Qasikʼaq xkomon rusilal li tzolok saʼ junesal

KʼAʼUT US XBʼAANUNKIL. Xtzolbʼal qibʼ rikʼin li Raatin li Yos nokooxtenqʼa chi xtawbʼal ru chiʼus «chanru li xnimal ru, li xteram, li xnimal roq ut li xchamal» li yaal (Ef 3:18, SBG). Nokooxtenqʼa ajwiʼ re naq maakʼaʼaq qaqʼusbʼal ut saqaq ru li qachʼool chiru li xmaaʼusilal li ruuchichʼochʼ aʼin, ut re naq kaw chapchoqo rikʼin «li aatin nakʼehok yuʼam» (Flp 2:15, 16, SBG). Naq naqatzol li Raatin li Yos saʼ junesal tooruuq xsikʼbʼal chiʼus li naʼlebʼ li tqatzol joʼ chanru tkʼanjelaq chiqu. Chanru tooruuq roksinkil chiʼus li hoonal li naqoksi re rilbʼal ut xtzolbʼal li Santil Hu?

CHANRU XBʼAANUNKIL

• Tqajuchʼ wiibʼ oxibʼ li raqal ut tqatzʼiibʼa li xqatzol saʼ li Santil Hu li naqoksi re tzolok, maakʼaʼ naxye ma chi huhil malaj saʼ junaq li kʼanjelobʼaal.

• Tqasume saʼ qakʼaʼuxl ebʼ li patzʼom «ani», «kʼaru», «bʼar», «joqʼe», «chanru» ut «kʼaʼut» naq yooqo rilbʼal junaq li raqal.

• Tqachʼutubʼ chixjunil li naʼlebʼ li tqoksi. Tooruuq xsikʼbʼal chi tustu li naʼlebʼ malaj ebʼ li raqal saʼ li jalan jalanq chi kʼanjelobʼaal li naqoksi.

• Tqakʼoxla rix li naqatzol re rilbʼal chanru nokooxtenqʼa chiqajunqal.

• Tqayuʼami wulaj wulaj li naqatzol (Lu 6:47, 48).

NAQ AK XAAWIL LI BʼIDEO LI TZOLOK SAʼ JUNESAL NOKOOXTENQʼA XPAABʼANKIL LI RAATIN LI YOS, TAASUME EBʼ LI PATZʼOM AʼIN:

• Kʼaru nekeʼxkʼoxla wiibʼ oxibʼ li poyanam chirix li tzolok saʼ junesal?

• Kʼaʼut tento tootijoq xbʼeenwa naq ok qe chi tzolok?

• Kʼaru truuq qatenqʼankil chi xtawbʼal ru chiʼus junaq xraqal li Santil Hu?

• Kʼaru li eetalil naru tqakʼe saʼ li Santil Hu li naqoksi re tzolok?

• Kʼaʼut wank xwankil naq tqakʼoxla rix li yooqo xtzolbʼal saʼ li Raatin li Yos?

• Kʼaru tento tqabʼaanu rikʼin li naqatzol?