Tzolom 6

Li Sahilal Naʼajej nachʼ wank chaq!

Chixjunil li maaʼusilal li yook chi kʼulmank saʼ Ruuchichʼochʼ naxkʼutbʼesi naq li Sahilal Naʼajej nachʼ wank chaq. Najter qʼe kutan li Santil Hu kixye naq tkʼulmanq rahil kutan naq li Sahilal Naʼajej yooq chaq chi nachʼok. Ak wanko saʼebʼ li kutan aʼin. Li Santil Hu kixye naq aʼin tkʼulmanq:

Ninqal yalok u. «Teʼwaklijeʼq chi xkamsinkil ribʼebʼ tenamit rikʼin jalan chik tenamit, li awabʼej rikʼin jalan chik awabʼej.» (Mateo 24:⁠7.) Li eetalil aʼin yook chi kʼulmank. Chalen chaq li chihabʼ 1914 ak kiwank wiibʼ li ninqal yalok u joʼ ajwiʼ li kokʼ yalok saʼ chixjunil li ruuchichʼochʼ. Kʼajoʼebʼ xkʼihal li poyanam xeʼkamsiik chisaʼ.

Yalaq bʼar wanq li yajel. «Taawanjeʼq [...] yajel» (Lucas 21:11). Ma ak xkʼulmank li eetalil aʼin? Ak xkʼulmank. Wank naabʼal li yajel: li qʼaayajel, li xyajel chʼoolej, li xyajel li pospoʼoy, li raxkehobʼ, li kaqyajel (SIDA). Kʼajoʼebʼ xkʼihal li poyanam yookebʼ chi kamk xbʼaan li jalan jalank chi yajel.

Moko tzʼaqal ta li tzakahemq. Saʼ chixjunil li Ruuchichʼochʼ naabʼalebʼ moko tzʼaqlojenaq ta xtzakahemq. Rajlal chihabʼ kʼajoʼ xkʼihal li poyanam nekeʼkamk xbʼaan li weʼej. Aʼin jun chik li eetalil naq li Sahilal Naʼajej yook chaq chi nachʼok. Li Santil Hu naxye: «Taawanjeʼq weʼej» (Marcos 13:8).

Ninqi hiik. «Talajewanq ninqi hiik [...] saʼ naabʼal chi naʼajej.» (Lucas 21:11.) Aʼin ajwiʼ ak xkʼulmank saʼ qakutan. Chalen chaq li chihabʼ 1914, kʼajoʼ xkʼihal li poyanam xeʼkamk xbʼaan li ninqi hiik.

Li maaʼusebʼ xnaʼlebʼ. Li poyanam «teʼxrahi ru li tumin, teʼxnimobʼresihatq xwankilebʼ [...] aʼ chik li xsahilal li ruuchichʼochʼ teʼrataw chiru li xraabʼal li Yos». Ebʼ li alalbʼej kʼajolbʼej «aj qʼetolaqebʼ raatin xnaʼ xyuwaʼ» (2 Timoteo 3:1-5). Saʼ li qakutan naabʼalebʼ joʼkanebʼ xnaʼlebʼ, peʼyaal? Inkʼaʼ nekeʼroxloqʼi li Yos ut nekeʼxkʼe saʼ chʼaʼajkilal li yookebʼ chi tzolok chirix li Yos.

Li Maaʼusilal. Joʼkan ajwiʼ «taanumtaaq li maaʼusilal» (Mateo 24:12). Mare nakaakʼe reetal naq li maaʼusilal yook chi numtaak saʼebʼ li qakutan. Yalaq bʼar wank li elqʼak, li bʼalaqʼik malaj li raaxiikʼ.

Chixjunil aʼin naxkʼutbʼesi naq li xNimajwal Awabʼejilal li Yos nachʼ wank chaq. Li Santil Hu naxye: «Naq teeril naq talajkʼulmanq aʼin, chenawaq naq li xnimajwal [awabʼejilal] li Yos ak nachʼ wan chaq» (Lucas 21:31). Li xChoxahil Awabʼejilal li Yos tixchʼinaʼusa ru li Ruuchichʼochʼ re naq twanq choʼq sahilal naʼajej. Li xʼawabʼejilal li Yos tkanaaq saʼ xnaʼajebʼ li awabʼej (Daniel 2:44).