Eb’ li awab’ej neke’aatinak chirix li Armagedón | K’aru naxye li Santil Hu?

Sa’ li lunes eq’la 10 re octubre 2022, eb’ laj puub’ re Rusia xe’xkut eb’ li misil sa’ junqaq li tenamit re Ucrania, xb’aan li xninqal ru bomba li ke’xkut eb’ laj puub’ re Ucrania wiib’ kutan rub’elaj ut kixjuk’ jun li q’a li naxjunaji Crimea rik’in Rusia. Naq toj maaji’ nak’ulmank a’in, wiib’ oxib’ reheb’ li awab’ej ke’aatinak chirix li Armagedón.

• «Chalen chaq sa’ xkutankil li awab’ej re Estados Unidos, John F. Kennedy ut li ch’a’ajkilal rik’ineb’ li misil li kiwank aran Cuba, moko nach’ ta chaq wanqo sa’ li Armagedón jo’ anaqwan. [. . .] Nink’oxla naq roksinkil eb’ li xninqal ru bomba tooxk’am sa’ li Armagedón» (Joe Biden, awab’ej re Estados Unidos, 6 re octubre 2022).

• «Nink’ulub’a naq a’an a’in li Armagedón; ut naxk’e sa’ xiwxiwal chixjunil li Ruuchich’och’» (li kixye li awab’ej re Ucrania Volodímir Zelenski, naq kipatz’mank re k’aru tk’ulmanq xb’aan roksinkil li xninqal ru bomba; BBC News, 8 re octubre 2022).

Ma naru naq roksinkil li xninqal ru bomba tooxk’am sa’ li Armagedón? K’aru naxye li Santil Hu?

Ma sa’ xk’ab’a’ li xninqal ru bomba tchalq li Armagedón?

Ink’a’. Li aatin «Armagedón» junsut ajwi’ natawmank sa’ li Santil Hu, sa’ Apocalipsis 16:16. A’in moko naraj ta xyeeb’al naq eb’ li awab’ej te’yaloq rik’in jalan chik awab’ej, naraj b’an xyeeb’al naq li Yos tyaloq rik’in chixjunileb’ li awab’ej re li Ruuchich’och’ (Apocalipsis 16:14). Sa’ li Armagedón li Yos tixsacheb’ chixjunil li awab’ej (Daniel 2:44).

Re xtzolb’al xkomon li na’leb’ chirix li tk’ulmanq rik’in li Ruuchich’och’ sa’ li Armagedón, chaawil li na’leb’ «K’aru li Armagedón?»

Ma tsachmanq li Ruuchich’och’ ut eb’ li poyanam sa’ xk’ab’a’ jun li nimla yalok u?

Ink’a’. Maare eb’ li awab’ej te’roksi eb’ li xninqal ru bomba sa’ li kutan chalkeb’ re, ab’an li Yos moko tixkanab’ ta naq li Ruuchich’och’ tsachmanq. Li Santil Hu naxye:

• «Li ruuchich’och’ wank chi junelik» (Eclesiastés 1:4, Li Santil Hu, Sociedad Bíblica de Guatemala, SBG).

• «Ab’an li tiikeb’ xch’ool te’reechani li chaab’il na’ajej [“li Ruuchich’och’”, TNM], ut aran te’wanq junq’e junq’e kutan» (Salmo 37:29, SBG).

Ab’anan, eb’ li propesiiy li wank sa’ li Santil Hu ut li yook chi k’ulmank naxk’utb’esi chiqu naq wanko sa’ roso’jikeb’ li kutan (Mateo 24:3-7; 2 Timoteo 3:1-5). Re xnawb’al xkomon li na’leb’ chirix li kutan chalkeb’ re patz’ xtzolb’al li Santil Hu chi sib’il.