Li Jesus junelik kiʼabʼink

Ma chʼaʼaj xpaabʼankil laanaʼ laayuwaʼ?... Peʼyaal naq wank sut chʼaʼaj abʼink? Abʼan, ma nakaanaw kʼaru ttenqʼanq aawe? Wi nakaatzol kʼaru kixbʼaanu li Jesus. Ma nakaanaw naq junelik kiʼabʼink chiru li Jehobʼa ut chiru li xnaʼ xyuwaʼ?... Aatinaqo chirix li Jesus.

Naq toj maajiʼ nachalk saʼ Ruuchichʼochʼ, li Jesus wank chaq saʼ choxa rikʼin li Jehobʼa, li Xyuwaʼ. Ut naq kichalk saʼ Ruuchichʼochʼ, laj Jose ut xMaria keʼwank choʼq xnaʼ xyuwaʼ. Ma taawaj xnawbʼal chanru keʼok choʼq xnaʼ xyuwaʼ?...

Re naq twanq saʼ Ruuchichʼochʼ, li Jehobʼa kixbʼaanu jun li sachbʼachʼoolej. Kixkʼe li xyuʼam li Jesus saʼ xsaʼ li xMaria. Chiru bʼeleebʼ po, li Jesus kiwank saʼ xsaʼ li xnaʼ, joʼ nekeʼwank li kʼuulaʼal, ut chirix chik aʼan kiyoʼlaak. Chi joʼkan li xMaria kiwank li xkʼuulaʼal. Li xMaria ut laj Jose keʼxkʼirisi li Jesus.

Naq li Jesus wank 12 chihabʼ re, kixbʼaanu jun li naʼlebʼ li kixkʼutbʼesi naq naxra li Jehobʼa, li xyuwaʼ. Aʼin kikʼulmank naq li Jesus ut li xjunkabʼal kohebʼ Jerusalen saʼ jun li najtil tenamit. Xkohebʼ aran re xloqʼoninkil li Jehobʼa. Naq yookebʼ chaq chi sutqʼiik, laj Jose ut xMaria keʼxkʼe reetal naq li Jesus moko wank ta chirixebʼ. Keʼok xsikʼbʼal ut maabʼar keʼxtaw! Kʼaru keʼxbʼaanu?...

Saʼ junpaat keʼsutqʼiik Jerusalen ut keʼok xsikʼbʼal yalaq bʼar. Keʼxsikʼ chiru oxibʼ kutan. Keʼok xkʼaʼuxl! Moqon chik, keʼxtaw. Ma nakaanaw bʼar keʼxtaw?... Wank chaq saʼ rochoch li Yos. Kʼaʼut wank chaq aran? Xbʼaan naq aran tixtaw naabʼal li naʼlebʼ chirix li Jehobʼa. Li Jesus naxra chaq li Jehobʼa ut kiraj xsahobʼresinkil xchʼool. Naq kikʼiik ut kinimank, inkʼaʼ kixkanabʼ abʼink chiru li Jehobʼa. Li Jesus junelik kiʼabʼink, usta wank sut kichʼaʼajkoʼk chiru xbʼaan naq wankebʼ xikʼ keʼilok chaq re. Abʼan, ma kiʼabʼink ajwiʼ chiru laj Jose ut li xMaria?... Li Santil Hu naxye naq kiʼabʼink.

Ma xaakʼe reetal naq li Jesus junelik kiʼabʼink?... Aʼin naxkʼut chiqu naq junelik tooʼabʼinq chiru qanaʼ qayuwaʼ usta wank sut chʼaʼaj abʼink. Ma tat-abʼinq laaʼat?...