Bu sta prontu pa ‘erda Téra’?

BU STA PRONTU PA DJUDA TÉRA BIRA UN PARAÍZU?

Kantu Jeová fla ómi ‘intxi Téra i manda na el’, el mostra ma téra interu ta ben biraba un paraízu. (Gén. 1:28) Kes algen ki ta ben erda téra ten ki ben obi ku kel órdi li. Jardin di Éden ka izisti más, nton es ten ki ben bira téra un paraízu. Lógu dipôs di Armajedon, es ta ben ten txeu trabadju pa faze pa linpa kes párti di téra ki gósi sta distruídu. Kel-li ta ben da txeu trabadju!

Kel-li ta lenbra-nu di kel trabadju ki kes israelita tevi ki faze kantu es volta di Babilónia. Dja tinha 70 anu ki ningen ka staba moradu na ses téra. Má Izaías fla ma ku benson di Jeová, es pode rekuperaba el. Kel profesia fla: ‘El ta ben bira se dizértu sima Éden i se lugar planu i dizértu sima jardin di Jeová.’ (Isa. 51:3) I kes israelita tevi bons rezultadu. Di mésmu manera, ku benson di Jeová kes ki ta ben erda téra ta ten bon rezultadu na bira-l un paraízu. I ten kuzas ki bu pode faze gósi ki ta mostra ma bu tene gana di partisipa na es trabadju.

Un di kes kuza ki bu pode faze é mante bu kaza i na vólta di bu kaza linpu i organizadu. Bu pode faze kel-li sikrê bus vizinhu ka ta liga faze linpéza. Tanbê, bu pode djuda linpa i kuida di Salon di Reinu i Salon di Asenbleia. I si bu situason ta da, bu pode prenxe un pitison pa djuda óras ki kontise un disgrasa. Asi, bu ta mostra ma bu sta prontu pa djuda bus irmon ku irmans ki meste. Pergunta bu kabésa: ‘Kuzê ki N pode prende faze gósi ki N pode ben uza si Jeová dexa-m erda téra?’

BU STA PRONTU PA DJUDA KES RESUSITADU TEN KES KUZA KI ES MESTE?

Lógu dipôs ki Jizus resusita kel fidju-fémia di Jairu, el fla-s pa es da kel minina algun kuza pa el kume. (Mar. 5:42, 43) Talvês ka foi difísil kuida di kel minina di 12 anu. Má pensa na tudu kel trabadju ki ta ben fazedu óras ki Jizus ben kunpri kel promésa ma ‘tudu kes ki sta na sipultura mimorial ta ben obi se vós i es ta sai’. (João 5:28, 29) Nbóra Bíblia ka ta fla txeu kuza, nu pode imajina ma kes resusitadu ta ben meste ajuda pa konsigi kumida, lugar pa mora i ropa. Bu pode mostra gósi ma bu sta prontu pa djuda? Pensa na kes pergunta li.

Óras ki ta avizadu ma bu kongregason ten vizita di enkaregadu di grupu di kongregason, bu ta konvida-l pa ba kume ku bo? Óras ki kes irmon ki sta na sirvisu spesial pa ténpu interu ta mudadu di diziginason di Betel pa kanpu ô óras ki un enkaregadu di grupu di kongregason ta tirmina se trabadju di vizita kongregasons, bu pode djuda-s atxa un lugar di mora? Si sta fazedu un kongrésu ô un kongrésu spesial pértu di undi ki bu ta mora, bu pode oferese pa trabadja antis ô dipôs di kongrésu ô resebe kes irmon ki ta ba sisti kongrésu?

BU STA PRONTU PA INXINA KES RESUSITADU?

Sima Atos 24:15 ta mostra, nu ta spéra ma un monti di algen ta ben resusitadu. Txeu di es ka tevi oportunidadi di konxe Jeová antis di es móre. Má es ta ben ten kel oportunidadi li dipôs ki es resusitadu.a Kes algen ki ta sirbi Deus di manera fiel ki ten spiriénsia, ta ben inxina-s. (Isa. 11:9) Xarlote, ki dja prega na Europa, na Mérka di Sul i na Áfrika tene gana di ben faze kel-li. El fla ku alegria: “N tene gana di ben inxina kes algen ki resusitadu. Óras ki N ta lé sobri un algen ki vive na pasadu, txeu bês N ta pensa: ‘Si kel algen li konxeba Jeová se vida pode sérba diferenti.’ N tene gana di ben inxina kes resusitadu sobri Jeová i mostra-s modi ki ses vida pode ser midjór si es obi ku Jeová i sirbi-l.”

Ti kes sérvu fiel di Jeová ki vive antis di Jizus ben téra, tanbê ta ben prende txeu kuza. Ta ben ser sábi i un priviléjiu splika Daniel ma kes profesia ki el skrebe má ki el ka ntende kunpri. (Dan. 12:8) Ô kuzê ki bu ta atxa di djuda Ruti ku Nuemi prende ma Misías ben di ses família? Ta ben ser un alegria partisipa na kel trabadju di inxina algen na mundu interu, livri di preson i distrason di kel mundu mau li!

Modi ki bu pode mostra gósi ma bu sta prontu pa partisipa na kel trabadju li? Un di kes manera é sforsa pa bu midjora bu manera di inxina i partisipa sénpri na trabadju di pregason ki ta fazedu na mundu interu. (Mat. 24:14) Sikrê idadi ô otus situason ka ta dexa-u faze kel trabadju li gósi sima bu ta krê, bu sforsu pode mostra ma bu sta prontu pa inxina kes resusitadu.

É inportanti nu pensa na kes pergunta li: ‘Bu tene gana di erda téra? Bu sta prontu pa ben djuda téra bira un paraízu i tanbê pa ben djuda i inxina kes algen ki resusitadu?’ Bu pode mostra ma bu sta prontu pa ben vive pa tudu ténpu li na téra si bu ta pruveta tudu oportunidadi gósi pa partisipa na trabadjus sima kes ki bu ta ben faze óras ki bu ben erda téra.