TZOLOM 51
Chanru tqoksi li qaatin re xsahobʼresinkil xchʼool li Jehobʼa?
Naq li Jehobʼa xooxyobʼtesi kixkʼe qe jun li maatan: li aatinak. Ma wank xwankil chiru li Jehobʼa chanru naqoksi li maatan aʼin? Heeheʼ (yaabʼasi Santiago 1:26). Joʼkan bʼiʼ, chanru tqasahobʼresi xchʼool li Jehobʼa rikʼin li qaatin?
1. Chanru tooruuq roksinkil chiʼus li maatan li kixkʼe qe li Jehobʼa?
Li Santil Hu naxye qe: «Chekʼe xkawubʼ eechʼool ut chetenqʼa eeribʼ cheribʼil eeribʼ» (1 Tesalonicenses 5:11). Ma nakaanaw ru junaq li ra saʼ xchʼool? Kʼaru tatruuq xbʼaanunkil re naq sa trekʼa ribʼ? Ye re naq nakaara. Naru ajwiʼ nakaaye re wiibʼ oxibʼ li xchaabʼil naʼlebʼ. Ma nakaanaw junaq xraqal li Santil Hu li tatruuq roksinkil re xwaklesinkil xchʼool? Wank naabʼal xraqal li Santil Hu li tatruuq roksinkil. Abʼan jultikaq aawe, wi taawoksi chiʼus laawaatin naru nakaawaklesi xchʼool. Joʼkan bʼiʼ, junelik tat-aatinaq saʼ tuulanil ut saʼ xyaalal (Proverbios 15:1).
2. Kʼaru ebʼ li aatin inkʼaʼ raj tqaye?
Li Santil Hu naxye: «Miʼelk chi xtzʼuumal eere yibʼ aj aatin» (yaabʼasi Efesios 4:29). Aʼin naraj xyeebʼal naq inkʼaʼ naqoksi li tzʼaj aj aatin malaj naqakut chi aatin junaq li kristiʼaan re xtochʼbʼal xchʼool. Joʼkan ajwiʼ inkʼaʼ nokooyoobʼank aatin malaj nokooʼaatinak chirix xjolom li junchʼol (yaabʼasi Proverbios 16:28).
3. Kʼaru ttenqʼanq qe re naq junelik chaabʼilaq li qaatin?
Wank sut li naqaye naxkʼutbʼesi li naqakʼoxla ut li wank saʼ li qachʼool (Lucas 6:45). Joʼkan naq tento tqakʼaytesi qibʼ chi xkʼoxlankil ebʼ li naʼlebʼ «li maakʼaʼ reekʼ, kaʼloqʼ oxloqʼ, chixjunil li chaabʼil ut xkʼulubʼ nimaak ru» (Filipenses 4:8). Re xbʼaanunkil aʼin tento tqakʼe reetal anihebʼ li qamiiw, kʼaru naqabʼi ut naqil (Proverbios 13:20). Us raj naq tqakʼoxla xbʼeenwa li tqaye xbʼaan naq inkʼaʼ naqanaw kʼaru teʼrekʼa li junchʼol. Li Santil Hu naxye: «Wan li aatin ra nanaqk wiʼ joʼ naxset li qʼesnal chʼiichʼ; abʼan li raatin li wank xnaʼlebʼ, aʼan chanchan li chaabʼil bʼan» (Proverbios 12:18).
QASIKʼAQ XCHAMAL LI NAʼLEBʼ
Qilaq chanru tqasahobʼresi xchʼool li Jehobʼa rikʼin li tqaye ut tqawaklesi ajwiʼ xchʼool ebʼ li junchʼol.
4. Weent taabʼaanu rikʼin li nakaaye
Wank sut naqaye junaq li aatin ut moqon naqakʼoxla: inkʼaʼ peʼ raj xinye aʼan (Santiago 3:2). Cheeyaabʼasi Gálatas 5:22, 23 ut chexʼaatinaq chirix ebʼ li patzʼom aʼin:
Re naq weent taabʼaanu rikʼin li nakaaye ut chanru nakaaye, bʼar wank rehebʼ li naʼlebʼ aʼin taapatzʼ re li Jehobʼa? Chanru truuq aatenqʼankil aʼin?
Cheeyaabʼasi 1 Corintios 15:33, TNM, ut chexʼaatinaq chirix li patzʼom aʼin:
Chanru nekeʼokenk ebʼ laawamiiw ut li nakaawabʼi rikʼin chanru nakat-aatinak?
