Chanru ttuqlaaq laakʼaʼuxl

Maakʼoxla rix li kutan wulaj

«Mixik bʼiʼ eechʼool chi kʼoxlak chirix li kutan wulaj, xbʼaan naq li kutan wulaj taawanq ajwiʼ xkʼoxlankil rix» (MATEO 6:34).

Kʼaru naraj xyeebʼal. Ak re, naq ebʼ li qas qiitzʼin nekeʼok xkʼaʼuxl. Abʼan inkʼaʼ us naq taajunaji laachʼaʼajkilal re anaqwan rikʼin li tchalq wulaj. Mixik aachʼool chi xkʼoxlankil li toj maajiʼ nakʼulmank.

• Wi yooq aakʼaʼuxl maare t-oq chi semsotq laachʼool. Abʼan, kʼaru tatruuq xbʼaanunkil? Xbʼeen, kʼulubʼa naq yalaq joqʼe naru naʼok aakʼaʼuxl. Abʼan, wi inkʼaʼ nakaakanabʼ xkʼoxlankil li moko wank ta saʼ aawuqʼ, qʼaxal tnimanq ru laakʼaʼuxl. Ut, xkabʼ, jultikoʼq aawe naq moko junelik ta yibʼaq ru laakʼanjel joʼ chanru xaakʼoxla chaq.

Kʼulubʼan ut matminok u

«Li choxahil naʼlebʼ li wank taqeʼq [...] nakʼulubʼank» (SANTIAGO 3:17, TNM).

Kʼaru naraj xyeebʼal. Maakʼoxla naq tatruuq xbʼaanunkil chixjunil chi tzʼaqal re ru. Maamin aawibʼ chi xbʼaanunkil naabʼal chi moko taaminebʼ ru li junchʼol.

• Kubʼsi aawibʼ, kʼulubʼan ut kʼe reetal li nakatruuk ut li inkʼaʼ nakatruuk xbʼaanunkil joʼ ajwiʼ ebʼ li junchʼol. Wi nakaabʼaanu, laaʼat ut ebʼ li junchʼol sahaq saʼ leechʼool ut us t-elq leekʼanjel. Maakanabʼ xyuʼaminkil li sahil chʼoolejil. Naq nokooseʼek, naqisi li naxnatʼ li qachʼool ut sa chik naqekʼa qibʼ, usta inkʼaʼ us xʼelk chiqu junaq li naʼlebʼ.

Kʼe reetal kʼaru nakʼehok re aakʼaʼuxl

«Li [...] naxnaw kʼoxlak inkʼaʼ najosqʼoʼk saʼ junpaat» (PROVERBIOS 17:27, LI SANTIL HU, WYCLIFFE BIBLE TRANSLATORS, [Wy]. AKʼ TZʼIIBʼ).

Kʼaru naraj xyeebʼal. Li josqʼil inkʼaʼ naxkanabʼ naq tatkʼoxlaq chiʼus, joʼkan naq yal xtuqubʼankil laachʼool.

• Kʼe reetal kʼaru nakʼehok re aakʼaʼuxl ut chanru nakatnaʼlebʼak naq nakaakʼul aʼin. Jun eetalil, naq yooq aakʼaʼuxl, kʼe reetal li nakaakʼoxla, li nakaawekʼa ut chanru laabʼaanuhom. Malaj taatzʼiibʼa. Wi chʼolchʼo chaawu chanru nakatnaʼlebʼak naq yook aakʼaʼuxl, taanaw xtuqubʼankil ru. Kʼoxla ajwiʼ li jalan jalanq chi naʼlebʼ li ttenqʼanq aawe chi risinkil li nakʼehok re aakʼaʼuxl. Wi inkʼaʼ nakatruuk risinkil, sikʼ xyaalal chanru xkotzbʼal. Jun eetalil, yal xtusbʼal chiʼus laakʼanjel ut laahoonal.

• Li nakʼehok re xkʼaʼuxl jun li qas qiitzʼin moko aʼan ta tixkʼe xkʼaʼuxl li jun chik xbʼaan naq jalan jalanq li junjunq. Joʼkan naq, yal rilbʼal rusilal ebʼ li naʼlebʼ. Naru nakaabʼaanu aʼin.

  1. Maaqʼabʼa saʼ junpaat junaq li qas qiitzʼin. Wi junaq li poyanam tixchʼik ribʼ chaawu naq yooqat chi oybʼenink ut wi nakaakʼoxla naq xbʼaanu xbʼaan naq maakʼaʼ xtzolbʼal, tchalq aajosqʼil. Us naq taakʼoxla naq moko yal kiraj ta xbʼaanunkil. Ut maare joʼkan.

