4 Li kuyuk maak

KʼARU NARAJ XYEEBʼAL?

Li kuyuk maak naraj xyeebʼal naq inkʼaʼ naqanimobʼresi li xeʼxbʼaanu qe ut inkʼaʼ naqaxok saʼ qachʼool. Abʼan aʼin moko naraj ta xyeebʼal naq inkʼaʼ tqakʼe xwankil li xeʼxye qe malaj tqaye naq maakʼaʼ xkʼulmank.

LI NAʼLEBʼ LI NAXKʼE LI SANTIL HU: «Chekuyaq eeribʼ cheribʼil eeribʼ ut, wi junaq wank kʼaru tixjit wiʼ li jun chik, chekʼam eeribʼ saʼ usilal» (Colosenses 3:13).

«Naq nakaara junaq li kristiʼaan inkʼaʼ nakaakʼe aachʼool chirix li xpaltil, nakaakʼe bʼan aachʼool chirix naq naxyal xqʼe chi xchaabʼilobʼresinkil xnaʼlebʼ» (Aaron).

KʼAʼUT WANK XWANKIL?

Wi nakaaxok saʼ laachʼool li nekeʼxye aawe naru tatyajerq ut naru taajukʼ laasumlajik.

«Saʼ jun kutan linbʼeelom kixpatzʼ xkuybʼal xmaak xbʼaan naq kixrahobʼtesi inchʼool. Usta kichʼaʼajkoʼk chiwu, xinkuy xmaak. Narahoʼk inchʼool xbʼaan naq elajik xinkuy xmaak wi xinbʼaanu raj saʼ junpaat inkʼaʼ raj xinkʼe saʼ chʼaʼajkilal linsumlajik» (Julia).

KʼARU TATRUUQ XBʼAANUNKIL?

KʼOXLA RIX AʼIN

Naq laasumʼaatin tixbʼaanu junaq li naʼlebʼ li tixrahobʼtesi laachʼool, kʼoxla:

• Ma tik maakʼaʼ ninkuy?

• Ma aajel naru naq teʼxpatzʼ xkuybʼal xmaak chiwu malaj naru twisi saʼ linchʼool?

AATINAN RIKʼIN LAASUMʼAATIN

• Ma nokoobʼayk chi xkuybʼal qamaak?

• Kʼaru tooruuq xbʼaanunkil re naq saʼ junpaat tqakuy qamaak?

LI TATRUUQ XBʼAANUNKIL

• Naq laasumʼaatin tixtochʼ laachʼool maakʼoxla naq yal kiraj xbʼaanunkil.

• Chaatawaq ru laasumʼaatin ut jultikoʼq aawe naq «chiqajunilo naabʼal sut nokootʼaneʼk» (Santiago 3:2).

«Moko chʼaʼaj ta kuyuk maak naq saʼ kabʼichal nokoopaltoʼk, qʼaxal chʼaʼaj bʼan naq jun ajwiʼ qe napaltoʼk. Re naq tookuyuq maak aajel ru naq tqakubʼsi qawankil» (Kimberly).

LI NAʼLEBʼ LI NAXKʼE LI SANTIL HU: «Chakʼam aawibʼ saʼ usilal chi junpaat» (Mateo 5:25).