Ani li xJezabel?

NAQ kikamk li awabʼej Jeroboan, chixjunilebʼ li awabʼej li keʼjolomink rehebʼ li 10 chi teep maaʼusebʼ xnaʼlebʼ. Abʼan li awabʼej Acab, jwal yiibʼru xnaʼlebʼ. Ma nakaanaw kʼaʼut? Xbʼaan naq li xJezabel, li rixaqil, wank choʼq awabʼej ut maaʼus xnaʼlebʼ.

Li xJezabel moko aj Israel ta, aʼan xrabʼin li awabʼej re li tenamit Sidon. Li xJezabel naxloqʼoni li pechʼbʼil yos Bʼaal, kixbʼaanu naq li xbʼeelom ut naabʼalebʼ laj Israel teʼxloqʼoni ajwiʼ li yos aʼin. Li xJezabel xikʼ naril li Jehobʼa ut kixkamsi naabʼalebʼ laj kʼanjel chiru li Jehobʼa. Wankebʼ keʼxmuq ribʼ saʼebʼ li ochoch pek re naq inkʼaʼ teʼkamsiiq. Li xJezabel nakamsink, re xtawbʼal li naraj.

Saʼ jun kutan li xJezabel kiril naq laj Acab ra saʼ xchʼool. Tojaʼ naq kixpatzʼ re: ‹Kʼaʼut ra saʼ aachʼool?›

Laj Acab kixye re li rixaqil: ‹Xwaj raj xloqʼbʼal li xchʼochʼ laj Nabot, abʼan inkʼaʼ kiru xkʼeebʼal we›.

Li xJezabel kixye re li xbʼeelom: ‹Matkʼoxlak, laaʼin tinkʼe aawe li xchʼochʼ laj Nabot›.

Li xJezabel kixtaqlahebʼ xhu ebʼ li nekeʼjolomink saʼ li tenamit bʼarwiʼ wank laj Nabot. Ut kixye rehebʼ: ‹Taqlahomaq winq li maakʼaʼ nekeʼok wiʼ re naq teʼxye re li tenamit naq laj Nabot kixmaajewa li Yos ut li awabʼej. Chirix chik aʼan: Teerisi laj Nabot saʼ li tenamit ut teekʼe chi pek toj reetal teekamsi›.

Naq li xJezabel kirabʼi naq kikamk laj Nabot kixye re laj Acab: ‹Anaqwan aawe chik li xchʼochʼ laj Nabot›. Tento raj naq li xJezabel tixtoj li xmaak, xbʼaan naq kʼajoʼ xyiibʼal ru kixbʼaanu!

Joʼkan naq, li Jehobʼa kixtaqla laj Jehu re naq tixtoj xmaak li xJezabel. Naq li xJezabel kirabʼi naq yook chaq chi chalk laj Jehu, kixbʼon chiʼus li xnaqʼru re naq t-ileʼq naq chʼinaʼus naʼilok. Abʼan, naq laj Jehu kiril ru li xJezabel kixye rehebʼ li nekeʼkʼanjelak saʼ li rochoch li awabʼej: ‹Kutumaq li ixq saʼ li bʼentaan›. Ebʼ li winq keʼxbʼaanu li yeebʼilebʼ re, joʼ nakʼutunk saʼ li eetalil. Chi joʼkan kikamk li xJezabel.