Kʼaru tatxchʼaʼajki malaj tatxtenqʼa re naq chaabʼilaq laawaatin?
Cheeyaabʼasi Eclesiastés 3:1, 7 ut chexʼaatinaq chirix li patzʼom aʼin:
Joqʼe raj us naq maakʼaʼ taaye malaj taasikʼ junaq chik li hoonal re aatinak?
5. Chaabʼil tat-aatinaq chirixebʼ li junchʼol
Kʼaru tqabʼaanu re naq maaʼani tqahobʼ malaj tqatochʼ xchʼool naq tooʼaatinaq? Cheerilaq li BʼIDEO ut chexʼaatinaq chirix ebʼ li patzʼom aʼin:
Kʼaʼut kiraj li hermaan xjalbʼal chanru naʼaatinak chirixebʼ li junchʼol?
Kʼaru kixbʼaanu?
Cheeyaabʼasi Eclesiastés 7:16 ut chexʼaatinaq chirix li patzʼom aʼin:
Kʼaʼut us raj naq tqakʼux ruʼuj qaqʼ naq tqaj aatinak chirix xjolom junaq li kristiʼaan?
Cheeyaabʼasi Eclesiastés 7:21, 22 ut chexʼaatinaq chirix ebʼ li patzʼom aʼin:
Ma naru nakateʼxtenqʼa ebʼ li raqal aʼin re naq inkʼaʼ tatpoʼq naq taawabʼi naq yookebʼ chi aatinak chirix laajolom? Kʼaʼut?
6. Aatinan saʼ tuulanil rikʼin laajunkabʼal
Li Jehobʼa naraj naq tooʼaatinaq rikʼin li qajunkabʼal saʼ xyaalal ut saʼ tuulanil. Cheerilaq li BʼIDEO ut chexʼaatinaq chirix li patzʼom aʼin:
Kʼaru taatenqʼanq aawe re naq saʼ xyaalal taawaatinahebʼ laajunkabʼal?
Cheeyaabʼasi Efesios 4:31, 32 ut chexʼaatinaq chirix li patzʼom aʼin:
Chan raj ru tooʼaatinaq rikʼin li qajunkabʼal re naq teʼrekʼa naq naqarahebʼ?
Li Jehobʼa kixye kʼaru narekʼa chirix li Jesús, li Ralal. Cheeyaabʼasi Mateo 17:5 ut chexʼaatinaq chirix li patzʼom aʼin:
Chanru taakʼam aawe rikʼin li Jehobʼa naq taawaatinahebʼ laajunkabʼal?
Sikʼ chanru taawaklesi xchʼool ebʼ li junchʼol.
WIIBʼ OXIBʼ NEKEʼXYE: «Ninye li nawaj, maakʼaʼ nawaj re kʼaru teʼxkʼoxla li junchʼol».
Ma joʼkan nakaakʼoxla? Kʼaʼut?
LI AK XQATZOL
Li naqaye naru naxtenqʼa malaj naxchʼina xchʼool junaq li kristiʼaan. Joʼkan naq weent tqabʼaanu rikʼin li naqaye, joqʼe naqaye ut chanru naqaye.
Qajultikaq
Chanru taawoksi laawaatin re xwaklesinkil xchʼool ebʼ li junchʼol?
Kʼaru ebʼ li aatin inkʼaʼ raj twoksi?
Kʼaru tooxtenqʼa re naq tooʼaatinaq saʼ xyaalal ut re naq li qaatin tixwaklesi xchʼool ebʼ li junchʼol?
SIKʼ XKOMON LI NAʼLEBʼ
Kʼaru tqabʼaanu re naq li tqaye twaklesinq chʼool?
Tzol kʼaru taatenqʼanq aawe re naq inkʼaʼ taaye ebʼ li yibʼru aj aatin.
«Kʼaru li chʼaʼajkilal taataw wi tathobʼoq?» (Li naʼlebʼ re jw.org)
Kʼaru tatruuq xbʼaanunkil re naq inkʼaʼ tat-aatinaq chirix xjolom li junchʼol?
Kʼe reetal chanru li Jehobʼa kixtenqʼa jun li winq re naq inkʼaʼ chik tixye ebʼ li tzʼaj aj aatin.
«Xinʼok xkʼoxlankil kʼaru yookin xbʼaanunkil rikʼin linyuʼam» (Laj Kʼaakʼalehom, 1 re agosto 2013)