TZOLOM 09

Li tijok nokooxtenqʼa chi jilok chixkʼatq li Yos

Chi huhil

Ma wank sut nakaawekʼa naq inkʼaʼ nakatruuk xbʼeresinkil laayuʼam? Ma toj maajiʼ nakaataw xsumenkil wiibʼ oxibʼ laapatzʼom? Ma naʼajmank naq teʼxwaklesi ut teʼxkʼojobʼ laachʼool? Ma twulaq raj chaawu jilok chixkʼatq li Jehobʼa? Li tijok naru nakatxtenqʼa chi xtawbʼal aʼin. Abʼan, chanru tattijoq? Ma narabʼi chixjunil li tij li Yos? Kʼaru taabʼaanu re naq chʼolchʼooq chaawu naq li Yos trabʼi laatij? Qilaq.

1. Chiru ani tootijoq ut kʼaru naru naqaye saʼ li qatij?

Li Jesús kixkʼut naq kaʼajwiʼ chiru li Qayuwaʼ Jehobʼa tootijoq. Li Jesús ajwiʼ kitijok chiru li Jehobʼa. Saʼ jun kutan kixye: «Joʼkaʼin naq textijoq laaʼex: “At qaYuwaʼ li wankat saʼ choxa...”» (Mateo 6:9). Li tijok nokooxkʼe saʼ tzʼaqal amiiwil rikʼin li Jehobʼa.

Naq nokootijok chiru li Jehobʼa naru naqaye re chixjunil li naqekʼa. Wi naqaj naq li Jehobʼa tixsume li qatij tento tixchap ribʼ rikʼin li rajom. Li Santil Hu naxye «naq Aʼan nokoorabʼi wi wank kʼaru tqatzʼaama chiru joʼ chanru naraj Aʼan» (1 Juan 5:14). Li Jesús kixkʼe wiibʼ oxibʼ li eetalil chirix li kʼaru tooruuq xpatzʼbʼal naq tootijoq (yaabʼasi Mateo 6:9-13). Naq ak xqaye re li naqekʼa misach saʼ qachʼool xbʼanyoxinkil re chixjunil li naxkʼe qe ut tijok chirixebʼ li junchʼol.

2. Chanru tootijoq?

Li Santil Hu naxye qe: «Tehomaq leechʼool chiru: li Yos» (Salmo 62:9). Joʼkan naq tento tootijoq chi anchal qachʼool. Naru nokootijok saʼ kawil kuxej malaj saʼ li qakʼaʼuxl. Naru ajwiʼ tootijoq chi wiqʼwo, chi chunchu malaj chi xaqxo abʼan li wank xwankil aʼan naq tqoxloqʼi li Jehobʼa. Naru nokootijok yalaq joqʼe hoonal ut yalaq bʼar.

3. Chanru naxsume li qatij li Yos?

Naroksi jalan jalanq li naʼlebʼ. Rikʼin li Santil Hu naxsume ebʼ li qapatzʼom. Rilbʼal li Santil Hu naru «naxkʼe xnaʼlebʼ li maakʼaʼ xnaʼlebʼ» (Salmo 19:7, Wy; yaabʼasi Santiago 1:5). Naq wanq qachʼaʼajkilal li Jehobʼa naru naxtuqubʼ ru qachʼool. Ut naq naʼajmank chiqu naru naroksi ebʼ li qechpaabʼanel re qatenqʼankil.

QASIKʼAQ XCHAMAL LI NAʼLEBʼ

Qilaq chanru tootijoq chi anchal qachʼool ut chanru naru nokooxtenqʼa li tijok.

4. Wank wiibʼ oxibʼ li naʼlebʼ li tento tqabʼaanu naq tootijoq

Kʼaru tento tqabʼaanu re naq li Yos tixkʼulubʼa li qatij? Cheerilaq li BʼIDEO.

BʼIDEO: Ma narabʼi li Yos chixjunilebʼ li tij? (moko chixjunil ta) (2:42)

Li Jehobʼa naraj naq kaʼajwiʼ chiru tootijoq. Cheeyaabʼasi Salmo 65:3 ut chexʼaatinaq chirix ebʼ li patzʼom aʼin:

Ma nakaapaabʼ naq li Yos naraj naq laaʼat tattijoq chiru? Kʼaʼut naq nakaaye aʼan?

