Chaawamiiwi li jalanebʼ chaawu
Li chʼaʼajkilal
Wi inkʼaʼ naqakʼam choʼq qamiiw li inkʼaʼ sa naqilebʼ, naru nakʼiik li tzʼeqtaanank li naqekʼa chirixebʼ. Ut, wi chixjunilebʼ li qamiiw kamaʼebʼ laaʼo, maare tooʼoq xkʼoxlankil naq kaʼajwiʼ laaʼo nokookʼoxlak chiʼus ut nokoonaʼlebʼak chi tzʼaqal re ru.
Li naʼlebʼ li naxkʼe li Santil Hu
«Tehomaq ajwiʼ [“chi xkaʼpakʼal ru”, TNM] leechʼool» (2 CORINTIOS 6:13).
Kʼaru naraj xyeebʼal? Li aatin chʼool aʼan li naqekʼa toj saʼ xchamal li qaanm. Wi kaʼajwiʼ naxkʼul qakikʼel li kamaʼebʼ laaʼo, yooqo xtzʼapbʼal li qachʼool. Re naq inkʼaʼ tqakʼul aʼin, tento tqakʼulubʼa choʼq qamiiw li jalanebʼ chiqu.
Chanru natenqʼank ramiiwinkilebʼ li jalanebʼ chiqu
Naq naqanaw ru chiʼus junaq li poyanam, naqataw ru kʼaʼut jalan naxbʼaanu junaq li naʼlebʼ. Ut naq naqajunaji qibʼ rikʼin, nokooʼok rilbʼal joʼ jun rehebʼ li qamiiw. Naqoxloqʼi, joʼkan ajwiʼ li xsahil xchʼool ut li xrahil xchʼool nokooʼok rilbʼal joʼ qe.
Qilaq li kixkʼul li xNazaré. Aʼan naxtzʼeqtaana li maakʼaʼebʼ xleseens chi wank saʼ li tenamit. Li xNazaré naxseeraqʼi qe li kitenqʼank re: «Xinkʼe inhoonal re wank rikʼinebʼ ut xinkʼanjelak rochbʼenebʼ. Moko yaal ta li xeʼxseeraqʼi we chirixebʼ li qas qiitzʼin aʼin. Naq taawamiiwi li jalanebʼ xtenamit, inkʼaʼ nakaawechʼihebʼ rix, nakaatzol xraabʼalebʼ ut roxloqʼinkilebʼ».
Li tatruuq xbʼaanunkil
Kʼe aahoonal re aatinak rikʼinebʼ li jalanebʼ xtenamit, xteep malaj raatinobʼaal. Us raj naq taabʼaanu aʼin.
Taaye rehebʼ naq teʼxseeraqʼi aawe chirixebʼ li xyuʼam.
Taabʼoqebʼ chi waʼak saʼ laawochoch.
Taakʼe aachʼool chi rabʼinkil li xyuʼamebʼ ut taapatzʼ kʼaru wank xwankil choʼq rehebʼ.
Wi nakaayal xtawbʼal ru li xeʼxkʼul chaq, taatawebʼ ru ut laakʼaʼuxl chirixebʼ tjalaaq.