Li Chaabʼil Naʼlebʼ li Nabʼeeresink Qe

MA US tooʼelq wi tqakʼulubʼa naq li Jehobʼa tjolominq saʼ qabʼeen? Re xnawbʼal aʼin, tento xtzʼilbʼal li naʼlebʼ li wank saʼ li Raatin. Ma qʼaxal chaabʼil naʼlebʼ aʼin? Ma nokooxtenqʼa chi xbʼeeresinkil chiʼus li qayuʼam? Saʼ li tasal hu Proverbios li awabʼej Salomon kixtzʼiibʼa chi siʼeent li chaabʼil naʼlebʼ li naʼaatinak chirix li qayuʼam. Qilaq wiibʼ oxibʼ rehebʼ aʼin.

Choowanq choʼq ramiiw li Yos. Re naq toowanq choʼq ramiiw li Jehobʼa, tento tqakʼojobʼ qachʼool rikʼin. Laj Salomon kixye: «Kʼojkʼooq aachʼool rikʼin li Yos [Jehobʼa] chi junelik, ut maawaʼ rikʼin laakʼaʼuxl laanaʼlebʼ. Saʼ chixjunil li kʼaru taabʼaanu wanq saʼ aachʼool li Qaawaʼ Yos, ut Aʼan tixtiikobʼresi laabʼe» (Proverbios 3:5, 6). Chanru naqakʼutbʼesi naq kʼojkʼo qachʼool rikʼin li Yos? Naq naqakanabʼ naq aʼan tbʼeeresinq qe ut naq naqapaabʼ li xchaqʼrabʼ. Ut wi joʼkan tqabʼaanu, tqataw xyaalal li qayuʼam: tqasahobʼresi xchʼool li Qayuwaʼ li wank saʼ choxa ut tqakʼutbʼesi naq laj Tza xyuwaʼil aj tikʼtiʼ (Proverbios 27:11).

Li qajunkabʼal ut ebʼ li qamiiw. Saʼebʼ li qakutan li xnaʼlebʼ li Yos jwal aajel ru choʼq rehebʼ li junkabʼal. Li Yos naxye re li bʼeelomej: «Sahaq aachʼool rikʼin laawixaqil li xatsumlaak wiʼ saʼ laasaajilal!», rikʼin aʼin naxjultika chiru naq tenebʼanbʼil saʼ xbʼeen naq maajunwa tixbʼalaqʼi li rixaqil (Proverbios 5:18-20). Li chaabʼil naʼlebʼ choʼq re li ixaqilbʼej natawmank saʼ Proverbios tasal 31 bʼarwiʼ naxye chanru tixbʼaanu re naq traheʼq ut t-oxloqʼiiq xbʼaan li xbʼeelom ut ebʼ li xkokʼal. Ut ebʼ li kokʼal yeebʼilebʼ re, naq teʼabʼinq chiru li xnaʼ xyuwaʼ (Proverbios 6:20). Li tasal hu aʼin naxye naq us naq wanq qamiiw, abʼan inkʼaʼ us wi junelik naqisi qibʼ qajunes xbʼaan naq twulaq xqʼehil naq inkʼaʼ chik tqaj wank rikʼinebʼ li qamiiw (Proverbios 18:1). Usta aajel ru naq twanq qamiiw, abʼan us naq toj tqasikʼebʼ ru ut inkʼaʼ tqajunaji qibʼ rikʼinebʼ li teʼruuq xpoʼbʼal qanaʼlebʼ (Proverbios 13:20; 17:17).

Li xyuʼam li junjunq. Chixjunil li naʼlebʼ li wank saʼ li hu Proverbios nokooxtenqʼa re naq us wanqo ut nokooxtenqʼa ajwiʼ chi risinkil saʼ li qakʼaʼuxl li yiibʼru aj naʼlebʼ, ut xtzʼeqtaanankil li inkʼaʼ us joʼ li kalaak. Ut tqatzol chik li chaabʼil naʼlebʼ ut chanru tookʼanjelaq chiʼus (Proverbios 6:6; 14:30; 20:1). Naxye ajwiʼ kʼaru li chʼaʼajkilal tchalq saʼ qabʼeen wi naqayuʼami li naʼlebʼ li maakʼaʼ saʼ li Santil Hu (Proverbios 14:12). Ut naxye ajwiʼ naq inkʼaʼ tqatzʼajni li qaanm malaj xchamal li qachʼool, xbʼaan naq aran «natiklaak li yuʼam» (Proverbios 4:23).

Naabʼalebʼ li qas qiitzʼin li keʼxyuʼami li naʼlebʼ aʼin, keʼusaak li xyuʼamebʼ. Anaqwan chʼolchʼo chiruhebʼ naq qʼaxal us wank rubʼel xwankil li Jehobʼa.

(Isinbʼil chaq saʼ xhuhil Proverbios.)