Bensons pa kes ki ta obi ku Deus

Proféta Muizés fla ma si nu obi ku mandamentus di Deus, nu ta resebe bensons di Deus. (Deuteronómio 10:13; 11:27 ) Nu ka ta obi ku Deus pamodi nu ten medu pa el ka kastiga-nu, má pamodi nu ta ama-l. Tanbê, kes bon kualidadi di Deus ta pô-nu ta obi ku el i ivita faze algun kuza ki pode pô-l ta fika tristi. ‘Amor di Deus ta siginifika kel-li: pa nu obi ku se mandamentus; i se mandamentus é ka pizadu’. — 1 João 5:3.

Má, modi ki obi ku Deus pode traze-nu bensons? Nu ben odja dôs izénplu.

1. OBI KU DEUS TA DA-NU SABEDORIA

‘Ami, Jeová, mi é bu Deus, Kel ki ta inxina-u kuzê ki é midjór pa bo, ki ta gia-u na kaminhu ki bu debe anda.’ — ISAÍAS 48:17.

Jeová Deus, ki é nos Kriador, konxe-nu rei di dretu i el ta da-nu orientason ki nu meste. Si nu krê toma bons disizon, nu meste studa Skrituras Sagradu pa nu pode sabe kuzê ki Deus krê pa nu faze i vive sima el ta fla.

2. OBI KU DEUS TA DJUDA-NU SER FILÍS

“Mutu más filis é tudu ken ki obi Palavra di Déus y e faze sima Deus fla.” — LÚKAS 11:28, BPK.

Oji, milhons di algen dja atxa alegria di verdadi pamodi es obi ku Palavra di Deus. Odja izénplu di un ómi na Spanha ki ta xatiaba faxi i el ta trataba pesoas mariadu, ti mésmu se mudjer. Un dia, el lé kuzê ki proféta Muizés fla sobri manera di ser mansu di Juzé, fidju di Jakó. Juzé bendedu sima skravu i dipôs el podu prézu sen ten kulpa. Má simé, el kontinua mansu, el npenha pa pas i el púrdua kes algen ki faze-l mal. (Génesis, kapítlus 37 ti 45) Kel ómi na Spanha fla: “Pensa na izénplu di Juzé, pô-m ta krê ser un algen mansu, kalmu i ki ta trata otus ku bondadi. Gósi N ta xinti ma mi é filís.”

Skrituras Sagradu ta da más orientason sobri modi ki nu debe trata kunpanheru. Nu ben odja kel-li na kel otu artigu.