Tzolom 11
Qatzʼeqtaanaq li bʼalaqʼil paabʼal
Laj Tza ut ebʼ li xmaaʼus aj musiqʼej inkʼaʼ nekeʼraj naq tookʼanjelaq chiru li Yos. Nekeʼraj risinkil chiru li Yos joʼkʼihalaq li poyanam teʼruhanq. Chanru nekeʼxbʼaanu aʼin? Jun rehebʼ li naʼlebʼ li nekeʼxbʼaanu wiʼ, aʼan rikʼin li bʼalaqʼil paabʼal (2 Corintios 11:13-15). Wi junaq paabʼal inkʼaʼ naxkʼut li yaal li wank saʼ li Santil Hu aʼan bʼalaqʼil paabʼal. Li bʼalaqʼil paabʼal aʼan joʼ li bʼalaqʼil tumin, mare nakʼutunk naq chaabʼil abʼan maakʼaʼ naʼok wiʼ. Naru tooxkʼe saʼ chʼaʼajkilal.
Li bʼalaqʼil paabʼal maajoʼqʼe tixsahobʼresi xchʼool li Jehobʼa, li xYosil li yaal. Naq li Jesus kiwank saʼ Ruuchichʼochʼ, ebʼ laj kʼamolbʼe saʼ paabʼal keʼraj xkamsinkil. Keʼxkʼoxla naq yookebʼ chi xloqʼoninkil li Yos chi tzʼaqal re ru. Keʼxye: «Jun ajwiʼ li qaYuwaʼ, aʼan li Yos». Ma kixkʼulubʼa li Jesus li aatin aʼin? Maajoʼqʼe. Kixye rehebʼ: «Laaʼex rehex leeyuwaʼ, aʼ laj tza» (Juan 8:41, 44). Saʼebʼ li kutan aʼin, naabʼalebʼ nekeʼxkʼoxla naq yookebʼ chi xloqʼoninkil li Yos abʼan yookebʼ chi xloqʼoninkil laj Tza ut ebʼ li maaʼus aj musiqʼej (1 Corintios 10:20).
Jun li qʼumet aj cheʼ moko us ta li ru naxkʼe ut li bʼalaqʼil paabʼal joʼkan ajwiʼ maaʼusebʼ xnaʼlebʼ naxkʼe. Li ruuchichʼochʼ xnumta saʼ chʼaʼajkilal xbʼaan li maaʼusilal li yookebʼ chi xbʼaanunkil li poyanam. Wankebʼ nekeʼmaakobʼk rikʼin ixq malaj rikʼin winq; wank li chʼeʼoj ibʼ, wank li elqʼak, wank li kaw taqlank, li kamsink ut wankebʼ ajwiʼ aj chapol ixq. Naabʼalebʼ li nekeʼxbʼaanu li maaʼusilal aʼin wankebʼ xpaabʼal abʼan li paabʼal aʼin moko nareekʼasihebʼ ta xchʼool chi xbʼaanunkil li chaabʼilal. Wi nekeʼraj wank choʼq ramiiw li Yos, tento naq teʼxkanabʼ xbʼaanunkil li maaʼusilal (Mateo 7:17, 18).
Li bʼalaqʼil paabʼal naxkʼut naq us tijok chiruhebʼ li pechʼbʼil yos. Li Yos naxye qe naq inkʼaʼ us tijok chiruhebʼ li pechʼbʼil yos. Yaal li aatin aʼin. Ma twulaq raj chiqu naq junaq li poyanam maajunwa t–aatinaq qikʼin abʼan t–aatinaq rikʼin li qajalam u? Ma naru tqaye naq qamiiw? Inkʼaʼ naru. Li Jehobʼa naraj naq tooʼaatinaq rikʼin ut inkʼaʼ chiruhebʼ li pechʼbʼil yos malaj chiruhebʼ li jalam u xbʼaan naq maakʼaʼebʼ xyuʼam (Éxodo 20:4, 5).
Li bʼalaqʼil paabʼal naxkʼut naq naru kamsink saʼ xqʼehil li yalok u. Li Jesus kixye naq ebʼ li ramiiw li Yos teʼxra ribʼ chiribʼilebʼ ribʼ. Laaʼo inkʼaʼ naqakamsihebʼ li poyanam li naqarahebʼ (Juan 13:35). Chi moko us ta naq tqakamsihebʼ li maaʼusebʼ xnaʼlebʼ. Naq keʼwulak li xikʼ keʼilok re li Jesus chi xchapbʼal, li Jesus moko kixkanabʼ ta naq ebʼ li xtzolom teʼyaloq re xkolbʼal xyuʼam (Mateo 26:51, 52).
Li bʼalaqʼil paabʼal naxkʼut naq li maaʼusebʼ xnaʼlebʼ teʼrahobʼtesiiq saʼ xbʼalbʼa. Abʼan li Santil Hu naxye naq li maak nakʼamok saʼ li kamk (Romanos 6:23). Li Jehobʼa aʼan xYosil li rahok, ma tixrahobʼtesi tawiʼ li poyanam chi junelik? Maajoʼqʼe tixbʼaanu aʼan. Saʼ li Sahilal Naʼajej jun ajwiʼ li paabʼal twanq ut aʼan li paabʼal li nawulak chiru li Jehobʼa (Apocalipsis 15:4). Chixjunil li paabʼal li wankebʼ rubʼel xwankil li xtikʼtiʼ laj Tza teʼosoʼq.