Li chaq’al ru yeechi’om cho’q re li kutan chalk re

Ma nakaapaab’ naq t-usaaq chixjunil sa’ li kutan chalk re? Usta yooko xk’ulb’al eb’ li nimla ch’a’ajkilal, naqayal qaq’e chi xk’oxlankil naq sa’ jun kutan t-usaaq chixjunil. Ab’an, ma naru naqoyb’eni naq t-usaaq chixjunil? Naru. Li Santil Hu naxk’e qe jun chaq’al ru yeechi’om cho’q re li kutan chalk re.

K’aru naxyeechi’i li Santil Hu?

Li Santil Hu ink’a’ naxmuq naq te’wanq xch’a’ajkilal eb’ li qas qiitz’in, ab’an naxye naq eb’ li ch’a’ajkilal a’in moko junelik ta twanq. Qilaq wiib’ oxib’ reheb’ a’in.

Li ch’a’ajkilal: maak’a’eb’ rochoch

Li naxye li Santil Hu: «Te’kab’laq ut te’wanq chisa’» (Isaías 65:21, Li Santil Hu, Sociedad Bíblica de Guatemala, SBG).

Li tk’ulmanq: Chixjunileb’ li poyanam wanqeb’ chik rochoch.
Li ch’a’ajkilal: maak’a’eb’ xk’anjel ut neb’a’eb’

Li naxye li Santil Hu: «Li sik’b’ileb’ ru inb’aan te’xyal xsahil li xk’anjeleb’» (Isaías 65:22, SBG).

Li tk’ulmanq: Chixjunileb’ li qas qiitz’in te’xyal xsahil li xk’anjeleb’ ut twulaq chiruheb’.
Li ch’a’ajkilal: maak’a’ li tiikilal

Li naxye li Santil Hu: «Eb’ laj k’amol b’e te’raqoq aatin» sa’ tiikilal (Isaías 32:1, SBG).

Li tk’ulmanq: Chixjunileb’ te’oxloq’iiq, maak’a’aq chik li neb’a’il ut maa’ani chik ttz’eqtaanaaq a’ yaal ma wank malaj maak’a’ xtumin malaj jalan raatinob’aal.
Li ch’a’ajkilal: li we’ej ut li yajel li naxk’am chaq xmaak’a’il li tzekemq

Li naxye li Santil Hu: «Numtajenaqaq li awimq sa’ ruuchich’och’, heetanqeb’ sa’ xb’eeneb’ li loq’laj tzuul» (Salmo 72:16, SBG).

Li tk’ulmanq: Twanq naab’al li tzekemq cho’q re chixjunileb’. Maa’ani taaxik chi wark chi ink’a’ ta twa’aq, chi moko tyajerq xb’aan li we’ej.
Li ch’a’ajkilal: li raaxiik’ ut li maa’usilal

Li naxye li Santil Hu: «Li junjunq taahilanq sa’ xmu li rochoch sa’ tuqtuukilal, chi maak’a’aq xxiw» (Miqueas 4:4, SBG).

Li tk’ulmanq: Maa’ani chik txuwaq xb’aan naq maak’a’aqeb’ chik li maa’useb’ xna’leb’, ut «li tiikeb’ xch’ool te’rechani li chaab’il na’ajej» malaj li ruuchich’och’ (Salmo 37:10, 29, SBG).
Li ch’a’ajkilal: eb’ li yalok u

Li naxye li Santil Hu: «Eb’ li tenamit ink’a’ chik te’yaloq chirib’ileb’ rib’ chi moko te’xkawresi rib’ re yalok» (Isaías 2:4, SBG).

Li tk’ulmanq: Wanq li tuqtuukilal sa’ chixjunil li ruuchich’och’ (Salmo 72:7). Maa’ani chik tixk’ul li rahilal xb’aan li yalok u chi moko t-eleliq chi moko tixyaab’a li xkamenaq.
Li ch’a’ajkilal: eb’ li yajel

Li naxye li Santil Hu: «Maajun chik sa’ qayanq tixye: “Yajin”» (Isaías 33:24, SBG).

Li tk’ulmanq: Chixjunileb’ li qas qiitz’in tz’aqalaqeb’ chik re ru li xjunxaqalil ut maa’ani chik tyajerq (Isaías 35:5, 6). Li Santil Hu naxye ajwi’ naq «maak’a’aq chik li kamk» (Apocalipsis 21:4).
Li ch’a’ajkilal: li nasachok re li qasutam

Li naxye li Santil Hu: «Sahoqeb’ li chaqich’och’ ut li joxk’ na’ajej! Chisaho’q li junesal na’ajej ut chinujaq chi uutz’u’uj» (Isaías 35:1, SBG).

Li tk’ulmanq: Ch’ina’usaq chik chixjunil li ruuchich’och’ ut aran te’wanq eb’ li qas qiitz’in jo’ chanru kiraj li Yos chalen sa’ xtiklajik (Génesis 2:15; Isaías 45:18).

