Kenha ki ta ben salva Téra?

Txeu algen sta preokupadu i es ta kridita ma é ómi ki sta straga Téra i vida ki ten na el. Alguns algen ki ta studa anbienti, fla ma nunka ómis ka ajiba di un manera ki ta stragaba txeu tipu di vida i ti ta poba txeu vida na prigu di ka izisti más sima gósi.

Ómis ta ben distrui Téra? Ô es ta ben vive di un manera ki ka ta straga naturéza?

Ses sforsu ta ten rezultadu?

Txeu algen ki ta studa naturéza es ten sertéza ma ómis pode proteje Téra i vive di manera ki ka ta straga naturéza. Alguns algen ki ta faze piskiza txiga konkluzon ma pa sforsu ki ómi ta faze ten rezultadu, es ten ki faze mudansa na txeu ária i omésmu ténpu. Kes mudansa ta inklui:

• Midjora manera ki algen ta kuida di Téra, floréstas, lagus ki ta sta na floréstas i osianus.

• Uza diferentis tipu di plantason i fonti di inerjia.

• Muda manera ki kumida ta produzidu i distribuidu pa pesoas pode kume prinsipalmenti verduras i kuantidadi ikilibradu di karni i pexi, asi ta straga ménus kumida.

• Rekonhese ma ten un bon kualidadi di vida ka ta dipende di ten txeu kuzas material.

Kuzê ki bu ta atxa? Nu debe kridita ma govérnus, inprézas i pesoas ta ba kolabora di manera ki nunka es ka fazeba antis? Ô bu ta atxa ma é inposível pamodi pesoas sta xeiu di ganánsia, es ta pensa sô na ses kabésa i es ka ta nporta ku futuru? — 2Timóteo 3:1-5.

Un motivu pa ten speransa

Bíblia ta da-nu sertéza ma Téra ka ta ben ser distruídu. El ta fla ma sforsu ki ómis ta faze ka ta txiga pa salva Téra, i el ta pâpia di mudansa ki debe fazedu. Tanbê el ta fla klaru modi ki kel mudansa ta kontise.

Pamodi ki sô sforsu di ómi ka ta salva planéta? Jeováa kria Téra i el da umanus responsabilidadi di kuida di el. (Génesis 1:28; 2:15) Sô es ta tinha bon rezultadu na responsabilidadi ki Deus da-s si es sigiba se orientason i si es obiba ku el. (Provérbios 20:24) Envês di kel-li, es ka obi ku Jeová i es toma ses própi disizon di vive sen el. (Eclesiastes 7:29) Ómi ka ten kapasidadi di toma kónta di Téra di es pa es. Sikrê es sforsa es ka ta konsigi ten bon rezultadu. — Provérbios 21:30; Jeremias 10:23.

Mudansa ki debe fazedu. Deus krê inpidi ómi di distrui Téra. (Apocalipse 11:18) Jeová ka ta ben konpo kes govérnu di ómi i kes algen ki ta straga Téra; el ta ben troka-s pa otus. (Apocalipse 21:1) É pur isu ki Jeová ta fla: ‘Odja! N sta poi tudu kuza ta bira novu.’ — Apocalipse 21:5.

Modi ki kel mudansa li ta ben kontise. Jeová ta ben troka govérnus di ómi pa un govérnu ki sta na Séu ki ta txomadu Reinu di Deus. Kel govérnu li ta ben governa Téra i se Rei é Jizus Kristu. — Daniel 2:44; Mateus 6:10.

Reinu di Deus ta ben inxina pesoas vive di akordu ku se leis justu. Óras ki pesoas rekonhese ma Deus é ses Kriador i es pasa ta sigi se orientason, es ta ben konsigi vive di un manera ki ka ta prujudika naturéza. (Isaías 11:9) Bíblia ta splika modi ki govérnu di Deus ta ben djuda kes algen ki ta sta na Téra ten un vida dretu i di un manera ki ta djuda nos planéta. El ta ben faze kes kuza li:

• Da kumida pa tudu algen. — Salmo 72:16.

• Konpo kes kuza na naturéza ki umanus ta uza pa vive. — Isaías 35:1, 2, 6, 7.

• Djuda ómis ku animal pa vive na pas ku kunpanheru. — Isaías 11:6-8; Oseias 2:18.

• Inpidi dizastris na naturéza. — Marcos 4:37-41.

Bu pode spéra ma ka ta dura, Reinu di Deus ta ben traze kes mudansa. Pa sabe más, lé artigu “Ki ténpu ki Reinu di Deus ta ben governa Téra?”