11 Kaw chatkʼanjelaq

KʼARU NARAJ XYEEBʼAL?

Jun li kristiʼaan li kaw nakʼanjelak moko naʼelelik ta chiru li kʼanjel. Kʼajoʼ bʼan nawulak chiru kʼanjelak re xwenteninkil ribʼ ut xtenqʼankilebʼ li junchʼol, usta ebʼ li junchʼol inkʼaʼ nekeʼxkʼe reetal li kʼanjel li naxbʼaanu.

KʼAʼUT WANK XWANKIL?

Saʼ li qayuʼam tenebʼanbʼil xbʼaanunkil naabʼal li kʼanjel usta naqaj malaj inkʼaʼ. Saʼebʼ li qakutan wank xwankil kʼanjelak chi kaw xbʼaan naq wankebʼ naabʼal li kristiʼaan li inkʼaʼ nekeʼraj kʼanjelak (Eclesiastés 3:13).

«Naq kaw ninkʼanjelak sa nawekʼa wibʼ. Joʼkan naq kʼajoʼ nawulak chiwu kʼanjelak ut naq nakaakʼe aachʼool chi kʼanjelak chaabʼil nekeʼaatinak chaawix» (Reyon).

LI NAʼLEBʼ LI NAXKʼE LI SANTIL HU: «Us naʼelk li ani naxkʼe xchʼool chi kʼanjelak» (Proverbios 14:23).

KʼARU TATRUUQ XBʼAANUNKIL?

Qilaq wiibʼ oxibʼ li naʼlebʼ li tatxtenqʼa re naq twulaq chaawu kʼanjelak.

Bʼaanu chiʼus laakʼanjel. Kʼe aachʼool chi xbʼaanunkil chiʼus laakʼanjel, maakʼaʼ naxye ma saʼ laawochoch, saʼ li tzolebʼaal malaj saʼ laakʼanjel. Wi ak nakaanaw li yookat xbʼaanunkil sikʼ chanru xchaabʼilobʼresinkil ut xbʼaanunkil saʼ junpaat. Wi nakaabʼaanu chiʼus taataw xsahil laakʼanjel.

LI NAʼLEBʼ LI NAXKʼE LI SANTIL HU: «Li naxkʼe xchʼool saʼ li xkʼanjel, taakʼanjelaq chiruhebʼ awabʼej ut inkʼaʼ chiruhebʼ yalaq anihebʼ» (Proverbios 22:29).

Kʼoxla ebʼ li junchʼol. Ebʼ li junchʼol nekeʼxtaw rusilal naq nakaabʼaanu laakʼanjel. Jun eetalil, naq nakaabʼaanu li kʼanjel li tenebʼanbʼil saʼ aabʼeen saʼ laawochoch, moko jun ta ajwiʼ naxtaawasi ribʼ chi kʼanjelak.

LI NAʼLEBʼ LI NAXKʼE LI SANTIL HU: «Qʼaxal nim li sahil chʼoolejil wank saʼ li kʼehok chiru li wank saʼ li kʼuluk» (Hechos 20:35).

Kʼe xtzʼaqobʼ laakʼanjel. Ma bʼaanu kaʼajwiʼ li nekeʼxpatzʼ aawe. Chi joʼkan laaʼat tatbʼeresinq re laayuʼam. Naq nakaabʼaanu aʼin kaw nakatkʼanjelak abʼan maaʼani naminok aawu yal nakaawaj xbʼaanunkil (Mateo 5:41).

LI NAʼLEBʼ LI NAXKʼE LI SANTIL HU: «Inkʼaʼ minbʼilaq aawu chi xbʼaanunkil li usilal aʼin, chi anchalaq bʼan aachʼool» (Filemón 14).

Naʼlebʼan chiʼus. Xyeebʼal naq laaʼat aj kʼanjel moko naraj ta xyeebʼal naq taakamsi aawibʼ chi kʼanjelak. Tento wanq aahoonal re kʼanjelak joʼ ajwiʼ re hilank.

LI NAʼLEBʼ LI NAXKʼE LI SANTIL HU: «Abʼanan qʼaxal us li hilank junpaataq chiru li kawil kʼanjelak, xbʼaan naq aʼin chanchan li chapok iqʼ» (Eclesiastés 4:6).