Naq nachalk jun li nimla yajel

«Naq xeʼxye we naq wank li cancer saʼ linpospoʼoy ut saʼ linkʼamkʼot, chanchan tawiʼ xeʼxtenebʼ kamk saʼ inbʼeen. Abʼan, naq xinwulak saʼ wochoch, xinkʼoxla: “Moko aʼan ta li yookin roybʼeninkil, abʼan tinsikʼ chanru tinkuy xnumsinkil”» (xLinda, 71 chihabʼ wank re).

«Wank jun linyajel saʼ xnaqʼ wu saʼ lintzʼe li kʼajoʼ xrahil. Wank sut inkʼaʼ ninkuy xrahil toj reetal nachʼinaak inchʼool. Naabʼal sut xwekʼa naq wankin injunes ut xinkʼoxla xkamsinkil wibʼ» (xʼElise, 49 chihabʼ wank re).

Jun li winq li inkʼaʼ naru chi bʼeek wankebʼ li xkomon chixkʼatq

WI LAAʼAT malaj jun rehebʼ laakomon wank junaq laayajel li naru tatxkamsi, ak nakaanaw naq jwal chʼaʼaj aʼin. Li chʼaʼajkilal maawaʼ kaʼajwiʼ li yajel, trisi ajwiʼ xtuqtuukilal aachʼool. Tnimanq laaxiw ut laakʼaʼuxl saʼ xkʼabʼaʼ naq kokʼaj xsaʼ tatxik rikʼin laj bʼanonel, chʼaʼajkaq xtawbʼal li xbʼanol malaj li xtuminal ut li chʼaʼajkilal li naxkʼam chaq li bʼan. Li kʼaʼuxej li naxkʼam chaq junaq li nimla yajel jwal tatxlubʼtesi.

Kʼaru truuq aatenqʼankil saʼ li hoonal aʼin? Li kʼaru tzʼaqal kikʼojobʼank re xchʼoolebʼ naabʼal li poyanam aʼan li tijok ut rilbʼal li xraqal li Santil Hu li nawaklesink chʼool. Jun chik li naʼlebʼ li nakʼojobʼank re xchʼoolebʼ aʼan naq nekeʼraheʼk ut nekeʼtenqʼaak xbʼaanebʼ li xkomon ut ebʼ li ramiiw.

KʼARU KEʼXBʼAANU WIIBʼ OXIBʼ LI POYANAM

Laj Robert, jun li winq li wank 58 chihabʼ re, naxye: «Re naq tatruuq xkuybʼal laayajel, kʼojobʼ aachʼool rikʼin li Yos, ut aʼan tatxtenqʼa. Tijon chiru li Jehobʼa ut ye re li nakaawekʼa. Tzʼaama re li xsantil musiqʼej ut naq tatxtenqʼa re naq kawaq aachʼool xbʼaan laajunkabʼal ut chi xkuybʼal laayajel chi kʼojkʼooq aachʼool».

Laj Robert naxye ajwiʼ: «Jwal aajel ru naq laajunkabʼal tixkawresi aachʼool ut wanq aawikʼin. Rajlal kutan, nikinxbʼoq jun rehebʼ linkomon re xnawbʼal chanru wankin. Nekeʼxkawresi ajwiʼ inchʼool li wamiiw li wankebʼ saʼ jalan chik naʼajej. Aʼin kixbʼaanu naq sa twekʼa wibʼ ut kinxtenqʼa re naq tinruuq xkuybʼal aʼin».

Ma wank junaq laawamiiw yaj ut taawaj rulaʼaninkil? Kʼe reetal li naxye xLinda: «Li yaj naraj wank joʼ li junchʼol ut maare moko junelik ta traj aatinak chirix li xyajel. Joʼkan naq, aatinanqex chirix li nakʼulmank rajlal kutan».

Li tenqʼ li naxkʼe li Yos, li kawil chʼoolej li naxkʼe li Santil Hu ut li rahok li nekeʼxkʼutbʼesi li qajunkabʼal ut ebʼ li qamiiw truuq aatenqʼankil chi rilbʼal naq toj wank rusilal laayuʼam usta wank junaq laanimla yajel.

Li xraqal li Santil Hu li truuq aatenqʼankil

Sikʼ li xtenqʼ li Yos

«Xinpatzʼok re li Qaawaʼ, ut aʼan xinxsume chaq: xinrisi saʼ chixjunil li xiw xiw wankin wiʼ. Naq li nebʼaʼ naxyaabʼa li xkʼabʼaʼ, naʼabʼiik xbʼaan» (Salmo 34:5, 7).

Li xLinda naxye: «Inkʼaʼ ninpatzʼ re li Yos naq tinxkʼirtasi. Nintzʼaama naq tixkʼe xkawilal inchʼool ut tinxtenqʼa chi xkuybʼal linyajel».

Kawresi aachʼool rikʼin rilbʼal xsaʼ li Santil Hu

«Maajun chik saʼ qayanq tixye: “Yajin”» (Isaias 33:24).

Kʼoxla rix li tixbʼaanu li Yos saʼ li kutan chalkebʼ re. Aʼin tixkawresi aachʼool chirix laawoybʼenihom ut tatxtenqʼa chi xkuybʼal.

Sikʼ aatenqʼ rikʼin laajunkabʼal ut ebʼ laawamiiw

«Li tzʼaqal amiiw junelik narahok; saʼ xqʼehil junaq rahilal tatxtenqʼa joʼ junaq tzʼaqal asbʼej» (Proverbios 17:17).

Li xʼElise naxye: «Matwank aajunes. Kanabʼ naq ebʼ laawamiiw tateʼxtenqʼa. Wank sut taawekʼa naq wankat aajunes ut taakʼoxla naq li Yos inkʼaʼ yook aawabʼinkil, abʼan matwank aajunes».