Laj Samuel kixbʼaanu li kiraj li Jehobʼa

Chalen naq toj kachʼin chaq, laj Samuel kiwank ut kikʼanjelak saʼ Rochoch li Yos. Saʼ li naʼaj aʼin nekeʼwulak chaq xloqʼoninkil li Jehobʼa. Ma taawaj raj xnawbʼal kʼaʼut laj Samuel wank saʼ li ochoch aʼin? Re xnawbʼal aʼin, aatinaqo xbʼeenwa chirix li xʼAna, li xnaʼ laj Samuel.

Li xʼAna naraj jun xkʼuulaʼal, abʼan moko naru ta nawank xkokʼal. Joʼkan naq kitijok chiru li Jehobʼa ut kixye re: «Bʼaanu usilal Jehobʼa chinaatenqʼa. Wi taakʼe junaq inyum, tintaqla saʼ laawochoch re naq tkʼanjelaq chaawu». Li Jehobʼa kirabʼi li xtij ut li xʼAna kiwank jun xchʼina yum. Aj Samuel kixkʼe choʼq xkʼabʼaʼ. Ut maare oxibʼ malaj kaahibʼ chihabʼ wank re laj Samuel naq kixkanabʼ chaq saʼ Rochoch li Yos re naq tkʼanjelaq aran.

Aj Eli xkʼabʼaʼ li xbʼeenil aj tij li wank chaq saʼ Rochoch li Yos. Li wiibʼ chi ralal laj Eli ak winqebʼ chik ut yookebʼ ajwiʼ chi kʼanjelak aran. Saʼ li ochoch aʼin kiloqʼoniik ru li Jehobʼa, joʼkan naq chaabʼilaqebʼ xnaʼlebʼ li wankebʼ raj arin. Abʼan laj Samuel kiril naq ebʼ li ralal laj Eli junelik nekeʼxbʼaanu li tzʼaj aj naʼlebʼ. Ma kixkʼam re laj Samuel rikʼinebʼ? Kʼaru nakaaye?... Inkʼaʼ. Laj Samuel junelik kixbʼaanu li kiraj li Jehobʼa joʼ kikʼuteʼk chiru xbʼaan xnaʼ xyuwaʼ.

Kʼaru raj kixbʼaanu laj Eli? Peʼyaal naq tento raj kixtijebʼ li ralal?... Heeheʼ. Laj Eli inkʼaʼ raj kixkanabʼebʼ chi kʼanjelak saʼ Rochoch li Yos. Maakʼaʼ kixye rehebʼ. Joʼkan naq li Jehobʼa kichalk xjosqʼil saʼ xbʼeen laj Eli ut ebʼ li ralal, ut kixkʼehebʼ chi xtojbʼal xmaak.

Saʼ jun qʼoqyink, laj Samuel yook chi wark naq kirabʼi naq kiyeheʼk re: «Samuel!». Xkoho saʼ aanil rikʼin laj Eli, abʼan laj Eli kixye: «Inkʼaʼ xat-inbʼoq». Joʼkan kixkʼul wiibʼ sut chik. Abʼan saʼ rox sut, laj Eli kixye re: «Wi tatbʼoqeʼq wiʼ chik, taaye: aatinan Jehobʼa. Yookin chaawabʼinkil». Naq kixye aʼin, li Jehobʼa kixye re: «Taaye re laj Eli naq tinkʼe chi xtojbʼal xmaak li xjunkabʼal xbʼaan naq yookebʼ xbʼaanunkil li tzʼaj aj naʼlebʼ». Ma kichʼaʼajkoʼk chiru laj Samuel xyeebʼal li esil re laj Eli? Kʼaru nakaaye?... Kichʼaʼajkoʼk chiru. Laj Samuel kixuwak chi xyeebʼal aʼin. Abʼan kiʼabʼink chiru li Jehobʼa ut kixkʼe li esil re laj Eli. Li kixye chaq li Jehobʼa kitzʼaqlok ru: moqon chik, laj Eli ut ebʼ li ralal keʼkamk.

Naabʼal li naʼlebʼ naqatzol chirix laj Samuel. Usta wankebʼ keʼxbʼaanu li inkʼaʼ us, laj Samuel junelik kixbʼaanu li kiraj li Jehobʼa. Ma taakʼam aawe rikʼin ut junelik tat-abʼinq chiru li Jehobʼa? Wi joʼkan taabʼaanu, sahaq saʼ xchʼool li Jehobʼa, laanaʼ ut laayuwaʼ.