Ebʼ li bʼalaqʼil paabʼal nekeʼxtzʼajni li xkʼabʼaʼ li Yos

Wi li Yos aj rahonel, kʼaʼut naq ebʼ li paabʼal li nekeʼaatinak chirix li xkʼabʼaʼ ut nekeʼxye naq wankebʼ choʼq ruuchil nekeʼxbʼaanu li maaʼusilal? Xbʼaan naq aʼanebʼ li bʼalaqʼil paabʼal. Li nekeʼxbʼaanu ut li nekeʼxye naxtzʼajni li xkʼabʼaʼ li Yos. Chanru nekeʼxbʼaanu aʼin? Kʼaru narekʼa li Yos chirix aʼin? Ut kʼaru tixbʼaanu?

1. Chanru naxtzʼajni li xkʼabʼaʼ li Yos li xkʼutumebʼ li bʼalaqʼil paabʼal?

Ebʼ li bʼalaqʼil paabʼal keʼxjal «li yaal [li] nanawmank chirix li Yos rikʼin li tikʼtiʼ» (Romanos 1:25, Li Acʼ Chakʼrab, Sociedad Bíblica en Guatemala, [AC]. Akʼ tzʼiibʼ). Jun eetalil, ebʼ li paabʼal aʼin inkʼaʼ nekeʼxkʼe chi naweʼk li xkʼabʼaʼ li Yos. Abʼan li Santil Hu naxye qe naq tento tqoksi li xkʼabʼaʼ (Romanos 10:13, 14). Ebʼ laj kʼamolbʼe saʼebʼ li bʼalaqʼil paabʼal nekeʼxye naq li Yos wank re, naq naqakʼul junaq li rahilal. Aʼin moko yaal ta. Xbʼaan naq li Yos maajunwa naxbʼaanu junaq li maaʼusilal (yaabʼasi Santiago 1:13). Ra xyeebʼal, abʼan ebʼ li tikʼtiʼ aʼin naxbʼaanu naq ebʼ li kristiʼaan teʼxnajtobʼresi ribʼ rikʼin li Yos.

2. Chanru naxtzʼajni li xkʼabʼaʼ li Yos li xbʼaanuhomebʼ li bʼalaqʼil paabʼal?

Ebʼ li bʼalaqʼil paabʼal moko nekeʼril ta li kristiʼaan joʼ narilebʼ li Jehobʼa. Li Santil Hu naxye «naq li xmaakebʼ [...] ak xoʼtubʼlaaq toj saʼ choxa» (Apocalipsis 18:5). Chiru naabʼal siʼeent chihabʼ ebʼ li bʼalaqʼil paabʼal yook chi tzʼaqonk saʼ li xʼawabʼejilal li winq, nekeʼokenk saʼ li yalok u, nekeʼxkʼulubʼa naq teʼkamsiiq chi siʼeent li kristiʼaan malaj aʼanebʼ nekeʼkamsink rehebʼ. Wankebʼ laj kʼamolbʼe saʼebʼ li bʼalaqʼil paabʼal nekeʼraj bʼihomoʼk, joʼkan naq nekeʼpatzʼok tumin. Li naʼlebʼ aʼin naxkʼut naq inkʼaʼ nekeʼxnaw ru li Yos. Joʼkan naq, chan put ru teʼwanq choʼq ruuchil? (yaabʼasi 1 Juan 4:8).

3. Kʼaru narekʼa li Jehobʼa naq naril li nekeʼxbʼaanu ebʼ li bʼalaqʼil paabʼal?

Wi nakatjosqʼoʼk naq nakaawil li nekeʼxbʼaanu ebʼ li bʼalaqʼil paabʼal, kʼoxla kʼaru tawiʼ narekʼa li Jehobʼa? Li Jehobʼa naxrahebʼ li qas qiitzʼin. Abʼan kʼajoʼ xjosqʼil saʼ xbʼeenebʼ li nekeʼkʼamok bʼe saʼebʼ li bʼalaqʼil paabʼal xbʼaan naq nekeʼxrahobʼtesi li nekeʼtaqenk rehebʼ. Li Yos kixye naq ebʼ li bʼalaqʼil paabʼal teʼsachmanq ut maajunwa chik tnawmanq chirix (Apocalipsis 18:21). Chi seebʼ li Yos tixsach chixjunilebʼ li bʼalaqʼil paabʼal (Apocalipsis 18:8).

QASIKʼAQ XCHAMAL LI NAʼLEBʼ

4. Li Yos moko naxkʼulubʼa ta chixjunilebʼ li paabʼal

Naabʼalebʼ li kristiʼaan nekeʼxye naq ebʼ li paabʼal yal jalan jalanq li bʼe li nokooxkʼam rikʼin li Yos. Ma yaal aʼin? Cheeyaabʼasi Mateo 7:13, 14 ut chexʼaatinaq chirix li patzʼom aʼin:

• Kʼaru naxye li Santil Hu chirix li bʼe li nakʼamok saʼ li yuʼam?

Cheerilaq li BʼIDEO ut chexʼaatinaq chirix li patzʼom aʼin:

BʼIDEO: Ma naxkʼulubʼa li Yos chixjunil ebʼ li paabʼal? (moko chixjunil ta) (3:22)

• Ma naxkʼut li Santil Hu naq li Yos naxkʼulubʼa chixjunilebʼ li paabʼal?

