Qʼaxal tiq wiʼ chik ru li kutan saʼ chixjunil li Ruuchichʼochʼ | Kʼaru naxye li Santil Hu?

Chiru li po julio 2022 saʼ chixjunil li Ruuchichʼochʼ maajunwa xʼilmank naq qʼaxal tiq wiʼ chik ru li Ruuchichʼochʼ joʼ saʼebʼ li kutan aʼan:

• «Chiru li po aʼin ak wiibʼ sut keʼxye ebʼ li awabʼej re China rehebʼ li qas qiitzʼin naq kachʼin chik ma saʼ 70 li tenamit qʼaxal tiqaq wiʼ chik ru li kutan» (25 re julio 2022, CNN Wire Service).

• «Kachʼin chik ma saʼ chixjunil Europa yook chi kʼatk ebʼ li kʼicheʼ xbʼaan naq anaqwan qʼaxal tiq wiʼ chik ru li kutan» (17 re julio 2022, The Guardian).

• «Saʼ li kutan domingo saʼ naabʼal li tenamit re Estados Unidos xeʼrekʼa naq qʼaxal tiq wiʼ chik ru li kutan xbʼaan naq xseebʼank chi wulak li saqʼehil aran costa este, sur ut medio oeste» (24 re julio 2022, The New York Times).

Kʼaru naraj xyeebʼal aʼin? Ma twulaq li kutan naq inkʼaʼ chik tooruuq wank saʼ Ruuchichʼochʼ? Kʼaru naxye li Santil Hu?

Ma wank resil saʼ li Santil Hu naq tkʼulmanq aʼin?

Heeheʼ. Li xtiqwal li Ruuchichʼochʼ naʼokenk saʼ li naʼlebʼ li ak wank resil saʼ li Santil Hu. Jun eetalil, li Jesús ak kixye resil naq «xiwajelaq rilbʼal li taakʼulmanq» malaj «saʼ li choxa teʼwanjeʼq xninqalebʼ eetalil» (Lucas 21:11, Li Santil Hu, Sociedad Bíblica de Guatemala, SBG). Naq nekeʼril naq qʼaxal tiq wiʼ chik ru li kutan ebʼ li kristiʼaan nekeʼok xkʼaʼuxl chirix li nekeʼxbʼaanu ebʼ li junchʼol rikʼin li Ruuchichʼochʼ li tixbʼaanu naq inkʼaʼ chik tooruuq wank arin.

Ma maaʼani chik twanq saʼ Ruuchichʼochʼ?

Inkʼaʼ. Li Yos kixyiibʼ li Ruuchichʼochʼ re naq ebʼ li kristiʼaan junelik teʼwanq chisaʼ (Salmo 115:16; Eclesiastés 1:4). Aʼan inkʼaʼ tixkanabʼ naq ebʼ li kristiʼaan teʼxsach li Ruuchichʼochʼ naxye bʼan naq tixsachebʼ «ajwiʼ li nekeʼsachok re li ruuchichʼochʼ» (Apocalipsis 11:18, SBG).

Kʼe reetal wiibʼ li propesiiy li naxye li tixbʼaanu li Yos rikʼin li Ruuchichʼochʼ:

• «Sahoqebʼ li chaqichʼochʼ ut li joxkʼ naʼajej! Chisahoʼq li junesal naʼajej ut chinujaq chi uutzʼuʼuj» (Isaías 35:1, SBG). Li Yos inkʼaʼ tixkanabʼ naq li Ruuchichʼochʼ tsutqʼiiq joʼ jun chaqichʼochʼ bʼarwiʼ inkʼaʼ teʼruuq chi wank ebʼ li poyanam, tixyiibʼ bʼan li xeʼxpoʼ ebʼ li kristiʼaan.

• «Laaʼat nokolaawil li chʼochʼ ut nakatʼaqres: kʼajoʼ naq nakakʼe chi chaabʼiloʼk!» (Salmo 65:10, SBG). Rikʼin li rosobʼtesihom li Jehobʼa tchʼinaʼusoʼq li Ruuchichʼochʼ.

Re xnawbʼal chanru yook chi tzʼaqlok ru li propesiiy chirix chanru yook chi jalaak li qasutam, chaawil li naʼlebʼ «Kʼaru naxye li Santil Hu chirix naq yook chi jalaak li qasutam ut ebʼ li kutan chalk re?».

Re xnawbʼal kʼaru naxye li Santil Hu chirix chanru ttuqubʼaaq ru chixjunil li wank saʼ Ruuchichʼochʼ, chaawil li naʼlebʼ «Ani tkoloq re li Ruuchichʼochʼ?».