Ka ta dura Deus ta ben kaba ku tudu sufrimentu

‘Ó Jeová, ti ki ténpu, N ta txoma-u pa bu djuda-m, má bu ka ta obi-m? Ti ki ténpu N ta txoma-u pa bu salva-m di violénsia, má bu ka ta faze nada?’ (Habacuque 1:2, 3) Kes palavra li é di Abakuki, un ómi bon ki éra amigu di Deus. Má, el faze kes pergunta li pamodi el ka tinha fé? Klaru ki nau! Deus garanti Abakuki ma el tinha un óra markadu pa el ben kaba ku sufrimentu. — Habacuque 2:2, 3.

Óras ki abo ô un algen ki bu ta ama sta ta sufri, é fásil bu pensa ma Deus sta ta dura ku aji. Má, Bíblia ta garanti-nu: ‘Jeová é ka léntu ku se promésa, sima alguns algen ta pensa, má el ten paxénxa ku nhos, pamodi el ka krê pa ningen ser distruídu, má el krê pa tudu algen rapende.’ — 2 Pedro 3:9.

NA KI TÉNPU KI DEUS TA BEN AJI?

Kel-li sta kuazi ta kontise! Jizus pâpia di un jerason ki ta sérba tistimunha di alguns kuza ki ta ben kontiseba, ki ta markaba ténpu di fin ‘di es sistéma’. (Mateus 24:3-42) Kes kuza ki Jizus fla sta ta kunpri na nos ténpu. Kel-li ta mostra ma ka ta dura, Deus ta ben aji pa rezolve prublémas di kel mundu li.a

Má, modi ki Deus ta ben kaba ku tudu sufrimentu? Kantu Jizus staba na Téra, el mostra ma Deus ten puder di kaba ku tudu sufrimentu. Nu ben odja alguns izénplu.

Dizastris na naturéza: Un bês, kantu Jizus ku se apóstlus staba na un barku na mar di Galilea, kumesa un tenporal fórti ki poi barku na prigu di bai fundu. Má, Jizus mostra ma el ku se Pai ta konsigi kontrola forsas di naturéza. (Colossenses 1:15, 16) Jizus sô fla: ‘Para! Fika kétu!’ Kuzê ki kontise? ‘Béntu para, i tudu kuza fika kalmu.’ — Marcos 4:35-39.

Duénsas: Jizus éra txeu konxedu pa se kapasidadi di kura, pamodi el ta kuraba ségus ku mankus, i tanbê kes ki ta daba ataki, ki tinha lépra i otus tipu di duénsa. ‘El kura tudu kes ki staba duenti’. — Mateus 4:23, 24; 8:16; 11:2-5.

Falta di kumida: Jizus uza puder ki se Pai da-l pa bira poku kumida na txeu kumida. I Bíblia ta mostra ma duránti ténpu ki Jizus staba na Téra, pa dôs bês el da milharis di algen kumida. — Mateus 14:14-21; 15:32-38.

Mórti: Bíblia ta pâpia di três resureison ki Jizus faze ku puder ki Deus da-l. Kel-li ta mostra ma Jeová ten puder di kaba ku mórti. Un di kes algen ki Jizus resusita dja tinha kuatu dia mortu. — Marcos 5:35-42; Lucas 7:11-16; João 11:3-44.