Wi naqaj naq li Yos trabʼi li qatij tento tqayal qaqʼe chi xyuʼaminkil li xchaqʼrabʼ. Cheeyaabʼasi Miqueas 3:4 ut 1 Pedro 3:12 ut chexʼaatinaq chirix li patzʼom aʼin:

Kʼaru tqabʼaanu re naq li Yos trabʼi li qatij?

Wiibʼ chʼuut ebʼ laj puubʼ li xikʼ nekeʼril ribʼ nekeʼtijok chiru li Yos re naq teʼqʼaxoq saʼ li yalok u. Ma tooruuq tawiʼ xyeebʼal naq li Yos trabʼi ebʼ li xtij?

5. Tento tqaye li wank saʼ li qachʼool

Naabʼalebʼ li kristiʼaan xeʼxtzol xyeebʼal jun ajwiʼ li tij naq nekeʼtijok. Abʼan, ma aʼan li tij li nawulak chiru li Yos? Cheeyaabʼasi Mateo 6:7 ut chexʼaatinaq chirix li patzʼom aʼin:

Kʼaru tqabʼaanu re naq moko jun ta ajwiʼ li tij tqaye naq tootijoq?

Kʼoxla jun li chaabʼil naʼlebʼ li xaakʼul chiru li kutan re naq taabʼanyoxi re li Jehobʼa. Wi taabʼaanu aʼin chiru jun xamaan, ak xat-aatinak chirix wuqubʼ li naʼlebʼ chiru li Jehobʼa, moko chirix jun ta ajwiʼ.

Jun li chʼinaʼal yook chi aatinak rikʼin li xnaʼ xyuwaʼ. — Jun li yuwaʼbʼej naroybʼeni naq li ralal tixye re kʼaru narekʼa. Li Jehobʼa naraj ajwiʼ naq tootijoq chi anchal qachʼool.

6. Li tijok aʼan jun li maatan li kixkʼe qe li Yos

Chanru truuq xkawubʼresinkil qachʼool li tij naq yooqo xnumsinkil junaq li chʼaʼajkilal? Cheerilaq li BʼIDEO.

BʼIDEO: Li tijok nokooxtenqʼa (1:32)

Li Santil Hu naxye qe naq li tijok naru naxkʼe li xtuqtuukilal li qachʼool. Cheeyaabʼasi Filipenses 4:6, 7 ut chexʼaatinaq chirix ebʼ li patzʼom aʼin:

Usta li tijok moko narisi ta chixjunil li qachʼaʼajkilal, chanru nokooxtenqʼa?
Chirix kʼaru raj taawaj tijok?

Ma nakaanaw?

Najter qʼe kutan nayeemank ajwiʼ «joʼkan taxaq» re xraqbʼal jun li tij (1 Crónicas 16:36).

7. Sikʼ aahoonal re tijok

Wank sut qʼaxal laatzʼ qu ut nasach saʼ qachʼool tijok. Ma wank chaq xwankil li tijok chiru li Jesús? Kʼaʼut? Cheeyaabʼasi Mateo 14:23 ut Marcos 1:35 ut chexʼaatinaq chirix ebʼ li patzʼom aʼin:

Chanru naxsikʼ li Jesús xhoonal re tijok?
Ut laaʼat, kʼaru taabʼaanu re naq twanq aahoonal re tijok?

Ebʼ li jalam u naxkʼutbʼesi jun li ixq li natijok chiru li kutan: 1. Naq nawakliik. 2. Rikʼinebʼ li xkokʼal. 3. Saʼ li xkʼanjel. 4. Naq ok re chi waʼak.

WIIBʼ OXIBʼ NEKEʼXYE: «Li Yos nabʼayk chi xsumenkil li qatij».

Ut laaʼat, kʼaru nakaaye? Kʼaʼut?

LI AK XQATZOL

Wi nokootijok chi anchal qachʼool nokoojilok chixkʼatq li Yos. Joʼkan ajwiʼ naxtuqubʼ ru li qachʼool ut naxkʼe qametzʼew re naq tqabʼaanu li nawulak chiru.