Eb’ li ch’a’ajkilal chirix li tumin | K’aru tixb’aanu li X’awab’ejilal li Yos?

Cho’q re naab’al li qas qiitz’in sa’ chixjunil li Ruuchich’och’ yook chi ch’a’ajko’k xtawb’al li tumin re xwenteninkil rib’eb’ ut a’in yook chi numtaak rajlal.

• Jun li esil li toje’ xk’emank,a naxye naq sa’ chixjunil li Ruuchich’och’ «moko k’iik ta chik neke’toje’k li kristi’aan rajlal po». Naxye ajwi’ naq wi inkʼaʼ natuqlaak ru li chʼaʼajkilal aʼin, tk’utunq chi’us li jalanil li wank sa’ xyanqeb’ li bʼihom ut eb’ li nebʼaʼ. Naabʼalebʼ li junkabʼal moko sa ta chik teʼwanq joʼ xeʼwank chaq junxil.

Ma teʼruuq ebʼ li awabʼej xtuqubʼankil ru li chʼaʼajkilal chirix li tumin malaj risinkil chi junajwa?

Li Santil Hu naxye naq wank jun li awabʼejihom li naru tixtuqubʼ ru chixjunil li chʼaʼajkilal chirix li tumin ut trisi ajwiʼ li jalanil li wank saʼ xyanqebʼ li nebʼaʼ ut li bʼihom. Naxye naq «li xYos li choxa tixwaklesi chaq jun awab’ejihom» li tixjolomi chixjunil li tbʼaanumanq saʼ Ruuchichʼochʼ (Daniel 2:44). Rubʼel li awabʼejihom aʼan maajun chik ttzʼeqtanaaq (Sal 9:18). Li X’awabʼejihom li Yos tixkʼe rehebʼ li kristiʼaan li naʼajmank saʼ xyuʼamebʼ re naq sahaqebʼ saʼ xchʼool. Chixjunilebʼ teʼxyal xsahil ru li xkʼanjelebʼ (Isaías 65:21, 22).