TZOLOM 27
Chanru nokooxkol li xkamik li Jesús?
Laj Adán ut li xʼEva keʼxqʼet ribʼ chiru li Jehobʼa, joʼkan naq laaʼo naqakʼul li rahilal, nokoomaakobʼk ut nokookamk.a Abʼan li Jehobʼa moko xooxkanabʼ ta chi joʼkan, kixtaqla chaq li Jesukriist, li Ralal, re naq tooxkol chiru li maak ut li kamk. Li Santil Hu naxkʼut naq li Jesús kixqʼaxtesi li xyuʼam li tzʼaqal re ru re qakolbʼal. Xkolbʼal xyuʼam junaq li kristiʼaan naraj xyeebʼal xtojbʼal rix li xyuʼam (yaabʼasi Mateo 20:28). Li Jesús chi anchal xchʼool kixqʼaxtesi li xyuʼam re naq laaʼo tqataw wiʼ chik chixjunil li keʼxsach laj Adán ut li xʼEva. Ut chi joʼkan li Jehobʼa ut li Jesús keʼxkʼut naq qʼaxal nokooʼeʼxra. Li tzolom aʼin tatxtenqʼa re naq oxloqʼaq chaawu li xkamik li Jesús.
1. Chanru nokooxtenqʼa anaqwan li xkamik li Jesús?
Xbʼaan naq laaʼo aj maak naqabʼaanu naabʼal li naʼlebʼ li inkʼaʼ nawulak chiru li Jehobʼa. Abʼan naru nokoowank wiʼ chik saʼ amiiwil rikʼin li Jehobʼa wi naqapatzʼ xkuybʼal qamaak saʼ xkʼabʼaʼ li Jesús, wi naqayotʼ qachʼool ut inkʼaʼ chik naqabʼaanu li maaʼusilal (1 Juan 2:1). Li Santil Hu naxye: «Li Kriist, jun wa ajwiʼ kikamk re xtojbʼal rix li maak, li tiik xchʼool chirixebʼ li inkʼaʼ tiikebʼ xchʼool, re qakʼambʼal rikʼin li Yos» (1 Pedro 3:18).
2. Chanru tooxtenqʼa li xkamik li Jesús saʼ li kutan chalk re?
Li Santil Hu naxye naq li Yos kixkʼe li Ralal «re naq chixjunil li taapaabʼanq re, inkʼaʼ taasachq, wanq bʼan xyuʼam chi junelik» (Juan 3:16). Saʼ xkʼabʼaʼ li xkamik li Jesús chi seebʼ li Jehobʼa trisi chixjunil li rahilal li kixkʼam chaq li qʼetok ibʼ. Aʼin naraj xyeebʼal naq wi chi anchal qachʼool naqapaabʼ li xkamik li Jesús twanq qayuʼam chi junelik saʼ li chʼinaʼusil naʼajej arin saʼ Ruuchichʼochʼ (Isaías 65:21-23).
QASIKʼAQ XCHAMAL LI NAʼLEBʼ
Qatzolaq xkomon li naʼlebʼ chirix kʼaʼut naq li Jesús kixkʼe li xyuʼam saʼ qakʼabʼaʼ ut li rusilal li naqataw.
3. Li xkamik li Jesús nokooxkol chiru li maak ut li kamk
Cheerilaq li BʼIDEO ut chexʼaatinaq chirix li patzʼom aʼin:
Kʼaru kixtzʼeq laj Adán saʼ xkʼabʼaʼ naq kixqʼet ribʼ chiru li Yos?
Cheeyaabʼasi Romanos 5:12 ut chexʼaatinaq chirix li patzʼom aʼin:
Kʼaru li rahilal nakaakʼul saʼ xmaak laj Adán?
Cheeyaabʼasi Juan 3:16 ut chexʼaatinaq chirix li patzʼom aʼin:
Kʼaʼut naq li Jehobʼa kixtaqla chaq li Ralal saʼ Ruuchichʼochʼ?
Laj Adán tzʼaqal re ru li xyuʼam, saʼ xkʼabʼaʼ naq kixqʼet ribʼ chiru li Jehobʼa kixtenebʼ li maak ut li kamk saʼ qabʼeen.
