Tzol chiʼus li puktesink: Kanabʼ xtzolbʼal junaq li qas qiitzʼin wi inkʼaʼ naxyuʼami li naxtzol

KʼAʼUT US XBʼAANUNKIL. Ebʼ li qas qiitzʼin tento teʼxyaabʼa xkʼabʼaʼ li Jehobʼa re naq teʼkoleʼq (Ro 10:13, 14). Abʼan, moko chixjunilebʼ ta li yookebʼ xtzolbʼal li Santil Hu teʼraj xpaabʼankil li naʼlebʼ li naxkʼe li Jehobʼa. Joʼkan naq, re naq tqoksi chiʼus li qahoonal saʼ li xkʼanjel li Yos, tento tqakʼe qachʼool chirixebʼ li teʼraj tzʼaqal xjalbʼal xyuʼamebʼ re xsahobʼresinkil xchʼool li Jehobʼa. Wi junaq li qas qiitzʼin ak junxil naʼok xtzolbʼal li Santil Hu abʼan inkʼaʼ naraj xjalbʼal xyuʼam, us naq tqakanabʼ xtzolbʼal ut tqakʼe qachʼool chi xtenqʼankilebʼ li naxbʼoqebʼ chaq li Jehobʼa rikʼin ut saʼ li xmolam (Jn 6:44). Abʼanan, wi saʼ junaq kutan naxjal xnaʼlebʼ ut naxkʼutbʼesi naq naraj wank saʼ xyanqebʼ li teʼraj xtawbʼal li junelik yuʼam, tooruuq xkʼebʼal wiʼ chik xtzolbʼal (Hch 13:48, Traducción del Nuevo Mundo).

CHANRU XBʼAANUNKIL

• Waklesi xchʼool laatzolom xbʼaan naq naraj xnawbʼal li yaal li wank saʼ li Santil Hu (1Ti 2:4).

• Taajultika chiru naq aajel ru naq tixyuʼami li yook xtzolbʼal (Lu 6:46-49).

• Saʼ tuulanil taatzʼil rix rikʼin li jaljookil aatin chirix laj awinel ut taaye re, naq tixkʼoxla kʼaru naramok chiru xyuʼaminkil li naxtzol (Mt 13:18-23).

• Taachʼolobʼ chiru kʼaʼut inkʼaʼ chik taakʼe xtzolbʼal chirix li Santil Hu, abʼan maatochʼ xchʼool.

• Ye re naq wank sut taabʼoq malaj taawulaʼani ut naq truuq wiʼ chik xtzolbʼal li Santil Hu wi tixyuʼami li naxtzol.

NAQ AK XAAWIL LI BʼIDEO, TAASUME EBʼ LI PATZʼOM AʼIN:

• Chanru naxkʼutbʼesi naq inkʼaʼ yook chi kʼiik saʼ li xpaabʼal?

• Kʼaru kixbʼaanu laj puktesinel re xtenqʼankil chi xtawbʼal ru naq tento tixjal li xyuʼam?

• Chanru kixchʼolobʼ laj puktesinel naq truuq wiʼ chik xtzolbʼal li Santil Hu saʼ junaq kutan?