Kʼaʼut naq numtajenaq li rahilal ut li maaʼusilal?

Naq nakʼulmank junaq li rahilal naabʼalebʼ li qas qiitzʼin nekeʼxye: «Kʼaʼut kikʼulmank aʼin?». Kʼajoʼ nasahoʼk saʼ qachʼool xnawbʼal naq li Santil Hu naxsume li patzʼom aʼin.

1. Kʼaru kixbʼaanu laj Tza re naq tmaaʼusoʼq li ruuchichʼochʼ?

Laj Tza kixqʼet ribʼ chiru li Yos. Kiraj jolomink saʼ xbʼeenebʼ li qas qiitzʼin joʼkan naq kixbʼaanu naq laj Adán ut li xʼEva teʼxqʼet ajwiʼ ribʼ chiru li Yos. Kixbʼaanu aʼin naq kixtikʼtiʼi li xʼEva (Génesis 3:1-5). Kixye re naq maaʼus xchʼool li Jehobʼa xbʼaan naq yook xmuqbʼal jun li naʼlebʼ chiru. Li muqmukil aatin li wank chirix li kixye laj Tza aʼan naq sahaqebʼ saʼ xchʼool li kristiʼaan wi teʼxqʼet ribʼ chiru li Yos. Laj Tza kixye li xbʼeen tikʼtiʼ naq kixye re li xʼEva naq inkʼaʼ tkamq. Li Santil Hu naxye naq laj Tza aʼan «aj tikʼtiʼ ut xyuwaʼil li tikʼtiʼ» (Juan 8:44).

2. Kʼaru xeʼxbʼaanu laj Adán ut li xʼEva?

Kʼajoʼ xchaabʼilal li Jehobʼa rikʼin laj Adán ut li xʼEva. Kixye rehebʼ naq naru nekeʼxlow chixjunil li ru li cheʼ li wank saʼ Edén abʼan jun ajwiʼ ru li cheʼ inkʼaʼ naru nekeʼxchʼeʼ (Génesis 2:15-17). Usta joʼkan xeʼxlow li maawaʼ rehebʼ. Li xʼEva «kixchʼoq bʼiʼ jun ru li cheʼ, kixlow ut kixkʼe re li xbʼeelom; ut aʼan ajwiʼ kixlow» (Génesis 3:6). Chi joʼkan saʼ kabʼichal xeʼxqʼet ribʼ chiru li Yos. Saʼ xkʼabʼaʼ naq laj Adán ut li xʼEva tzʼaqal re ru xyuʼamebʼ, ak re raj naq teʼabʼinq chiru li Yos. Naq xeʼxqʼet ribʼ chiru li Yos inkʼaʼ xeʼxkʼulubʼa naq aʼan t-awabʼejinq rehebʼ. Li xeʼxbʼaanu kixkʼam chaq naabʼal li rahilal saʼ xbʼeenebʼ (Génesis 3:16-19).

3. Kʼaru naqakʼul saʼ xkʼabʼaʼ li xeʼxbʼaanu laj Adán ut li xʼEva?

Naq xeʼmaakobʼk laj Adán ut li xʼEva moko tzʼaqal ta chik re ru li xyuʼamebʼ ut joʼkanebʼ ajwiʼ li ralal xkʼajol. Joʼkan naq li Santil Hu naxye aʼin chirix laj Adán: «Xbʼaan jun chi winq kiʼok chaq li maak saʼ ruuchichʼochʼ, ut xbʼaan li maak kichalk li kamk. Joʼkan naq li kamk kichalk saʼ xbʼeenebʼ chixjunil li poyanam» (Romanos 5:12).

Joʼkan naq, kʼaʼut naqakʼul li rahilal? Wank sut xbʼaan naq moko naqakʼoxla ta chiʼus li naqabʼaanu malaj saʼ xkʼabʼaʼ li nekeʼxbʼaanu li junchʼol. Wank sut ajwiʼ naqakʼul li rahilal saʼ li hoonal malaj saʼ li naʼaj li maajunwa naqakʼoxla (yaabʼasi Eclesiastés 9:12).

QASIKʼAQ XCHAMAL LI NAʼLEBʼ

4. Li nakʼamok chaq re li rahilal

Naabʼal li qas qiitzʼin nekeʼxpaabʼ naq li Yos najolomink re li ruuchichʼochʼ. Ma yaal aʼin? Cheerilaq li BʼIDEO.

