QAYUʼAM JOʼ AJ PAABʼANEL
«Laj Pablo [...] kiyoxink chiru li Yos ut kikawuuk xchʼool»
Naq ebʼ li hermaan re li chʼuut re Roma keʼrabʼi naq yook chaq chi chalk laj Pablo, wankebʼ keʼxbʼeni tana 64 kilometros (40 millas) re xtawbʼal chaq. Kʼaru kirekʼa laj Pablo naq kiril naq jwal nekeʼxra? Naq kirilebʼ «kiyoxink chiru li Yos ut kikawuuk xchʼool» (Hch 28:15, SBG). Usta laj Pablo aʼan li naxwaklesihebʼ chaq xchʼool ebʼ li chʼuut, abʼan anaqwan aʼan li naʼajmank naq twaklesiiq xchʼool, xbʼaan naq wank chaq saʼ tzʼalam (2Co 13:10).
Saʼebʼ li qakutan, ebʼ li nekeʼulaʼanink chʼuut nekeʼwulak chi xkawresinkil xchʼool ebʼ li hermaan. Wank sut, joʼ naqakʼul chiqajunilo, lubʼlukebʼ ajwiʼ, yookebʼ xkʼaʼuxl malaj rahebʼ saʼ xchʼool. Kʼaru tooruuq xbʼaanunkil re naq tqakawresi xchʼool li naʼulaʼanink chʼuut ut li rixaqil, re naq chi joʼkan li ulaʼanink aʼin tkʼanjelaq re «xwaklesinkil qachʼool chiqibʼil qibʼ»? (Ro 1:11, 12, SBG).
Tzʼaqonq saʼebʼ li chʼutam re xik chi puktesink. Li cheekel winq li naʼulaʼanink chʼuut nasahoʼk saʼ xchʼool rilbʼal naq naqakʼe qachʼool chi tzʼaqonk saʼ li xamaan aʼin (1Te 1:2, 3; 2:20). Naru tqayal xkʼebʼal 30 malaj 50 hoonal saʼ li puktesink chiru li po aʼin. Ma naru tqakʼubʼ puktesink rikʼin li naʼulaʼanink chʼuut malaj li rixaqil, malaj re naq tooʼeʼrochbʼeni chi xkʼebʼal junaq li tzolom? Maakʼoxla naq tojaʼ xat-ok chi puktesink malaj inkʼaʼ nakaabʼaanu chiʼus, ebʼ aʼan nekeʼwulak chiru rochbʼeninkil chixjunilebʼ laj puktesinel saʼ li chʼuut.
Tookʼehoq chi anchal qachʼool. Ma naru tqakʼulebʼ re naq teʼkanaaq saʼ qochoch malaj xbʼoqbʼalebʼ chi waʼak? Rikʼin aʼin tooruuq xkʼutbʼesinkil naq naqarahebʼ. Joʼkan ajwiʼ, moko yookebʼ ta roybʼeninkil junaq li tzakahemq li chʼaʼaj xyiibʼankil (Lu 10:38-42).
Rabʼinkil li naʼlebʼ li nekeʼxkʼe ut xyuʼaminkil. Li naʼulaʼanink chʼuut nokooxtenqʼa rikʼin rahok re naq tookʼanjelaq chiʼus chiru li Jehobʼa. Maare wank sut kaw li naʼlebʼ li tixkʼe qe (1Co 5:1-5). Wi nokooʼabʼink ut naqabʼaanu chi anchal qachʼool, tixbʼaanu li xkʼanjel chi sa saʼ xchʼool (Heb 13:17).
Tqabʼanyoxi li xkʼanjelebʼ. Taaye re li cheekel winq li naʼulaʼanink chʼuut ut li rixaqil li rusilal li xaataw chirix li xeʼxbʼaanu chaawix. Naru taaye rehebʼ malaj rikʼin jun li esil hu (Col 3:15).