Li Kʼantiʼ re Chʼiichʼ

MA TZʼAQAL kʼantiʼ wank chiru li cheʼ? Inkʼaʼ, li kʼantiʼ aʼin re chʼiichʼ. Li Jehobʼa kixye re laj Moises naq tixkʼe li kʼantiʼ chiru cheʼ re naq ebʼ li qas qiitzʼin teʼril ut inkʼaʼ teʼkamq. Abʼan, ebʼ li kʼantiʼ li wankebʼ chiru chʼochʼ yoʼyookebʼ. Ma nakaanaw kʼaʼut naq ebʼ li kʼantiʼ aʼin keʼtiwok ut keʼkʼehok yajel?

Xbʼaan naq ebʼ laj Israel keʼxweechʼi li Yos ut keʼxweechʼi laj Moises. Keʼok xyeebʼal: ‹Kʼaʼut naq xooʼaawisi Egipto. Tookamq saʼ li chaqichʼochʼ aʼin? Maakʼaʼ qatzakahemq chi moko wank ta qahaʼ. Ut inkʼaʼ chik naqaj xwabʼal li mana›.

Li mana chaabʼil tzakahemq. Rikʼin li mana li Jehobʼa kixkʼutbʼesi chiru li xtenamit jun chik li sachbʼachʼoolej. Joʼkan ajwiʼ naq kixkʼehebʼ xhaʼ. Abʼan ebʼ laj Israel moko keʼroxloqʼi ta li kixkʼe li Jehobʼa rehebʼ. Joʼkan naq li Jehobʼa kixtaqla ebʼ li kʼantiʼ aʼin, re naq teʼtiweʼq ut teʼkamq.

Tojaʼ naq ebʼ laj Israel keʼxye re laj Moises: ‹Xoomaakobʼk chiru li Jehobʼa ut chaawu. Tijon chiqix re naq li Jehobʼa trisihebʼ li kʼantiʼ saʼ qayanq›.

Joʼkan naq laj Moises kitijok chirixebʼ. Li Jehobʼa kixye re laj Moises naq tixyiibʼ jun li kʼantiʼ re chʼiichʼ ut tixkʼe chiru cheʼ. Re naq li teʼtiweʼq teʼril li kʼantiʼ chiru li cheʼ ut teʼkʼiraaq. Laj Moises kixbʼaanu li kixye li Yos, joʼkan naq li keʼtiweʼk, keʼkʼiraak.

Kʼaru naqatzol chirix aʼin? Naqatzol naq chiqajunilo tiwbʼilo ajwiʼ joʼebʼ laj Israel. Xbʼaan naq laj Adan ut li xʼEva keʼxtzʼeqtaana li Jehobʼa. Joʼkan naq nokoocheekobʼk, nokooyajerk ut nokookamk. Abʼan li Jehobʼa naraj naq twanq qayuʼam chi junelik.

Li Jehobʼa kixtaqla li Ralal saʼ Ruuchichʼochʼ. Naabʼalebʼ inkʼaʼ keʼwulak chiru xkʼanjel li Jesus, joʼkan naq keʼxye naq maaʼus xnaʼlebʼ ut keʼxkʼe chiru cheʼ. Abʼan li Jehobʼa kixtaqla li Jesus re qakolbʼal. Wi tqabʼaanu li naxye qe li Jesus naru twanq qayuʼam chi junelik. Toj tqatzol chik xkomon li naʼlebʼ aʼin.