JUNELIK AJʼAJAQ QU!
Li xkʼanjel li paabʼal saʼ li yalok u li wank Ucrania | Kʼaru naxye li Santil Hu?
Kʼe reetal li naʼlebʼ li tojeʼ xʼisimank chirix li nekeʼxye ebʼ li xninqal ru aj kʼamolbʼe saʼ li paabʼal chirix li yalok u aran Ucrania.
«Laj Kirill li nakʼamok bʼe saʼ li Iklees ortodoxa re li tenamit Rusia, maakʼaʼ naxye chirix li yook xbʼaanunkil li tenamit Rusia […]. Li Xʼiklees yook xyeebʼal naabʼal li tikʼtiʼ chirix li tenamit Ucrania ut laj Putin yook roksinkil aʼin re xkolbʼal rix li yalok u» (EUobserver, 7 re marzo 2022).
«Laj Kirill […] kixye naq li yalok u rikʼin li tenamit Ucrania aʼan jun li naʼlebʼ li yook chi bʼaanumank re xsachbʼal li maak. Rikʼin li kixye yook xkʼutbʼesinkil naq naxkol rix li xtenamit» (AP News, 8 re marzo 2022).
«Laj Epifanio I re Kiev li nakʼamok bʼe saʼ li Iklees ortodoxa re li tenamit Ucrania, saʼ li lunes kirosobʼtesi li tenamit ut kixkawresihebʼ re naq teʼxik chi yalok rikʼinebʼ laj Rusia. Kixye ajwiʼ naq moko nimla maak ta xkamsinkilebʼ laj puubʼ re li tenamit Rusia» (The Jerusalem Post, 16 re marzo 2022).
«Laaʼo naqatenqʼahebʼ laj puubʼ re li tenamit Ucrania ut chixjunilebʼ li nekeʼxkol rix li qatenamit. Naqosobʼtesi li nekeʼxbʼaanu re xkolbʼal rix li tenamit Ucrania ut nokootijok chirixebʼ» (Li nekeʼxye ebʼ li chʼuut re li iklees ut ebʼ li molam re li paabʼal aran Ucrania,a 24 re febrero 2022).
Kʼaru nakaaye chirix aʼin? Ma us naq ebʼ li Iklees li nekeʼxye naq nekeʼxtaqe li Kriist nekeʼxkawresi ebʼ li nekeʼtzʼaqonk rikʼinebʼ re xik chi yalok? Kʼaru naxye li Santil Hu chirix aʼin?
Li xnaʼlebʼ li paabʼal saʼ li yalok u
Rikʼin li ak xkʼulmank naxkʼutbʼesi naq wiibʼ oxibʼ li Iklees li nekeʼxye naq nekeʼxsikʼ li tuqtuukilal nekeʼtenqʼank ut nekeʼtzʼaqonk saʼebʼ li yalok u. Chiru naabʼal chihabʼ ebʼ laj testiiw re li Jehobʼa nekeʼxkʼe chi naweʼk naq ebʼ li paabʼal ebʼ aj kaʼpakʼal u. Kʼe reetal li nayeemank saʼ wiibʼ oxibʼ rehebʼ li qatasal hu:
Li naʼlebʼ «Las cruzadas: “trágica ilusión”» naxchʼolobʼ naq li Iklees rehebʼ laj katoolk re Roma kiʼokenk chirix li kamsink li kibʼaanumank saʼ xkʼabʼaʼ li Yos ut li Kriist.
Li naʼlebʼ «Li Iklees Katoolk ut África» naxkʼut naq li paabʼal moko kiruuk ta xrambʼal li nimla kamsink li kiwank.
Saʼebʼ li naʼlebʼ «Ma wank xmaak li paabʼal?», «Li xkʼanjel li paabʼal saʼebʼ li yalok u» ut «Li paabʼal naʼokenk chirixebʼ» naxkʼutbʼesi chi tzʼaqal re ru naq ebʼ li nekeʼkʼamok bʼe saʼ li paabʼal rehebʼ laj katoolk, ortodoxo ut protestante xeʼokenk chi tenqʼank saʼebʼ li wiibʼ chi chʼuut aʼin.