Jwal chaab’il li naxye li Santil Hu, ab’an ma paab’ajel tawi’?

Ak re, naq jo’kan taak’oxla. Ab’an k’a’ut ink’a’ nakaatz’il rix b’ayaq li naxye li Santil Hu chirix li kutan chalk re? Li naxyeechi’i li Santil Hu moko junaqik ta rik’in li neke’xyeechi’i ut li neke’xk’oxla eb’ li poyanam. Li wank sa’ li Santil Hu chalenaq rik’in li Yos. Ut k’a’ut naq a’in naxb’aanu naq wanq xjalanil? Qilaq wiib’ xyaalil:

Naru tqak’ojob’ qach’ool rik’in li Yos. Li Santil Hu naxye naq «li Yos inkʼaʼ naru natikʼtiʼik» (Tito1:2). Ut ka’ajwi’ a’an naxye li tk’ulmanq moqon (Isaías 46:10). Sa’ li Santil Hu wank naab’al li eetalil li naxk’utb’esi naq li naxye chaq li Yos, junelik natz’aqlok ru. Wi nakaawaj xnawb’al xkomon li na’leb’, taawil li b’ideo Chanru naqanaw naq yaal chixjunil li wank sa’ li Santil Hu?
Li Yos naru naxsach li qach’a’ajkilal. Li Santil Hu naxye naq li Yos wank xwankil re xb’aanunkil «jo’nimal li nawulak chiru» (Salmo 135:5, 6, SBG). A’in naraj xyeeb’al naq maak’a’ naru naramok chiru li Yos xb’aanunkil li rajom. Naraj b’an qatenq’ankil xb’aan naq nokooxra (Juan 3:16).

Yaal, ab’an maare taak’oxla, «Wi li Yos naraj qatenq’ankil ut naru xb’aanunkil, k’a’ut toj wank naab’al qach’a’ajkilal?». Wi nakaawaj xnawb’al li xsumenkil li patz’om a’in, taawil li b’ideo K’a’ut naq li Yos ink’a’ narisi li rahilal?

Chanru ttz’aqloq ru li naxyeechi’i li Santil Hu?

Li Yos tixb’aanu li naxyeechi’i sa’ xk’ab’a’ li X’awab’ejilal li wank sa’ choxa. Kixxaqab’ li Jesukriist cho’q awab’ej sa’ li Awab’ejilal a’in ut kixk’e xwankil re naq tril li Ruuchich’och’ ut li wankeb’ chisa’. Naq li Jesús kiwank sa’ Ruuchich’och’ kixk’irtasi eb’ li yaj, kixk’eheb’ chi wa’ak li te’tz’okaaq, kixq’us li kawil iq’ ut li palaw, ut kixwaklesi chi yo’yo wiib’ oxib’ li qas qiitz’in (Marcos 4:39; 6:41-44; Lucas 4:40; Juan 11:43, 44). A’in yal jun eetalil li naxk’utb’esi li tixb’aanu naq wanq jo’ Awab’ej sa’ X’awab’ejilal li Yos.

Wi nakaawaj xnawb’al k’aru chik tixb’aanu chaawix li X’awab’ejilal li Yos, taawil li b’ideo K’aru tz’aqal li Xnimajwal Awab’ejilal li Yos?

Joq’e ttz’aqloq ru li naxyeechi’i li Santil Hu?

Chi seeb’ ttz’aqloq ru! Ut k’a’ut ch’olch’o chiqu naq tk’ulmanq a’in? Xb’aan naq li Santil Hu kixye rub’elaj naq twanq wiib’ oxib’ li na’leb’ li tixk’utb’esi naq li X’awab’ejilal li Yos chi seeb’ t-oq chi jolomink sa’ Ruuchich’och’ (Lucas 21:10, 11). Anaqwan chiqajunilo yooko rilb’al naq yook chi tz’aqlok ru li kixye chaq li Santil Hu.

Wi nakaawaj xnawb’al xkomon chirix a’in, taawil li tasal hu «Joq’e tixjolomi li Ruuchich’och’ li X’awab’ejilal li Yos?».

Chanru tatxtenq’a anaqwan li naxyeechi’i li Santil Hu?

Jun reheb’ li xe’tz’iib’ank re li Santil Hu kixye naq li oyb’enihom li naxk’e li Santil Hu chanchan «jun li ankla cho’q re li qayu’am» (Hebreos 6:19). Jo’ chanru naq jun li ankla naxtenq’a li jukub’ naq yook li kawil iq’, li oyb’enihom cho’q re li kutan chalk re naru nakatxtenq’a chi xq’axb’al li rahilal li nakaak’ul sa’ laayu’am. Ut li oyb’enihom li naxk’e li Santil Hu tooxtenq’a re naq sahaq qach’ool, ink’a’ t-oq qak’a’uxl ut kawaqo (1 Tesalonicenses 5:8).