Chanru taataw rusilal ut twulaq chaawu xtzolbʼal li Santil Hu

Laj Josue naril jun li bʼotbʼilhu chirix li Chaqʼrabʼ; natʼaneʼk li xsuttzʼakil li tenamit Jerico ut li rochoch li xRahab inkʼaʼ natʼaneʼk; laj Josue naxtaqsi li ruqʼ saʼ choxa naq naʼok chi tijok

LAJ Josue tento tixnumsi jun li nimla chʼaʼajkilal: xkʼambʼal li tenamit Israel saʼ li chʼochʼ li yeechiʼinbʼil rehebʼ. Re naq truuq xbʼaanunkil aʼin tento tixqʼax ru ebʼ li nimla chʼaʼajkilal. Abʼan li Jehobʼa naxkanabʼ chi chʼolchʼo chiru naq t-elq chiʼus, ut naxye re, naq kawaq xchʼool ut mixuwak. Naxye ajwiʼ re, naq tixpaabʼ li Xchaqʼrabʼ ut tixyaabʼasi chi qʼeq ut chi kutan re naq truuq xbʼaanunkil chi tzʼaqal re ru li tzʼiibʼanbʼil aran. Ut naxjultika re, wi tixbʼaanu, us t-elq ut chaabʼil tnaʼlebʼaq (Jos. 1:7, 8).

Saʼebʼ li kutan aʼin li qʼaxal chʼaʼaj xnumsinkil, laaʼo tento tqanumsi ajwiʼ ebʼ li nimla chʼaʼajkilal (2 Tim. 3:1). Laaʼo tooʼelq ajwiʼ chiʼus wi naqabʼaanu li kixye chaq li Jehobʼa re laj Josue. Rilbʼal li Santil Hu wulaj wulaj tooxtenqʼa chi xyuʼaminkil li naʼlebʼ li wank chisaʼ naq teʼchalq ebʼ li chʼaʼajkilal saʼ qabʼeen.

Abʼanan, chʼolchʼo naq naabʼal qe inkʼaʼ naqanaw tzolok ut wank qe inkʼaʼ nawulak chiqu tzolok. Abʼan, saʼ xkʼabʼaʼ naq aajel ru xtzolbʼal li Santil Hu, us naq tqil wiʼ chik li naʼlebʼ re li tasal «Yal roksinkil aʼin». Aran taataw li chaabʼil naʼlebʼ re naq taataw rusilal ut twulaq chaawu xtzolbʼal li Santil Hu.

Jun laj Salmiist kixbʼicha: «Chinwanq taxaq joʼ naxye laachaqʼrabʼ, xbʼaan naq rikʼin aʼan nakʼojlaak li waanm» (Sal. 119:35). Laaʼat naru taataw ajwiʼ rusilal naq taatzol li Raatin li Yos. Taataw naabʼal li tertokil pek wi junelik yookat rilbʼal xsaʼ.

Usta yaal naq inkʼaʼ taabʼeresi junaq li tenamit, joʼ kixbʼaanu chaq laj Josue, chʼolchʼo naq taanumsi ebʼ li chʼaʼajkilal li tchalq saʼ aabʼeen. Joʼkan bʼiʼ, joʼ laj Josue, tzol chixjunil li tzʼiibʼanbʼil choʼq aawe re aatenqʼankil ut yuʼami. Wi taabʼaanu, us tat-elq ut chaabʼil tatnaʼlebʼaq.

