
Lé Hebreus 13:4, i dipôs pâpia sobri kes pergunta li:
Bu ta atxa ma kes lei di Jeová pa kazamentu ta faze sentidu? Pamodi?
Jeová ta spéra ma kristons ta rejista ses kazamentu i divórsiu, dja ki na kuazi tudu país govérnus ta iziji pa es faze kel-la. Lé Tito 3:1, i dipôs pâpia sobri kel pergunta li:
Si abo é kazadu, bu ten sertéza ma bu kazamentu sta rejistadu sima govérnu ta manda?
UN ALGEN PODE PERGUNTA: “Kaza pakê? Un ómi ku un mudjer ka pode sô vive djuntu?”
Modi ki bu ta respondeba?
REZUMU
Vida di solteru i di kazadu é prezenti di Jeová. Tantu un algen solteru ô un algen kazadu, pode ser filís si es faze vontadi di Jeová.
Perguntas di rezumu
Modi ki un algen pode uza dretu se vida di solteru?
Pamodi ki Bíblia ta fla ma nu debe kaza sô ku un algen ki ta sirbi Jeová?
Kal ki é úniku motivu ki Bíblia ta da pa un algen divôrsia?
DJOBE MÁS
Kuzê ki siginifika ‘kaza sô na Sinhor’?
“Perguntas ki leitoris ta faze” (Sentinéla, 1 di julhu di 2004)
Odja dôs vídiu ki pode djuda-u toma bons disizon sobri namoru i kazamentu.
Prende pamodi ki un irmon ta atxa ma kuzê ki Jeová da-l ten mutu más valor ki kalker kuza ki el dexa pa tras.
Kal ki é alguns kuza ki un algen debe faze antis di el pensa na divôrsia ô sipara?
“Ruspeta ‘kel ki Deus djunta’” (Sentinéla, dizenbru di 2018)
a Odja párti PRENDE MÁS nu 4 sobri sipara óras ki ka ta nvolve adultériu.
b Na alguns kultura, é pai ku mai ki ta skodje ku kenha ki ses fidju ta kaza ku el. Na kel situason li, pai ku mai debe toma kuidadu pa es ka skodje un algen pamodi dinheru ki el ten ô se puzison sosial. Má, es debe skodje un algen ki ta ama Jeová.
c Si bu sta ta vive ku un algen ki nhos é ka kazadu, é bo ki ta disidi si bu ta dexa-l ô si bu ta kaza ku el.