5. Ebʼ li bʼalaqʼil paabʼal inkʼaʼ nekeʼxyuʼami li xrahom li Yos

Wank jalan jalanq xbʼaanuhomebʼ li bʼalaqʼil paabʼal li naxtzʼajni li xkʼabʼaʼ li Yos. Jun li yibʼ aj naʼlebʼ li nekeʼxbʼaanu aʼan okenk saʼ li yalok u. Re xnawbʼal bʼayaq chirix aʼin cheerilaq li BʼIDEO. Ut chexʼaatinaq chirix ebʼ li patzʼom aʼin:

BʼIDEO: Li keʼxbʼaanu ebʼ li iklees saʼ li xkabʼ nimla yalok u (2:22)

• Kʼaru xeʼxbʼaanu ebʼ li paabʼal saʼ li xkabʼ nimla yalok u?

• Kʼaru nakaakʼoxla chirix li xeʼxbʼaanu?

Cheeyaabʼasi Juan 13:34, 35 ut 17:16 ut chexʼaatinaq chirix ebʼ li patzʼom aʼin:

• Kʼaru tawiʼ narekʼa li Jehobʼa naq naril naq ebʼ li paabʼal nekeʼokenk saʼ li yalok u?

• Saʼ xmaak ebʼ li bʼalaqʼil paabʼal naʼuxmank naabʼal li maaʼusilal saʼ xbʼeen li ruuchichʼochʼ ut inkʼaʼ nekeʼxkʼutbʼesi xrahom li Yos. Ma ak xaawil junaq li naʼlebʼ li naxkʼut naq yaal aʼin?

6. Li Yos naraj xtenqʼankilebʼ li kristiʼaan re naq teʼxkanabʼ ebʼ li bʼalaqʼil paabʼal

Cheeyaabʼasi Apocalipsis 18:4a ut chexʼaatinaq chirix li patzʼom aʼin:

• Li Yos naraj xkolbʼalebʼ li kristiʼaan li xeʼbʼalaqʼiik xbʼaan ebʼ li bʼalaqʼil paabʼal. Kʼaru nakaakʼoxla chirix aʼin?

7. Maakanabʼ xnawbʼal ru li tzʼaqal Yos

Ma taakanabʼ naq li xnaʼlebʼ ut li xbʼaanuhomebʼ li bʼalaqʼil paabʼal tixjal li nakaakʼoxla chirix Yos? Kʼoxla chirix jun li saaj al li naxqʼet ribʼ chiru li xnaʼ xyuwaʼ, naxkanabʼ li rochoch ut naʼok xbʼaanunkil li maaʼusilal. Li yuwaʼbʼej moko nawulak ta chiru li naxbʼaanu li ralal. Ma us raj naq tqaqʼabʼa li yuwaʼbʼej ut tqaye naq aʼan wank re naq yibʼru xnaʼlebʼ li ralal?

• Ma us raj xyeebʼal naq li Jehobʼa wank re, naq yibʼru xnaʼlebʼebʼ li bʼalaqʼil paabʼal?

LI AK XQATZOL

Ebʼ li bʼalaqʼil paabʼal ak keʼxtzʼajni li xkʼabʼaʼ li Yos rikʼin li xkʼutum ut li xyibʼ aj bʼaanuhom. Joʼkan naq chi seebʼ li Yos tixsachebʼ chi junajwa.

Qajultikaq

• Kʼaru nakaakʼoxla chirix li xkʼutum ut xbʼaanuhomebʼ li bʼalaqʼil paabʼal?

• Kʼaru naxkʼoxla li Jehobʼa chirixebʼ li bʼalaqʼil paabʼal?

• Kʼaru teʼxkʼul ebʼ li bʼalaqʼil paabʼal saʼ ruqʼ li Yos?

SIKʼ XKOMON LI NAʼLEBʼ

Kʼe reetal wiibʼ li naʼlebʼ li nekeʼxbʼaanu ebʼ li bʼalaqʼil paabʼal li inkʼaʼ nawulak chiru li Yos.

«Ma chixjunilebʼ li paabʼal nokooʼeʼxtenqʼa chi nachʼok chixkʼatq li Yos?» (Li naʼlebʼ re jw.org)

Kʼaʼut naraj li Yos naq tqaloqʼoni ru saʼ komonil?

«Ma aajel ru naq tootzʼaqonq saʼ junaq li paabʼal?» (Li naʼlebʼ re jw.org)

Jun laj kʼamolbʼe saʼ li paabʼal kiwiibʼank xchʼool chirix li xpaabʼal. Abʼan aʼin inkʼaʼ kiramok chiru xnawbʼal li yaal chirix li Yos.

«Jun aj kʼamolbʼe rehebʼ laj katoolk kixkanabʼ li xʼiklees» (Ajsi aawu!, febrero 2015)

Chiru naabʼal siʼeent chihabʼ ebʼ li paabʼal yookebʼ xkʼutbʼal li tikʼtiʼ chirix li Yos, aʼin naxbʼaanu naq ebʼ li kristiʼaan teʼxkʼoxla naq inkʼaʼ naxkʼe xchʼool chiqix ut naq nokooxrahobʼtesi. Tzol bʼar chalenaq oxibʼ rehebʼ li tikʼtiʼ aʼin.

«Ebʼ li tikʼtiʼ li nokooxnajtobʼresi rikʼin li Yos» (Laj Kʼaakʼalehom, 1 re noviembre 2013)