Naq yook aakʼaʼuxl

Li xkʼaʼuxl laachʼool naxtenqʼa laatibʼel chi xnawbʼal naq xchalk saʼ xbʼeen jun li chʼaʼajkilal. Li qulul naxbʼaanu naq li qatibʼel tnujaq rikʼin naabʼal li hormona. Aʼin naxbʼaanu naq kaw chik t-oq chi ekʼank li qaanm, tbʼeeq saʼ junpaat li qakikʼel, tkubʼeeq malaj ttaqeʼq xmetzʼew li qamusiqʼ ut tkawuuq li xtibʼel li qabʼaqel. Toj maajiʼ ajwiʼ naqakʼe reetal li yooko xkʼulbʼal, aʼut li qatibʼel ak xkawresi ribʼ chi xkʼulbʼal li xchalk saʼ xbʼeen. Naq ak xnumeʼk li xkawil laakʼaʼuxl, laatibʼel naxkanabʼ rekʼankil naq «wank saʼ xiwxiw» ut natuqlaak ru.

LI XKʼAʼUXL LAACHʼOOL LI NATENQʼANK UT LI INKʼAʼ NATENQʼANK

Li xkʼaʼuxl laachʼool naxtenqʼa laatibʼel chi xnawbʼal naq xchalk saʼ xbʼeen jun li chʼaʼajkilal malaj li rahilal. Chixjunil natiklaak saʼ qulul. Li xkʼaʼuxl laachʼool li natenqʼank, naxbʼaanu naq tatkʼoxlaq ut tatnaʼlebʼaq saʼ junpaat. Joʼkan bʼiʼ, naq yook bʼayaq aakʼaʼuxl aʼin naru nakatxtenqʼa chi xtawbʼal li nakaawaj saʼ laayuʼam malaj xbʼaanunkil chiʼus junaq li kʼanjel, maare naq yooqat xbʼaanunkil laaʼeksaam, naq yooqat xsumenkil li patzʼom re xtawbʼal aakʼanjel malaj naq yooqat xtzolbʼal junaq li bʼatzʼunk.

Abʼanan, wi li xkʼaʼuxl laachʼool inkʼaʼ nakotz, qʼaxal kaw malaj xxeʼink saʼ laajunxaqalil naru nakatxrahobʼtesi. Ut wi laatibʼel inkʼaʼ naxkanabʼ rekʼankil naq «wank saʼ xiwxiw» naru naxrahobʼtesi laajunxaqalil, laachʼool ut laakʼaʼuxl. Ut, maare tixpoʼ laanaʼlebʼ ut xikʼ tat-oq rilbʼal ebʼ li junchʼol. Ut li qas qiitzʼin li ak xxeʼink li xkʼaʼuxl li xchʼool maare t-oq roksinkil li bʼan li nakanobʼresink u malaj tixbʼaanu junaq chik li naʼlebʼ li tkʼehoq re xyajel. Maare trahoʼq xchʼool, lubʼluuq junelik malaj tixkʼoxla xkamsinkil ribʼ.

Usta moko juntaqʼeet ta nokooxchʼaʼajki li qakʼaʼuxl, abʼan naru naxkʼam chaq naabʼal li yajel ut naru naxchap yalaq bʼar re li qajunxaqalil.