Li Nekeʼkʼamok Bʼe chi Xpuktesinkil li Chaabʼil Esilal

Ebʼ laj puktesinel aʼin nekeʼkʼamok bʼe chi xpuktesinkil li chaabʼil esilal ut nekeʼxik bʼarwiʼ maajunwa rabʼihomebʼ chirix li Yos. Li Jesus kikʼamok ajwiʼ bʼe chi xbʼaanunkil li kʼanjel aʼin, ut re qakolbʼal chiru li maak ut li kamk (Mateo 20:28). Saʼebʼ li qakutan, li nekeʼxkʼam rehebʼ rikʼin li Jesus nekeʼxkʼe xhoonal chi xkʼutbʼal li yaal chiruhebʼ li nekeʼraj wank choʼq xtzolom li Jesus (Mateo 28:19, 20). Joʼkan naq wankebʼ ajwiʼ li nekeʼkʼamok bʼe chi xpuktesinkil li chaabʼil esilal.

Nekeʼxkʼe xhoonal chi xpuktesinkil li chaabʼil esilal.a Chixjunilebʼ laj Testiiw re li Jehobʼa nekeʼxpuktesi li chaabʼil esilal. Abʼan, wankebʼ laj puktesinel rajlal po nekeʼxbʼaanu 70 hoonal, jun waʼlebʼ ajwiʼ nekeʼkʼanjelak re xbʼaanunkil li hoonal aʼin. Wankebʼ ajwiʼ aj puktesinel rajlal po nekeʼxbʼaanu 130 hoonal malaj bʼayaq chik, ut taqlanbʼilebʼ bʼarwiʼ naʼajmank ruhebʼ. Li nekeʼkʼamok bʼe chi xpuktesinkil li chaabʼil esilal moko nekeʼxsikʼ ta li bʼihomal, xbʼaan naq chʼolchʼo chiruhebʼ naq li Jehobʼa ttenqʼanq rehebʼ (Mateo 6:31-33; 1 Timoteo 6:6-8). Ut ebʼ li inkʼaʼ nekeʼruuk xbʼaanunkil rajlal po maajun rehebʼ li hoonal aʼin, naq naxkʼe ribʼ chiruhebʼ naru nekeʼxbʼaanu 30 malaj 50 hoonal.

Jwal nekeʼxra li Yos ut ebʼ li qas qiitzʼin. Joʼ kixkʼul li Jesus, laaʼo ajwiʼ naqakʼe reetal naq ebʼ li poyanam ra wankebʼ xbʼaan naq inkʼaʼ nekeʼxnaw ru li Yos (Marcos 6:34). Abʼan li Santil Hu naru naxtenqʼahebʼ li qas qiitzʼin aʼin xbʼaan naq chisaʼ li Yos naxye naq tixkʼam chaq li osobʼtesink saʼ xbʼeen li Ruuchichʼochʼ. Ebʼ laj puktesinel aʼin nekeʼxra li qas qiitzʼin joʼkan naq nekeʼxkʼe xchʼool ut xhoonal re xtenqʼankilebʼ chi xnawbʼal ru li Yos (Mateo 22:39; 1 Tesalonicenses 2:8). Ut naq nekeʼxbʼaanu aʼin, nekeʼkawuuk li xpaabʼal, wankebʼ chixkʼatq li Yos ut nanumtaak xsahilebʼ xchʼool (Hechos 20:35).

• Chanru taachʼolobʼ li xkʼanjelebʼ li nekeʼkʼamok bʼe chi puktesink?

• Kʼaru naʼeekʼasink rehebʼ li nekeʼkʼamok bʼe chi puktesink?