Ebʼ li bʼideo re li nimla chʼutam 2020 «Sahaq laachʼool!»

Ebʼ li bʼideo re li nimla chʼutam nawulak saʼ qachʼool ut nokooxtenqʼa chi xtawbʼal ru chiʼus li Santil Hu. Saʼ li nimla chʼutam 2020 «Sahaq laachʼool!» wank 114 ebʼ li bʼideo ut 43 li seeraqʼ xeʼxkʼe li Nekeʼjolomink re Xmolam li Jehobʼa ut li nekeʼtenqʼank rehebʼ. Ma xaapatzʼ junsutaq joʼkʼihal li kʼanjel ut li tumin naʼajmank re xyiibʼankil ebʼ li bʼideo aʼin?

Kachʼin chik ma 900 ebʼ li hermaan saʼ chixjunil li ruuchichʼochʼ keʼroksi li xhoonal ut li xseebʼalebʼ re xyiibʼankil li nimla chʼutam aʼin. Chiru li wiibʼ chihabʼ li kibʼaanumank li kʼanjel aʼin, keʼroksi kachʼin chik ma 100,000 li hoonal. Re li hoonal aʼin kiʼoksimank 70,000 re xyiibʼankil li kʼutbʼesink chirix li Santil Hu re 76 kʼasal li naxkʼabʼaʼi: Laj Nehemías: Li sahil chʼoolejil li naxkʼe li Jehobʼa nokooxkawresi.

Kiʼajmank naabʼal li tumin re rilbʼal ebʼ li keʼokenk chi tenqʼank, xyiibʼankil ebʼ li naʼaj ut xtawbʼal ebʼ li kʼanjelobʼaal ut li naʼajej re xbʼaanunkil li kʼanjel aʼin.

Laj Jared Gossman, li naxkʼanjela li xyaabʼ kuxej ut bʼideo, naxye: Li chʼuut li naril li natzolmank re li Nekeʼjolomink re Xmolam li Jehobʼa naraj naq t-ilmanq saʼebʼ li qabʼideo jalan jalanq li naʼajej, poyanam ut wanjik. Chi joʼkan nayalmank xsahil rilbʼal ebʼ li qahermaan saʼ chixjunil li ruuchichʼochʼ. Re xbʼaanunkil aʼin xʼajmank naq teʼkʼanjelaq saʼ komonil 24 ebʼ li chʼuut saʼ 11 chi tenamit. Xʼajmank ajwiʼ naabʼal li tumin ut xkʼubʼankil chiʼus.

Re xkʼubʼankil ebʼ li qabʼideo kiʼajmank ebʼ li kʼanjelobʼaal li qʼaxal chaabʼil ut li naʼajej li yiibʼanbʼil chiʼus. Jun eetalil, re xyiibʼankil li kʼutbʼesink chirix li Santil Hu Laj Nehemías: Li sahil chʼoolejil li naxkʼe li Jehobʼa nokooxkawresi, kikabʼlamank li naʼajej saʼ Mount Ebo li wank chixkʼatq Patterson (Nueva York). Re roksinkil chiʼus li tenqʼ tumin ut xbʼaanunkil joʼ kikʼubʼamank chaq, ebʼ li hermaan keʼxyiibʼ reetalil li xsuttzʼakil li tenamit Jerusalén rikʼin li kʼanjelobʼaal li moko chʼaʼaj ta xkʼubʼankil. Li junjunq waqibʼ meetr (20 pies) xteram ut kʼubʼanbʼil rikʼin tzʼalam cheʼ li moko al ta ut chanchan pek nakʼutunk. Ut naru rekʼasinkil re xkʼutbʼesinkil jalan jalanq li naʼajej, chi joʼkan moko kʼiik ta li naʼajej li kiʼajmank. Usta joʼkan, re xyiibʼankil chixjunil aʼin kiʼoksimank kachʼin chik ma 100,000 dólar.a

Xnawbʼal aʼin naxbʼaanu naq tqoxloqʼi chiʼus li nimla chʼutam re li chihabʼ aʼin. Chʼolchʼo chiqu naq chixjunil li kʼanjel aʼin tixkʼe xloqʼal li Jehobʼa saʼ chixjunil li ruuchichʼochʼ. Bʼanyox xbʼaan li tenqʼ tumin li nekeekʼe chi anchal eechʼool choʼq re li kʼanjel li nabʼaanumank saʼ chixjunil li ruuchichʼochʼ saʼ donate.jw.org ut jalan chik.