Laj Tza naxyal rix li Jesus

Naq kisubʼeʼk saʼ haʼ li Jesus, kikʼameʼk xbʼaan li santil musiqʼej saʼ li chaqichʼochʼ. Maakʼaʼ kixwaʼ chiru 40 kutan joʼkan naq yook xtzʼokajik. Tojaʼ naq kiwulak laj Tza chi xyalbʼal rix li Jesus. Xbʼeenwa kixye re: «Wi relik chi yaal naq ralalat li Yos, ye rehebʼ li pek aʼin naq teʼsutqʼiiq choʼq wa». Abʼan li Jesus kixsume rikʼin ebʼ li aatin li wank saʼ li Santil Hu: «Tzʼiibʼanbʼil naq moko kaʼaj tawiʼ rikʼin tibʼelwa yoʼyokebʼ li poyanam. Aajel ajwiʼ ru naq teʼrabʼi chixjunil li naxye li Jehobʼa».

Laj Tza kixyal wiʼ chik rix li Jesus naq kixkʼam saʼ xbʼeen li rochoch li Yos: «Wi relik chi yaal naq ralalat li Yos, kut aawibʼ taqʼa. Tzʼiibʼanbʼil naq li Yos tixtaqla chaq ebʼ li xʼanjel re aakolbʼal». Abʼan li Jesus kixsume wiʼ chik rikʼin ebʼ li aatin li wank saʼ li Santil Hu: «Tzʼiibʼanbʼil naq inkʼaʼ taayal rix li Jehobʼa».

Re xraqbʼal, laj Tza kixkʼut chiru chixjunil li xʼawabʼejilal li ruuchichʼochʼ rikʼin li xbʼihomal ut li xloqʼal, ut kixye re: «Tinkʼe aawe chixjunil ebʼ li awabʼejilal aʼin ut li xloqʼal wi tinaaloqʼoni jun sut ajwiʼ». Abʼan li Jesus kixye re laj Tza: «Elen chiwu! Tzʼiibʼanbʼil naq kaʼajwiʼ li Jehobʼa tqaloqʼoni ru».

Toj aran xkoho laj Tza, ut keʼwulak wiibʼ oxibʼ ebʼ li anjel ut keʼxkʼe xtzakahemq li Jesus. Chirix chik aʼan, li Jesus kiʼok xpuktesinkil li chaabʼil esil chirix li Xnimajwal Awabʼejilal li Yos. Aʼan chaq li kʼanjel li kikʼeheʼk re xbʼaan li Jehobʼa arin saʼ Ruuchichʼochʼ. Ebʼ li qas qiitzʼin nekeʼwulak chiru li naxkʼut li Jesus, ut nekeʼxtaqe yalaq bʼar.