Ma tento teʼokenq ebʼ li Iklees saʼebʼ li yalok u?
Li kixkʼut li Jesús: «Taara laawas aawiitzʼin joʼ naq nakara aawibʼ laaʼat» (Mateo 22:39, Li Santil Hu, Sociedad Bíblica de Guatemala, SBG). «Cherahaqebʼ li xikʼ nekeʼilok eere» (Mateo 5:44-47, SBG).
Kʼoxla aʼin: Wi jun li Iklees naxye naq naxpaabʼ li naxye li Jesús naq taara laawas aawiitzʼin, ma us raj tixbʼaanu naq tixwaklesi xchʼool ebʼ li nekeʼwulak saʼ li paabʼal re xik saʼ li yalok? Re naq taataw xsumenkil, chaawil li naʼlebʼ «Ebʼ li tzʼaqal aj paabʼanel ut li yalok u» ut «Ma tooruuq xraabʼalebʼ li xikʼ nekeʼilok qe?».
Li kixkʼut li Jesús: «Linʼawabʼejihom maawaʼ re li ruuchichʼochʼ aʼin. Wi ta re li ruuchichʼochʼ aʼin linʼawabʼejihom, xeʼyalok raj ebʼ laj kʼanjel chiwu re naq inkʼaʼ xinqʼaxtesiik» (Juan 18:36, SBG). «Chixjunilebʼ li teʼxchap xchʼiichʼ, chi chʼiichʼ ajwiʼ teʼosoʼq» (Mateo 26:47-52, SBG).
Kʼoxla aʼin: Wi li xeʼtaqenk re li Jesús inkʼaʼ xeʼxchap xchʼiichʼ chi moko re xkolbʼal rix, ma us raj naq teʼroksi li chʼiichʼ saʼ junaq chik li naʼlebʼ? Re xnawbʼal xkomon chirixebʼ li xbʼeen aj paabʼanel li xeʼxkʼam re rikʼin li Jesús ut xeʼxyuʼami li xkʼutum, chaawil li naʼlebʼ «Ma naxkʼam ribʼ li paabʼal rikʼin li yalok u?».
Kʼaru tkʼulmanq rikʼinebʼ li paabʼal li nekeʼokenk saʼebʼ li yalok u?
Li Santil Hu naxchʼolobʼ naq li Yos naxtzʼeqtaanahebʼ li paabʼal li nekeʼxye naq nekeʼxtaqe li xkʼutum li Jesús abʼan li xyaalalil naq moko nekeʼxbʼaanu ta (Mateo 7:21-23; Tito 1:16).
Li Yos naxye saʼ li hu Apocalipsis naq ebʼ li paabʼal wankebʼ re, naq keʼkamk «chixjunilebʼ li kilajeʼkamsiik saʼ ruuchichʼochʼ» (Apocalipsis 18:21, 24, SBG). Wi taawaj xnawbʼal kʼaʼut, chaawil li naʼlebʼ «Kʼaru li Nimla tenamit Babilonia?».
Li Jesús kixye naq li Yos tixsachebʼ chixjunilebʼ li paabʼal xbʼaan li yibʼru aj naʼlebʼ li xeʼxbʼaanu joʼ chanru «taayokʼmanq ut taakutmanq saʼ xam» jun li cheʼ li moko usta li ru naxkʼe (Mateo 7:15-20, SBG). Wi taawaj xnawbʼal chanru tkʼulmanq aʼin, chaawil li naʼlebʼ «Yook chi nachʼok xsachik ebʼ li bʼalaqʼil paabʼal!».
Photo credits, left to right: Photo by Sefa Karacan/Anadolu Agency/Getty Images; Maxym Marusenko/NurPhoto via Getty Images
a Saʼ li chʼuut aʼin nekeʼokenk 15 li Iklees, saʼ xyanqebʼ wank li Iklees ortodoxa, li Iklees katoolk re Roma, li Iklees katoolk re Grecia, ebʼ laj protestante ut ebʼ laj evangélico ut ebʼ li chʼuut rehebʼ laj judiiy ut ebʼ laj musulmán.