Tzolom 5

Ebʼ li ramiiw li Yos teʼwanq saʼ li Sahilal Naʼajej

Li Sahilal Naʼajej moko chanchanaq ta li ruuchichʼochʼ li wank anaqwan. Li Yos maajoʼqʼe kiraj naq li ruuchichʼochʼ xnumtaak raj saʼ chʼaʼajkilal, chi moko saʼ rahilal. Saʼ li kutan chaalel, li Yos tixjal ru li Ruuchichʼochʼ choʼq sahilal naʼajej. Chanruhaq li sahilal naʼajej? Qilaq kʼaru naxye li Santil Hu.

Chaabʼilaqebʼ li poyanam. Saʼ li Sahilal Naʼajej teʼwanq ebʼ li ramiiw li Yos. Teʼxbʼaanu li chaabʼilal chiribʼilebʼ ribʼ ut teʼwanq saʼ junajil saʼ xtiikil xbʼe li Jehobʼa (Proverbios 2:21).

Numtajenaqaq li tzakahemq. Saʼ li Sahilal Naʼajej maaʼani chik tixkuy weʼej. Li Santil Hu naxye: «Numtajenaqaq li awimq [malaj tzakahemq] saʼ ruuchichʼochʼ» (Salmo 72:16).

Chaqʼalaqebʼ ru li ochoch ut chaabʼilaq ru li kʼanjel. Saʼ li Sahilal Naʼajej chixjunilebʼ li junkabʼal teʼwanq rochoch, xkʼanjel ut sahaqebʼ saʼ xchʼool chi xbʼaanunkil (Isaías 65:21-23).

Tuqtuukilal saʼ chixjunil li ruuchichʼochʼ. Maajoʼqʼe chik teʼyaloq, chi moko teʼkamq ebʼ li poyanam saʼ li ninqal yalok u. Li Raatin li Yos naxye: «[Li Yos] xchʼanabʼank re li yalok» (Salmo 46:9, 10).

Wanq li kawilal. Li Santil Hu naxyeechiʼi: «Maajun chik saʼ qayanq [saʼ li Sahilal Naʼajej] tixye: Yajin» (Isaías 33:24). Maakʼaʼaqebʼ chik li yeq roq, li mutzʼ, li tzʼapxik, li mem (Isaías 35:5, 6).

Maakʼaʼaq chik li rahil chʼoolejil, chi moko li kamk. Li Raatin li Yos naxye: «Inkʼaʼ chik taawanq kamk, chi moko yaabʼak, chi moko japok e malaj rahilal, xbʼaan naq li najter ruuchichʼochʼ ak xnumeʼk» (Apocalipsis 21:4).

Maakʼaʼaqebʼ chik li maaʼusebʼ xnaʼlebʼ. Li Jehobʼa naxyeechiʼi naq «ebʼ li inkʼaʼ usebʼ xnaʼlebʼ isinbʼilaqebʼ saʼ li naʼajej aʼin [li ruuchichʼochʼ]; ebʼ laj bʼalaqʼ teʼsachmanq chi junwaakaj» (Proverbios 2:22).

Ebʼ li poyanam teʼxra ut teʼroxloqʼi ribʼ chiri-bʼilebʼ ribʼ. Maakʼaʼaq chik li yibʼ ru aj naʼlebʼ, chi moko li kaw taqlank, chi moko li ratawankil li bʼihomal, chi moko li xikʼ ilok. Ebʼ li poyanam teʼwanq saʼ junajil saʼ xtiikil xbʼe li Yos (Isaías 26:9).