Li Rochoch li Jehobʼa

MA NAKAANAW kʼaru wank saʼ li eetalil? Aʼan Rochoch li Jehobʼa, bʼarwiʼ keʼxloqʼoni ru. Naq ebʼ laj Israel keʼelk chaq Egipto keʼok xyiibʼankil li ochoch aʼin ut keʼxbʼaanu chiru jun chihabʼ. Ma nakaanaw ani kiraj naq teʼxyiibʼ li ochoch?

Li Jehobʼa kitaqlank re xyiibʼankil li ochoch aʼin. Naq laj Moises wank chaq saʼ li tzuul Sinai, li Jehobʼa kixye re chanru teʼxyiibʼ li ochoch re naq ebʼ laj Israel teʼruuq xkʼambʼal chirixebʼ. Naq ebʼ laj Israel nekeʼxjal xnaʼaj moko chʼaʼaj ta chiruhebʼ naq nekeʼxyiibʼ wiʼ chik li Rochoch li Yos.

Saʼ li ochoch aʼin, wank xnaʼaj jun li kaax. Aʼan xkaaxil li sumwank. Saʼ xbʼeen li kaax wank wiibʼ li anjel yiibʼanbʼilebʼ rikʼin oor. Chisaʼ li kaax aʼin, wank li lajeebʼ chi chaqʼrabʼ li kixtzʼiibʼa wiʼ chik li Yos, xbʼaan naq laj Moises kixjor li wiibʼ chi perpookil pek li kikʼeheʼk re xbʼeenwa. Chisaʼ li kaax kixokmank ajwiʼ jun xaar li mana. Ma jultik aawe kʼaru li mana?

Li Jehobʼa kixsikʼ ru laj Aaron, li ras laj Moises, re naq twanq choʼq xyuwaʼil aj tij. Aʼan kikʼamok bʼe chiruhebʼ laj Israel re xloqʼoninkil li Jehobʼa. Ebʼ li ralal laj Aaron yookebʼ ajwiʼ chi kʼanjelak choʼq aj tij.

Saʼ li Rochoch li Yos wank jun li nimla naʼaj. Ma nakaawil naq aran ajwiʼ wank jun li kaax? Saʼ li kaax aʼin ebʼ laj tij nekeʼxkʼat li sununkil pom. Wank jun xnaʼaj kandeel wuqubʼ xxamlel. Joʼkan ajwiʼ wank jun li meex ut saʼ xbʼeen wank 12 chi kaxlan wa.

Saʼ xmuhebʼaal li Rochoch li Yos wank jun nimla naʼaj haʼ. Aran nekeʼxchʼaj ribʼ laj tij. Wank ajwiʼ jun nimla naʼaj re xmayejankil li xul. Ebʼ laj tij nekeʼmayejak chiru li Jehobʼa. Ebʼ laj Israel keʼxyiibʼ rochochebʼ chire li naʼaj aʼin. Joʼkan naq li Rochoch li Yos kikanaak saʼ xyihebʼ.