Li oxloqʼink aʼan li semeent li naxbʼaanu naq wanqebʼ saʼ junajil li sumsukebʼ.
CHOʼQ REHEBʼ LI SUMSUKEBʼ
3 Li oxloqʼink
KʼARU NARAJ XYEEBʼAL?
Li sumsukebʼ li nekeʼroxloqʼi ribʼebʼ nekeʼxkʼe xchʼool chiribʼilebʼ ribʼ usta moko juntaqʼeet ta nekeʼkʼoxlaak. Li tasal hu Diez claves para transformar tu matrimonio naxye: «Ebʼ li sumal aʼin moko nekeʼpleetik ta chirix li nekeʼxkʼoxla. Nekeʼaatinak bʼan chirix li chʼaʼajkilal, nekeʼxkʼe xchʼool chi rabʼinkil li naxkʼoxla li junjunq ut nekeʼxtuqubʼ ru li chʼaʼajkilal».
LI NAʼLEBʼ LI NAXKʼE LI SANTIL HU: «Li rahok [...] inkʼaʼ naxsikʼ xchaabʼilal xjunes» (1 Corintios 13:4, 5).
«Roxloqʼinkil li wixaqil naraj xyeebʼal naq inkʼaʼ tinrahobʼtesi xchʼool malaj tinbʼaanu junaq li naʼlebʼ li tixjukʼ li qasumlajik» (Micah).
KʼAʼUT WANK XWANKIL?
Naq li sumsukebʼ inkʼaʼ nekeʼroxloqʼi ribʼebʼ nekeʼxkut ribʼ chi aatin malaj nekeʼxhobʼ ribʼebʼ. Li nekeʼxtzʼil rix aʼin nekeʼxye naq li naʼlebʼ aʼin naxkʼutbʼesi naq li sumal aʼin teʼxraq li xsumlajikebʼ.
«Wi nakaaye re laawixaqil li yibʼru aj aatin, nakaakut chi aatin malaj nakaaseʼe aʼan tixkʼoxla naq maakʼaʼ naʼok wi ut inkʼaʼ chik tixkʼojobʼ xchʼool aawikʼin» (Brian).
KʼARU TATRUUQ XBʼAANUNKIL?
KʼOXLA RIX AʼIN
Kʼoxla chanru xaawaatina laasumʼaatin chiru li xamaan li ak xnumeʼk. Moqon sume ebʼ li patzʼom aʼin:
Jarubʼ sut xinwechʼ rix linsumʼaatin ut jarubʼ sut xinkʼe xsahil xchʼool?
Chanru xinkʼutbʼesi naq oxloqʼ chiwu?
AATINAN RIKʼIN LAASUMʼAATIN
Kʼaru ebʼ li aatin ut li bʼaanuhom naxkʼutbʼesi naq naqoxloqʼi qibʼ?
Kʼaru ebʼ li aatin ut li bʼaanuhom naxkʼutbʼesi naq inkʼaʼ naqoxloqʼi qibʼ?
LI TATRUUQ XBʼAANUNKIL
Li junjunq xtzʼiibʼaq oxibʼ li naʼlebʼ bʼarwiʼ traj naq t-oxloqʼiq xbʼaan li xsumʼaatin. Moqon teekʼe leehu re leesumʼaatin ut cheeyalaq chi xyuʼaminkil li xeetzʼiibʼa.
Tzʼiibʼa xnaʼlebʼ laasumʼaatin li nawulak chaawu ut ye re naq oxloqʼ chaawu.
«Roxloqʼinkil linbʼeelom naraj xyeebʼal naq ninra ut naq nawaj naq sahaq saʼ xchʼool. Li oxloqʼink moko junelik ta nakʼutbʼesimank rikʼin xninqal ru bʼaanuhom, nakʼutbʼesimank bʼan rikʼin chixjunil li ninbʼaanu» (Megan).
Li wank xwankil aʼan naq laasumʼaatin tixkʼoxla naq nakaawoxloqʼi maawaʼ naq laaʼat nakaakʼoxla naq nakat-oxloqʼink.
LI NAʼLEBʼ LI NAXKʼE LI SANTIL HU: «Tiqibʼomaq bʼiʼ eeribʼ rikʼin xnimal uxtaanal, rikʼin li usilal, li tuulanil, kubʼenaqaq eewankil ut nimaq eekuyum» (Colosenses 3:12).