  2. Sikʼ rusilal li naʼlebʼ. Wi toj taawoybʼeni naabʼal hoor re naq tnumeʼq li kamiʼoneet malaj re naq tatnumeʼq rikʼin laj bʼanonel, naru nakaawoksi li hoonal aʼin re rilbʼal junaq li hu malaj re xbʼaanunkil li aajel ru chaawu.

  3. Kʼoxla rix chixjunil li naʼlebʼ. Bʼaanu aawe li patzʼom aʼin: «Ma toj nimaq chiwu li chʼaʼajkilal wulaj malaj saʼ jun xamaan?». Tzol rilbʼal li kokʼ chʼaʼajkilal ut ebʼ li nimla chʼaʼajkilal.

Bʼeresi laayuʼam chi tustu ru

«Chiʼuxmanq chixjunil saʼ chaabʼilal ut chi tustu ru» (1 CORINTIOS 14:40).

Kʼaru naraj xyeebʼal. Kʼe aaqʼe re naq tustuuq bʼayaq laayuʼam.

• Chiqajunilo naqaj naq tustuuq ru bʼayaq li qayuʼam. Xkanabʼankil li kʼanjel choʼq re wulaj tixchaʼchaʼle li qayuʼam ut t-oq qakʼaʼuxl, ut tixbʼaanu naq yooq chi tubʼlaak qakʼanjel. Naru nakaabʼaanu aʼin.

  1. Tzʼiibʼa li junjunq chi kʼanjel ut bʼaanu joʼ chanru xaatus ru.

  2. Kʼe reetal bʼar wank ebʼ li naʼlebʼ li nekeʼlatzʼank aawe chi xkanabʼankil laakʼanjel choʼq re wulaj ut maabʼaanu chik.

Tzol xbʼeresinkil laayuʼam

«Qʼaxal us li hilank junpaataq chiru li kawil kʼanjelak, xbʼaan naq aʼin chanchan li chapok iqʼ» (ECLESIASTÉS 4:6).

Kʼaru naraj xyeebʼal. Li toj nakanaak chi kʼanjelak naq ak xraqeʼk li kʼanjelak maakʼaʼaq chik xmetzʼew ut xhoonal re rilbʼal li rusilal li xkawil kʼanjel.

• Tzol xkʼebʼal saʼ xnaʼaj li kʼanjel ut li tumin saʼ laayuʼam. Li xkʼihalil li tumin moko naxkʼe ta xtzʼaqobʼ li xsahil qachʼool chi moko naxkʼos ta li qakʼaʼuxl, naxnimtresi bʼan. Joʼ naxye Eclesiastés 5:12, «li bʼihom inkʼaʼ nawark chi xkʼoxlankil li kʼaru wank re». Joʼkan naq, sahaq laachʼool joʼ chanru wankat.

• Kʼe aahoonal re rajsinkil aawu. Wi nakaabʼaanu li nawulak chaawu, taawisi li xkʼaʼuxl laachʼool. Abʼan misach saʼ laachʼool naq li ajsibʼaal u li inkʼaʼ tatxkʼe chi ekʼank, joʼ rilbʼal li tele, maare inkʼaʼ tatxtenqʼa.

• Maanumsi laahoonal chi rilbʼal li selular malaj li tableta. Maawil chi kokʼaj xsaʼ ebʼ laamensaaj malaj li nekeʼxtzʼiibʼa saʼ internet. Wi ak xraqeʼk xhoonalil li kʼanjelak, maachʼolani chik laakʼanjel, wi moko aajel ta ru.

Chʼolani laakawilal

«Li tzolokbʼatzʼunk kachʼin ajwiʼ xkʼanjel» (1 TIMOTEO 4:8).

Kʼaru naraj xyeebʼal. Wi rajlal nakaakawresi laajunxaqalil, aʼin tixkʼe aakawilal.

• Yuʼami li naʼlebʼ li tixtenqʼa laajunxaqalil. Wi nakaakawresi laajunxaqalil, tixwaklesi laachʼool ut tixbʼaanu naq laatibʼel tixkol ribʼ naq yooq aakʼaʼuxl. Waʼ li tzakahemq li tixtenqʼa laajunxaqalil ut maanumsi junaq laawaʼinik. Kʼe aaqʼe re hilank chiʼus.

• «Maatuqubʼ» ru laakʼaʼuxl rikʼin li may, li bʼan li nakanobʼresink u malaj li haʼ li nakaltesink. Xbʼaan naq inkʼaʼ tixkotz aakʼaʼuxl, xkomon bʼan chik aayajel tixkʼe ut tatxkanabʼ chi maakʼaʼ aatumin.

• Numen rikʼin laj bʼanonel wi nakaawekʼa naq inkʼaʼ chik nakatruuk xnumsinkil laakʼaʼuxl. Xkʼebʼal aawibʼ chi ileʼk rikʼin laj bʼanonel moko naraj ta xyeebʼal naq maakʼaʼ nakaakuy.