BʼIDEO: Ani najolomink re li ruuchichʼochʼ? (1:24)

Cheeyaabʼasi Santiago 1:13 ut 1 Juan 5:19 ut chexʼaatinaq chirix li patzʼom aʼin:

• Ma li Yos wank re naq wank li rahilal ut li maaʼusilal?

5. Chanru wank li ruuchichʼochʼ rubʼel xʼawabʼejilal laj Tza

BʼIDEO: Kʼaʼut naq li Yos inkʼaʼ narisi li rahilal? (moko chixjunil ta) (3:07)

Cheeyaabʼasi Génesis 3:1-6 ut chexʼaatinaq chirix ebʼ li patzʼom aʼin:

• Kʼaru li tikʼtiʼ kixye laj Tza re li xʼEva? (Teeril ebʼ li raqal 4 ut 5).

• Kʼaru kixye laj Tza naq yook xmuqbʼal li Jehobʼa chiruhebʼ li poyanam?

• Kʼaru naxye laj Tza, ma aajel ru naq li Jehobʼa t-awabʼejinq saʼ qabʼeen re naq sahaq saʼ qachʼool?

Cheeyaabʼasi Eclesiastés 8:9 ut chexʼaatinaq chirix li patzʼom aʼin:

• Chanru wank li ruuchichʼochʼ chalen naq li Jehobʼa inkʼaʼ chik najolomink re?

1. Laj Adán ut li xʼEva xeʼwank saʼ li naʼajej Edén ut tzʼaqal re ru xyuʼamebʼ. Abʼan xeʼabʼink chiru laj Tza ut xeʼxqʼet ribʼ chiru li Jehobʼa.

2. Chalen naq xeʼxqʼet ribʼ li rahilal, li maak ut li kamk kinumtaak saʼ ruuchichʼochʼ.

3. Chi seebʼ li Jehobʼa tixsach li rahilal, li maak ut li kamk. Ut chiqajunilo naru toowanq saʼ jun li chʼinaʼusil naʼajej saʼ Ruuchichʼochʼ ut tzʼaqalaq chik re ru qayuʼam.

6. Narahoʼk xchʼool li Jehobʼa naq naqakʼul li rahilal

Ma narahoʼk tawiʼ xchʼool li Yos naq naril naq wanko saʼ rahilal? Kʼe reetal li kixye li awabʼej David ut li apóstol Pedro. Cheeyaabʼasi Salmo 31:8 ut 1 Pedro 5:7 ut chexʼaatinaq chirix li patzʼom aʼin:

• Kʼaru nakaawekʼa naq li Jehobʼa naxnaw li qachʼaʼajkilal ut narahoʼk xchʼool naq naril li qarahilal?

LI AK XQATZOL

Saʼ xmaak laj Tza, laj Adán ut li xʼEva wank li rahilal saʼ ruuchichʼochʼ. Chi seebʼ li Jehobʼa trisi li rahilal xbʼaan naq ra narekʼa naq naril naq naqakʼul li rahilal.

Qajultikaq

• Kʼaru li tikʼtiʼ kixye laj Tza re li xʼEva?

• Chanru xooxkʼe saʼ chʼaʼajkilal li xeʼxbʼaanu laj Adán ut li xʼEva?

• Kʼaʼut naqaye naq narahoʼk saʼ xchʼool li Jehobʼa naq naqakʼul li rahilal?

SIKʼ XKOMON LI NAʼLEBʼ

Tzol li naxchʼolobʼ li Santil Hu chirix li maak.

«Kʼaru li maak?» (Li naʼlebʼ re jw.org)

Tzol xkomon aanaʼlebʼ chirix li chʼaʼajkilal li kixyoobʼ laj Tza saʼ Edén.

«Kʼaʼut naq li Yos inkʼaʼ narisi li rahilal?» (Laj Kʼaakʼalehom, 1 re enero 2014)

Tzʼil rix chanru truuq xkʼojobʼankil aachʼool xtawbʼal xsumenkil li xnimal ru patzʼom aʼin.

«Kʼaʼut kiwank li rahobʼtesink ut li kamsink saʼ li xkabʼ nimla yalok u? Kʼaʼut li Yos inkʼaʼ kixkolebʼ?» (Li naʼlebʼ re jw.org)

Kʼe reetal kʼaru kixtzol jun li winq rikʼin li rahilal li naril.

Moko wankin ta chik injunes (5:09)