Li Jesús tzʼaqal re ru li xyuʼam, saʼ xkʼabʼaʼ naq kiʼabʼink chiru li Jehobʼa kixkʼe wiʼ chik qe li junelik yuʼam.
4. Chiqajunilo naru naqataw rusilal li xkamik li Jesús
Cheerilaq li BʼIDEO ut chexʼaatinaq chirix li patzʼom aʼin:
Kʼaru rusilal nekeʼxtaw ebʼ li kristiʼaan rikʼin li xkamik jun li winq?
Cheeyaabʼasi 1 Timoteo 2:5, 6 ut chexʼaatinaq chirix li patzʼom aʼin:
Laj Adán tzʼaqal re ru li xyuʼam, saʼ xkʼabʼaʼ naq kixqʼet ribʼ chiqajunilo nokoomaakobʼk ut nokookamk. Joʼ laj Adán, li Jesús ajwiʼ tzʼaqal re ru li xyuʼam, abʼanan kʼaru kiruuk xbʼaanunkil li Jesús?
5. Li xkamik li Jesús aʼan jun li maatan li naxkʼe aawe li Jehobʼa
Ebʼ li ramiiw li Jehobʼa nekeʼril li xkamik li Jesús joʼ jun li maatan li kʼebʼil chaq choʼq rehebʼ. Qilaq jun eetalil, cheeyaabʼasi Gálatas 2:20 ut chexʼaatinaq chirix li patzʼom aʼin:
Kʼaru kixye li apóstol Pablo re xkʼutbʼesinkil naq li xkamik li Jesús aʼan jun li maatan li kʼebʼil choʼq re?
Naq laj Adán kimaakobʼk kixtenebʼ li kamk saʼ xbʼeenebʼ li ralal xkʼajol, abʼanan li Jehobʼa kixtaqla chaq li Ralal re naq tkamq saʼ aakʼabʼaʼ ut taataw li junelik yuʼam.
Naq taayaabʼasi ebʼ li raqal kʼoxla rix chanru kirekʼa ribʼ li Jehobʼa naq kiril naq kirahobʼtesiik li Ralal. Cheeyaabʼasi Juan 19:1-7 ut 16-18 ut chexʼaatinaq chirix li patzʼom aʼin:
Kʼaru nakaawekʼa chirix li keʼxbʼaanu li Jehobʼa ut li Jesús choʼq aawe?
WIIBʼ OXIBʼ NEKEʼXPATZʼ: «Chanru nekeʼkoleʼk naabʼalebʼ li kristiʼaan rikʼin li xkamik jun ajwiʼ chi winq?».
Kʼaru raj taasume?
LI AK XQATZOL
Saʼ xkʼabʼaʼ li xkamik li Jesús li Jehobʼa naru naxkuy qamaak ut naru naqataw li junelik yuʼam.
Qajultikaq
Kʼaʼut kikamk li Jesús?
Kʼaru kiruuk xbʼaanunkil li Jesús saʼ xkʼabʼaʼ naq tzʼaqal re ru li xyuʼam?
Kʼaru rusilal naru nakaataw saʼ xkʼabʼaʼ li xkamik li Jesús?
SIKʼ XKOMON LI NAʼLEBʼ
Tzol chanru nokooxkol li xyuʼam li Jesús.
«Chanru nokooxkol li xkamik li Jesús?» (Li naʼlebʼ re jw.org)
Tzol kʼaru tento tqabʼaanu re naq tookoleʼq.
Ma naxkuyebʼ tawiʼ xmaak li Jehobʼa ebʼ li kristiʼaan li nekeʼxbʼaanu li nimla maak?
«Li Santil Hu naxsume ebʼ li patzʼom» (Laj Kʼaakʼalehom, 1 re mayo 2013)
Xtzolbʼal xyaalal li xkamik li Jesús kitenqʼank re jun li winq chi xjalbʼal xnaʼlebʼ. Chaawil resil xyuʼam.
«Li raaxiikʼ inkʼaʼ chik nataqlank saʼ inbʼeen» (Li naʼlebʼ re jw.org)
a Li maak moko kaʼaj tawiʼ naq naqabʼaanu junaq li maaʼusilal, aʼan ajwiʼ li qʼetok ibʼ li xqechani rikʼin laj Adán ut li xʼEva.