Xnawbʼal ru li Yos nokooxnachʼobʼresi rikʼin
Laj Yobʼtesinel moko kaʼaj tawiʼ jun musiqʼej. Wank bʼan xchaqʼalil ru xnaʼlebʼ. Ut aʼan naraj naq tqanaw ru ut toojiloq chixkʼatq, joʼkan naq naxkʼut chiqu li xchaabʼilal xnaʼlebʼ (Juan 17:3; Santiago 4:8).
Wank xkʼabʼaʼ laj Yobʼtesinel
«Re naq teʼxnaw naq laakʼabʼaʼ aʼan Jehobʼa ut kaʼajwiʼ laaʼat Nim Laawankil saʼ xbʼeen chixjunil li Ruuchichʼochʼ» (SALMO 83:18, TNM).
Li Santil Hu naxkʼut naq li Jehobʼa aʼan li tzʼaqal Yos ut naq aʼan kiyobʼtesink re li choxachʼochʼ ut kixkʼe li yuʼam. Joʼkan naq, kaʼajwiʼ aʼan xkʼulubʼ naq tqaloqʼoni ru (Apocalipsis 4:11).
Li Jehobʼa aʼan jun Yos li narahok
«Li Yos aʼan rahok» (1 JUAN 4:8).
Li Jehobʼa naroksi li Santil Hu ut ebʼ li kʼaʼaq re ru li kixyobʼtesi re xkʼutbʼal chiqu chanru li xnaʼlebʼ. Li xnaʼlebʼ li qʼaxal wank xwankil aʼan li rahok, xbʼaan naq chixjunil li naxbʼaanu, naxbʼaanu saʼ xkʼabʼaʼ li rahok. Wi naqakʼe qachʼool chi xnawbʼal ru li Jehobʼa, qʼaxal wiʼ chik tqara.
Li Jehobʼa nakuyuk maak
«Laaʼat li Yos aj kuyul maak» (NEHEMÍAS 9:17).
Li Jehobʼa naxnaw naq laaʼo aj maak joʼkan naq chi anchal xchʼool naxkuy qamaak. Wi naqapatzʼ xkuybʼal qamaak ut naqabʼaanu chixjunil li wank saʼ quqʼ re xbʼaanunkil li kʼaru nawulak chiru, aʼan tixkuy qamaak ut moko tixbʼaanu ta naq tqatoj rix li qapaltil (Salmo 103:12, 13).
Li Jehobʼa naraj naq tootijoq chiru
«Nachʼ wank li Qaawaʼ rikʼinebʼ li nekeʼyaabʼank li xkʼabʼaʼ [...]; narabʼi li xyaabʼ xkuxebʼ ut naxkolebʼ» (SALMO 145:18, 19).
Moko naʼajmank ta naq tqabʼaanu ebʼ li ninqʼe, twoksi ebʼ li pechʼbʼil yos malaj jalan chik ebʼ li kʼaʼaq re ru re xloqʼoninkil ru li Jehobʼa. Aʼan narabʼi ebʼ li qatij joʼ chanru jun li yuwaʼbʼej naxkʼe xchʼool chi rabʼinkil ebʼ li ralal xkʼajol.