Tzolom 2

Li Yos qʼaxal us choʼq qamiiw

Qʼaxal us choʼq aawe li wank choʼq ramiiw li Yos. Li Yos tixkʼut chaawu chanru xtawbʼal li sahil chʼoolejil ut li wank saʼ tuqtuukilal; tatxkol ajwiʼ chiru li bʼalaqʼil ut li yibʼ ru aj naʼlebʼ. Tatrabʼi naq tattijoq. Tixkʼe aatuqtuukilal ut xkawilal aachʼool (Salmo 71:5; 73:28). Li Yos tatxtenqʼa naq wanqat saʼ chʼaʼajkilal (Salmo 18:18). Ut naxyeechiʼi jun laamaatan: aʼan aʼin li junelik yuʼam (Romanos 6:23).

Naq nokoojilok chiru li Yos, yooko chi jilok ajwiʼ rikʼinebʼ li ramiiw li Yos. Ebʼ li ramiiw li Yos naru teʼwanq choʼq aawamiiw, chanchanaqebʼ aawas aawiitzʼin. Sahaqebʼ saʼ xchʼool chi xkʼutbʼal chaawu chirix li Yos, tateʼxtenqʼa ut teʼxwaklesi aachʼool.

Moko juntaqʼeeto ta rikʼin li Yos. Naq naqasikʼ wank choʼq ramiiw li Yos tento naq tqanaw naq li wank saʼ amiiwil rikʼin li Yos moko naraj ta xyeebʼal naq juntaqʼeeto rikʼin. Li Yos naabʼal xchihabʼ chiqu, wank xchoxahil naʼlebʼ ut nim xwankil, joʼkan naq kaʼajwiʼ aʼan wank xkʼulubʼ re naq t–awabʼejinq qe. Joʼkan bʼi wi naqaj wank choʼq ramiiw li Yos, tento naq tooʼabʼinq ut tqabʼaanu li kʼaru naxpatzʼ qe. Wi naqapaabʼ li Yos sahaq saʼ qachʼool chi junelik (Isaías 48:18).