Li kawilal | K’aru tixb’aanu li X’awab’ejilal li Yos?

«Usta moko kaw ta chik li Covid-19 sa’ chixjunil li Ruuchich’och’, a’in moko naraj ta xyeeb’al naq maa’ani chik tyajerq xb’aan. […] Naq tchalq junaq chik li nimla yajel, ut cholch’o naq tchalq, tento naq kawresib’ilaqo» (Tedros Adhanom Ghebreyesus, director general de la Organización Mundial de la Salud, 22 re mayo 2023).

Naab’aleb’ li kristi’aan li xe’yajerk xb’aan li Covid-19 moko sa ta chik xe’kanaak sa’ li xjunxaqalil ut li xk’a’uxl. Ma kawresinb’ileb’ eb’ li awab’ej ut eb’ laj b’anonel naq tchalq junaq chik li nimla yajel? Ma te’ruuq xtuqub’ankil ru eb’ li yajel li yooko xnumsinkil anaqwan?

Li Santil Hu naxye naq «li xYos li choxa tixwaklesi chaq jun awab’ejihom» ut li Awab’ejilal a’in tixk’e xkawilal li qajunxaqalil (Daniel 2:44, Li Santil Hu, Sociedad Bíblica de Guatemala, SBG). Ut sa’ li Ruuchich’och’ «maajun chik sa’ qayanq tixye: “Yajin”» (Isaías 33:24, SBG). Maa’ani chik tyajerq ut kawaqeb’ chik jo’eb’ li saaj (Job 33:25).