Bʼar wank xyaalal li yuʼam?

Li naxsume li Santil Hu

Nabʼaanumank jalan jalanq li patzʼom chirix li naʼlebʼ aʼin. Maare junaq tixye: «Kʼaʼut wanko arin?» malaj, «Ma wank xyaalal li yuʼam?». Li Santil Hu naxye naq li rajom li yuʼam aʼan wank choʼq ramiiw li Yos. Re xtawbʼal ru chiʼus aʼin qilaq wiibʼ oxibʼ li nimla naʼlebʼ li naxkʼut li Santil Hu.

• Li Yos aʼan kiyobʼtesink qe. Li Santil Hu naxye: «Aʼan kiyoobʼtesink qe ut reho ajwiʼ» (Salmo 100:3, Li Santil Hu, Sociedad Bíblica de Guatemala, SBG; Apocalipsis 4:11).

• Wank jun xyaalal kʼaʼut laj Yobʼtesinel kixbʼaanu chixjunil, joʼ ajwiʼ ebʼ li qas qiitzʼin (Isaías 45:18).

• Naq li Yos kixyobʼtesihebʼ li poyanam kixbʼaanu naq teʼxkʼe reetal naq «naʼajmank li Yos saʼebʼ li xyuʼam», joʼ ajwiʼ bʼar wank xyaalal li yuʼam (Mateo 5:3, La Biblia. Traducción del Nuevo Mundo, TNM, 2019 saʼ español). Li Yos naraj naq tqataw li naqarahi ru (Salmo 145:16).

• Naqataw li naqarahi ru chirix li Yos naq naqakʼe qaqʼe chi xnawbʼal ru ut wank choʼq ramiiw, ut yalaq ani naru natawok re. Joʼkan naq li Santil Hu naxye qe aʼin: «Jilonqex chi xkʼatq li Yos, ut aʼan taajiloq chekʼatq» (Santiago 4:8, SBG; 2:23).

• Re naq toowanq choʼq ramiiw li Yos, tento tqabʼeresi li qayuʼam joʼ kiraj naq kooxyobʼtesi chalen saʼ xtiklajik. Li Santil Hu naxye chi chʼolchʼo ru bʼar wank li rajom: «Xuwa ru li tzʼaqal Yos ut paabʼ li xtaql, xbʼaan naq aʼin chixjunil li tenebʼanbʼil saʼ xbʼeen li winq» (Eclesiastés 12:13, TNM).

• Saʼ li kutan chaalel, naq li Yos trisi li rahilal ut tixkʼe li junelik yuʼam re chixjunilebʼ li ramiiw, li inkʼaʼ nekeʼtzʼeqtaanank re, aran ttzʼaqloq ru li rajom choʼq rehebʼ li poyanam (Salmo 37:10, 11).