Ma nachʼ wank li nimla pleet li twanq saʼ chixjunil li ruuchichʼochʼ? | Kʼaru naxye li Santil Hu?

Chiruhebʼ li 30 chihabʼ li ak xeʼnumeʼk naabʼalebʼ li kristiʼaan nekeʼxkʼoxla naq maakʼaʼ nachʼaʼajkink re li wanjik saʼ li ruuchichʼochʼ ut naq yook chi chaabʼiloʼk. Abʼan aʼin yook chi jalaak, joʼ naʼilmank saʼebʼ li esil:

«Rajlal yook qakʼaʼuxl xbʼaan naq li pleet re Gaza naru nanimank ru saʼ xkʼabʼaʼ li pleet li wank saʼ xyanqebʼ laj Israel ut ebʼ laj Hizbulá saʼ xnubʼalil li Líbano» (Reuters, 6 re enero 2024).
«Li tenamit Irán naxchiqʼ xjosqʼil ebʼ li tenamit li wankebʼ bʼarwiʼ naʼok li saqʼe. Li tenamit Rusia ut China nekeʼokenk chirix li tenamit Irán. Ebʼ laj puubʼ li wankebʼ rubʼel xwankil li tenamit Irán yookebʼ chi pleetik saʼ naabʼal li teep ut saʼ junpaat li tenamit aʼin kiʼok wiʼ chik xkawresinkil ribʼ rikʼin li xninqal ru xnaqʼ puubʼ» (The New York Times, 7 re enero 2024).
«Ebʼ laj puubʼ re Rusia yookebʼ xsachbʼal li tenamit Ucrania» (UN News, 11 re enero 2024).
«Li tenamit China yook chi bʼihomok ut naabʼal laj puubʼ yook xkawresinkil, ebʼ laj Taiwán inkʼaʼ nekeʼraj naq jalan chik ttaqlanq saʼ xbʼeenebʼ, wank li chʼaʼajkilal saʼ xyanq Pekín ut Washington, aʼin naru naxbʼaanu naq saʼ junpaat ttiklaaq li pleet» (The Japan Times, 9 re enero 2024).

Ma naʼaatinak li Santil Hu chirix li chʼaʼajkilal li naqil anaqwan saʼ chixjunil li ruuchichʼochʼ? Ma tixbʼaanu li chʼaʼajkilal aʼin naq twanq jun li nimla pleet saʼ chixjunil li ruuchichʼochʼ?

Li Santil Hu ak kixye chaq li yook chi kʼulmank

Li Santil Hu moko kixye ta rubʼelaj bʼar wank rehebʼ li nimla pleet re chixjunil ebʼ li pleet li yooko rilbʼal saʼebʼ li qakutan. Abʼanan, kixye chaq rubʼelaj li xkʼihalil ebʼ li pleet li yookebʼ «risinkil li tuqtuukilal saʼ xbʼeen li ruuchichʼochʼ» (Apocalipsis 6:4).

Saʼ li Santil Hu, laj Daniel kixtzʼiibʼa naq «saʼ rosoʼjikebʼ li kutan» li xninqal ru tenamit li xikʼ nekeʼril ribʼ, teʼoq chi pleetik malaj xyalbʼal xqʼe chirix li wankilal. Saʼ li yalok aʼin, teʼxkʼutbʼesi naq kawebʼ ribʼ chi pleetik ut teʼxsach naabʼal «li oor», malaj li tumin (Daniel 11:40, 42, 43, Li Santil Hu, Sociedad Bíblica de Guatemala).

Nachʼ wank jun li nimla pleet

Li Santil Hu naxye naq li chʼaʼajkilal li wank sa‘ chixjunil li ruuchichʼochʼ moko t-usaaq ta. Li Jesukriist kixye chaq: «Twanq jun li nimla rahilal. Chalen chaq saʼ xtiklajik li ruuchichʼochʼ toj saʼebʼ li kutan aʼin, maajunwa kiwank chaq jun nimla rahilal joʼ aʼin» (Mateo 24:21). «Li nimla rahilal» aʼin traqeʼq rikʼin li Armagedón, li Santil Hu naxye naq aʼan «li yalok li twanq saʼ xnimal xkutankil li Nimajwal Yos» (Apocalipsis 16:14, 16).

Li Armagedón moko tixsach ta ebʼ li kristiʼaan, tixkolebʼ bʼan. Rikʼin li nimla pleet aʼin, li Yos tixbʼaanu naq ebʼ li awabʼej teʼxkanabʼ jolomink xbʼaan naq aʼanebʼ wankebʼ re, naq wank naabʼal li nimla pleet li kʼajoʼ nasachok. Wi taawaj xnawbʼal chanru tixbʼaanu li Armagedón re xkʼambʼal chaq li tuqtuukilal chi junelik, taawil ebʼ li tzolom aʼin: