Laj Josias kixsikʼebʼ ru li ramiiw

Ma chʼaʼaj xbʼaanunkil li naraj li Jehobʼa?... Naabʼalebʼ nekeʼxye naq chʼaʼaj. Abʼan li Santil Hu naxkʼut naq moko chʼaʼaj ta. Naxye kʼaru kixkʼul laj Josias jun li saaj al. Laj Josias kixkʼe xchʼool chi kʼanjelak chiru li Jehobʼa, xbʼaan naq kixsikʼebʼ ru li ramiiw. Qatzolaq chirix laj Josias ut ebʼ li ramiiw.

Amon xkʼabʼaʼ li xyuwaʼ laj Josias, ut awabʼej saʼ li tenamit Juda. Maaʼus xnaʼlebʼ ut naxloqʼoni li pechʼbʼil yos. Naq kikamk laj Amon, laj Josias kikanaak choʼq awabʼej. Jarubʼ chihabʼ wank chaq re laj Josias naq kiʼok choʼq awabʼej? Waqxaqibʼ chihabʼ! Ma yiibʼru xnaʼlebʼ joʼ li xyuwaʼ?... Inkʼaʼ, aʼan moko joʼkan ta.

Chalen saʼ xkachʼinal laj Josias kiraj kʼanjelak chiru li Jehobʼa. Joʼkan naq kixsikʼebʼ ru li ramiiw. Kixsikʼ li nekeʼxra li Yos ut aʼanebʼ keʼtenqʼank re chi xpaabʼankil li Jehobʼa. Anihebʼ chaq li ramiiw?

Jun rehebʼ aʼan laj Sofonias, li propeet. Laj Sofonias taqlanbʼil chi xyeebʼal rehebʼ laj Juda: «Ra teekʼul wi inkʼaʼ nekeekanabʼ xloqʼoninkil ebʼ li pechʼbʼil yos». Laj Josias kiʼabʼink chiru laj Sofonias, junelik kixloqʼoni li Jehobʼa ut inkʼaʼ ebʼ li pechʼbʼil yos.

Laj Jeremias jun chik rehebʼ li ramiiw ut kachʼin chik ma juntaqʼeet xchihabʼebʼ. Ut naq saajebʼ chaq, nachʼ xyanqebʼ li rochoch. Laj Jeremias ut laj Josias keʼxtenqʼa ribʼ re kʼanjelak chiru li Jehobʼa. Kʼajoʼ naq keʼxra ribʼ! Ut naq kikamk laj Josias, laj Jeremias kixkʼuubʼ jun li bʼich xbʼaan xrahil xchʼool.

Peʼyaal naq naabʼal tqatzol chirix laj Josias?... Chalen saʼ xkachʼinal kiraj xpaabʼankil li Yos. Joʼkan naq kixsikʼ choʼq ramiiw li nekeʼxra li Jehobʼa. Peʼyaal naq nakaawaj ajwiʼ xbʼaanunkil aʼin? Aajel ru naq taasikʼebʼ choʼq aawamiiw li nekeʼxra li Jehobʼa.