Kʼaʼut nekeʼxik chirekabʼlal ebʼ laj testiiw re li Jehobʼa?

Li Jesús kixkʼe li taql aʼin rehebʼ laj paabʼanel: «Kʼehomaqebʼ choʼq intzolom chixjunilebʼ li tenamit» (Mateo 28:19, 20, Li Santil Hu, Sociedad Bíblica de Guatemala, SBG). Naq kixtaqlahebʼ chi puktesink, kixye rehebʼ naq tento teʼxik saʼebʼ li rochoch li poyanam (Mateo 10:7, 11-13). Naq kamenaq chik li Jesús, ebʼ laj paabʼanel li xeʼwank chaq saʼ xkutankil ebʼ li apóstol inkʼaʼ keʼxkanabʼ xkʼebʼal li esil «chiruhebʼ li tenamit joʼ ajwiʼ chire kabʼlal» (Hechos 5:42; 20:20, SBG). Saʼebʼ li qakutan, naqakʼam qe rikʼinebʼ li xbʼeen aj paabʼanel ut qilom naq qʼaxal us naʼelk naq naqulaʼanihebʼ li qas qiitzʼin saʼebʼ li rochoch.