YAL ROKSINKIL AʼIN

Tijon naq ok aawe chi tzolok. Saʼ li Santil Hu wank li xkʼaʼuxl li Nimajwal Yos, ut aʼan kixbʼaanu naq ttzʼiibʼamanq re qatenqʼankil. Joʼkan bʼiʼ, naq taawil li Santil Hu, taatzʼaama re li Yos naq tatxtenqʼa chi xtawbʼal ru, chi xjultikankil ut chi xyuʼaminkil li taatzol (Esd. 7:10).
Bʼaanu aawe ebʼ li patzʼom. Naq yooqat rilbʼal xsaʼ li Santil Hu malaj ebʼ li tasal hu, taabʼaanu aawe ebʼ li patzʼom aʼin: «Kʼaru naxkʼut chiwu chirix li Jehobʼa li xintzol anaqwan? Chanru naxchap ribʼ aʼin rikʼin xjolomil li naʼlebʼ li naxkʼut li Santil Hu? Chanru tinruuq roksinkil ebʼ li raqal aʼin re xtenqʼankilebʼ li junchʼol?».
Kʼoxla rix li taatzol. Naq yooqat rilbʼal li Santil Hu, kanabʼ bʼayaq ut kʼoxlan: «Chanru nawekʼa wibʼ rikʼin li naʼlebʼ aʼin? Kʼaʼut nawekʼa wibʼ chi joʼkaʼin? Chanru naxchap ribʼ rikʼin aʼin rikʼin li xinkʼul, rikʼin li yookin xkʼulbʼal ut rikʼin li tkʼulmanq? Chanru tinruuq xyuʼaminkil aʼin ut ebʼ li naʼlebʼ li wank saʼ li Santil Hu?» (Job 23:5; Sal. 49:4). Kʼoxla ma nakaanaw xchʼolobʼankil kʼaʼut li Jehobʼa naxkawresi xchʼool li xtenamit re xtzʼeqtaanankil junaq li naʼlebʼ ut kʼaru ebʼ li rahilal naru nachalk saʼ xbʼeen wi inkʼaʼ naʼabʼink chiru (Deut. 32:28, 29).
Oksi laakʼaʼuxl re rilbʼal chi kutankil li yook chi kʼulmank naq yooqat xyaabʼasinkil li Santil Hu. Jun eetalil, ma ak xaawoksi laakʼaʼuxl re rilbʼal chi kutankil naq ebʼ li ras laj Jose yookebʼ xkʼayinkil rikʼinebʼ laj Ismael? (Gen. 37:18-28). Kʼaru nakaawil? Kʼaru nakaawabʼi? Kʼaru li bʼook nakaawutzʼ? Yal xkʼebʼal aawibʼ saʼ xnaʼajebʼ li qas qiitzʼin aʼin ut bʼaanu aawe ebʼ li patzʼom: «Kʼaru yookebʼ xkʼoxlankil? Kʼaru nekeʼrekʼa?». Xkʼoxlankil li junjunq chi naʼlebʼ aʼin tixbʼaanu naq taawil chi kutankil li yookat xyaabʼasinkil, ut taataw rusilal li yookat xtzolbʼal.
Oksi ebʼ li kʼanjelobʼaal re tzolok li kʼubʼanbʼil re xsikʼbʼal xkomon li naʼlebʼ. Yal rilbʼal li wank saʼ laawaatinobʼaal, joʼ li wank saʼ Internet ut li wank chi huhil. Matkʼoxlak chi xpatzʼbʼal aatenqʼankil rehebʼ li junchʼol re naq taatzol roksinkil chiʼus. Jun eetalil, saʼ li hu Índice de las publicaciones Watch Tower ut saʼ Li hu li natenqʼank rehebʼ laj Testiiw re li Jehobʼa taataw jalan jalanq li naʼlebʼ ut wank ajwiʼ li xchʼolobʼankil naabʼal chik li raqal li Santil Hu. Joʼkan ajwiʼ, saʼ li hu Li tooxtenqʼa chi xtzolbʼal Raatin li Yos taataw li naʼlebʼ li ttenqʼanq aawe chirix li reetalil ebʼ li naʼaj, joqʼe xkʼulmank, li tumin ut li bʼisok, malaj jalan chik.
Tus ebʼ li tertokil pek. Aʼin tkʼanjelaq chaawu re xjultikankil li ak xaatzol. Kʼajoʼ xchaabʼilal wi taaseeraqʼi rehebʼ li junchʼol li xaatzol. Kʼoxla: «Ma naru nawoksi li naʼlebʼ aʼin saʼ li puktesink?». Ebʼ li naʼlebʼ aʼin tatxtenqʼa chi xjultikankil li tertokil pek li wank xwankil, ut tatruuq roksinkil li xaatzol re xtenqʼankilebʼ li junchʼol.