Jun li Naʼlebʼ li Natzʼaqlok ajwiʼ Ru saʼebʼ li Qakutan

SAʼ LI Tzuul Olivo chʼinaʼus nakʼutunk chaq li tenamit Jerusalen ut li Rochoch li Yos. Aran wankebʼ naq kaahibʼ rehebʼ li Xʼapostol keʼxye naq tixchʼolobʼ chiruhebʼ kʼaru xyaalal li raatin. Naq keʼxye re aʼin, tojaʼ traqeʼq xyeebʼal rehebʼ naq tsachmanq li Rochoch li Yos, abʼan xbʼeenwa kiʼaatinak chaq chirix li «rosoʼjik li ruuchichʼochʼ» (Mateo 13:40, 49). Joʼkan naq keʼxpatzʼ re: «Joʼqʼe taakʼulmanq aʼin ut kʼaru reetalil laachalik [malaj «reetalil naq wanqat saʼ qayanq», TNM] ut li rosoʼjik li ruuchichʼochʼ» (Mateo 24:3).

Li Jesus kixchʼolobʼ chiruhebʼ kʼaru tkʼulmanq xbʼeenwa naq tjukʼmanq li tenamit Jerusalen ut li Rochoch li Yos. Abʼan aʼin ttzʼaqloq ajwiʼ saʼ chixjunil li ruuchichʼochʼ. Ut re xnawbʼal joqʼe twanq saʼ qayanq li Jesus, ebʼ li qas qiitzʼin tento teʼxkʼe reetal jun li nimla eetalil: li jalan jalanq chi naʼlebʼ li kixye chaq li Jesus yooq chi kʼulmank saʼ chixjunil li ruuchichʼochʼ. Ut aʼin li eetalil li tkʼutbʼesinq re naq li Jesus ak xaqabʼanbʼil chik choʼq Awabʼej saʼ li Xʼawabʼejilal li Jehobʼa. Ut li awabʼejilal aʼin chi seebʼ trisi chixjunil li maaʼusilal ut tixkʼam chaq wiʼ chik li tuqtuukilal saʼ xbʼeen li Ruuchichʼochʼ. Naq yook chaq chi tzʼaqlok li kixye chaq li Jesus aʼan tixkʼutbʼesi naq yook chaq chi nachʼok li rosoʼjik li maaʼusilal ut li xʼawabʼejilal li winq, ebʼ li paabʼal ut li xwanjikebʼ li qas qiitzʼin; tojaʼ naq tchalq li akʼ ruuchichʼochʼ.

Kʼaru tkʼulmanq naq li Jesus t-oq chi awabʼejink saʼ choxa? Li Jesus kixye naq yooq li yalok u, li weʼej, li kaqsut-iqʼ ut li nimla yajel saʼ chixjunil li ruuchichʼochʼ. Ebʼ li poyanam moko yooqebʼ ta chik xpaabʼankil li xchaqʼrabʼ li tenamit. Ut ebʼ li tzʼaqal aj paabʼanel yooqebʼ xpuktesinkil li chaabʼil esilal chirix li Xʼawabʼejilal li Yos saʼ chixjunil li ruuchichʼochʼ. Li nimla eetalil traqeʼq naq tchalq li «xnimal li rahilal». Jwal chʼaʼajkaq xkuybʼal li nimla kutan aʼin! (Mateo 24:21.)

Ut chanru teʼxnaw raj ebʼ li tzʼaqal aj paabʼanel naq yooq chaq chi nachʼok li nimla rahilal aʼin? Li Jesus kixye rehebʼ li xtzolom: «Chekʼehaq reetal li xcheʼel li iig» (Lucas 21:29). Naq naʼok chi elk xxaq xcheʼil junaq li iig, naqanaw naq yook chaq chi nachʼok li saqʼehil. Joʼkan bʼiʼ, naq yooq chaq chi kʼulmank chixjunil li kixye chaq li Jesus, tnawmanq naq chi seebʼ tchalq li nimla kutan. Li Jesus kixchʼolobʼ naq kaʼajwiʼ li Yuwaʼbʼej naxnaw xkutankil ut xhoonalil naq tchalq li nimla rahilal. Joʼkan naq kixye: «Yoʼon wanqex, chexyoʼleq xbʼaan naq inkʼaʼ nekenaw joʼqʼe li xqʼehil» (Marcos 13:33).

(Isinbʼil chaq saʼ Mateo tasal 24, 25; saʼ Marcos tasal 13 ut saʼ Lucas tasal 21.)