Il kʼaru naʼajmank chi tzʼaqal

Kʼehomaq reetal «li qʼaxal chaabʼil [“li wank tzʼaqal xwankil”, TNM]» (FILIPENSES 1:10).

Kʼaru naraj xyeebʼal. Tzʼil rix chiʼus bʼar wank naʼajmank chi tzʼaqal.

• Tzʼiibʼa ebʼ laakʼanjel ut tus ru aʼ yaal li naʼajmank xbʼeenwa. Aʼin tatxtenqʼa chi rilbʼal li taabʼaanu xbʼeenwa, li taakanabʼ chiʼixbʼej, ut li taakʼe re jalan chik malaj li inkʼaʼ chik taabʼaanu.

• Chiru jun xamaan, taatzʼiibʼa li junjunq chi kʼanjel li taabʼaanu ut li hoonal li taawoksi chirix li junjunq. Chirix chik aʼan taakʼoxla chanru taawoksi chiʼus laahoonal. Wi chʼolchʼo chik chaawu chanru xbʼaanunkil, tkotzq laakʼaʼuxl.

• Kʼe xyanqil laakʼanjel. Wi nakaakanabʼ laakʼanjel, usta junpaat ajwiʼ, aʼin naru naxkʼe aametzʼew ut tixkotz laakʼaʼuxl.

Sikʼ aatenqʼankil

«Li rahil chʼoolej naxluktesi xchʼool li winq; aʼut li chaabʼil aatin naxsahobʼresi» (PROVERBIOS 12:25).

Kʼaru naraj xyeebʼal. Naru teʼxwaklesi aachʼool ebʼ li junchʼol naq tateʼraatina saʼ xyaalal ut saʼ tuulanil.

• Seeraqʼin rikʼin laawamiiw li naxtaw aawu ut ye re chanru nakaawekʼa aawibʼ. Aʼan truuq aatenqʼankil re rilbʼal chi tzʼaqal chanru wank li naʼlebʼ malaj re xtawbʼal li xtuqubʼankil li yookat xkʼulbʼal. Yal rikʼin xseeraqʼinkil re sa chik taawekʼa aawibʼ.

• Patzʼ aatenqʼankil. Ma naru nakaakʼe re jalan chik jun rehebʼ laakʼanjel malaj taasikʼ ani ttenqʼanq aawe?

• Wi laawechkʼanjel naxkʼe aajosqʼil, aatinan rikʼin re xtuqubʼankil ru. Jun eetalil, naru nakaaye re saʼ qʼunil aatin ut saʼ xyaalal kʼaʼut inkʼaʼ sa nakaawekʼa aawibʼ rikʼin (Proverbios 17:27). Wi inkʼaʼ natuqlaak ru, us raj naq inkʼaʼ chik taanumsi naabʼal hoonal rikʼin.

Maakanabʼ xkawresinkil laapaabʼal

«Moko kaʼaj ta wiʼ rikʼin wa yoʼyooq li winq, rikʼin aj bʼan wiʼ chixjunil li aatin naʼelk chi xtzʼuumal re li Yos» (MATEO 4:4).

Kʼaru naraj xyeebʼal. Laaʼo joʼ poyanam moko kaʼaj tawiʼ naqaj qatzakahemq, qatʼikr ut qochoch, naqaj ajwiʼ li Raatin li Yos. Re xtawbʼal li sahil chʼoolejil, chʼolchʼooq chiqu naq aajel ru li Raatin li Yos saʼ li qayuʼam ut tqakawresi qibʼ rikʼin.

• Li tijok naru nakatxtenqʼa. Li Yos naxye aawe naq taaye re laakʼaʼuxl xbʼaan naq Aʼan naxkʼe xchʼool chaawix (1 Pedro 5:7). Wi nakattijok ut wi nakaakʼe aachʼool chi xkʼoxlankil li chaabʼil naʼlebʼ, aʼin tixtuqubʼ aachʼool (Filipenses 4:6, 7).

• Il li naʼlebʼ li nakatxjilosi rikʼin li Yos. Ebʼ li naʼlebʼ li xqil saʼ li hu aʼin wank saʼ li Santil Hu, ut xtzʼiibʼamank re xkawresinkil li qapaabʼal chirix li Yos. Ebʼ li naʼlebʼ aʼin nokooxtenqʼa ajwiʼ chi xtawbʼal «li choxahil naʼlebʼ li nakʼanjelak ut li kʼoxlak chiʼus» (Proverbios 3:21, TNM). Us raj naq taakʼe aachʼool chi rilbʼal li Santil Hu. Ut naru nakaatikibʼ rikʼin li hu Proverbios.