Kʼaru nekeʼxkʼoxla naabʼalebʼ li poyanam chirix li tijok?
«Naq nintijok, nawekʼa naq li Yos wank wikʼin, naxchap li wuqʼ ut nikinxbʼeres» (XMARÍA).
«Li wixaqil kiwank xkanser chiru 13 chihabʼ tojaʼ naq kikamk. Jultik we naq wulaj wulaj nintijok chiru li Yos, xwekʼa naq narabʼi li ninye chaq ut xtuqlaak inchʼool» (LAJ RAÚL).
«Li tijok aʼan jun chaabʼil maatan li naxkʼe qe li Yos» (LAJ ARNE).
Li tijok oxloqʼ chiru li xMaría, laj Raul, laj Arne ut jalan chik. Nekeʼrekʼa naq nekeʼruuk chi aatinak rikʼin li Yos, nekeʼbʼanyoxink chiru ut nekeʼxsikʼ xtenqʼ. Nekeʼxpaabʼ li naxye li Santil Hu chirix li tijok: «Aʼin wan wiʼ xkawubʼ qachʼool rikʼin li Yos: naq Aʼan nokoorabʼi wi wank kʼaru tqatzʼaama chiru joʼ chanru naraj Aʼan» (1 Juan 5:14).
Naabʼalebʼ nekeʼchʼaʼajkoʼk chiruhebʼ xpaabʼankil li naxye li Santil Hu chirix li tijok. Laj Steve naxye: «Naq wank 17 chihabʼ we, oxibʼ li wamiiw xeʼkamk: jun xbʼaan li bʼelebʼaal chʼiichʼ ut wiibʼ saʼ palaw». Kʼaru kixbʼaanu laj Steve? «Xintijok chiru li Yos re xnawbʼal kʼaʼut kikʼulmank aʼin, abʼan inkʼaʼ xinxsume. Joʼkan naq xinkʼoxla: “Kʼaru aj e naq tintijoq?”». Joʼkan ajwiʼ nekeʼxkʼoxla naabʼalebʼ li poyanam.
Abʼan wank jalan chik xyaalalil kʼaʼut nekeʼxye naq maakʼaʼ aj e li tijok. Wankebʼ nekeʼxye naq li Yos ak naxnaw chixjunil, naxnaw li qachʼaʼajkilal ut li naʼajmank chiqu. Joʼkan naq, kʼaʼut tqaye re li naqakʼul?
Wankebʼ chik nekeʼxkʼoxla naq li Yos inkʼaʼ naraj rabʼinkilebʼ xbʼaan li kʼaru xeʼxbʼaanu chaq. Li xJenny naxye: «Ninkʼoxla naq maakʼaʼ ninʼok wiʼ. Chʼolchʼo chiwu naq moko inkʼulubʼ ta naq li Yos tinrabʼi xbʼaan li xinbʼaanu chaq».
Ma joʼkan ajwiʼ nakaakʼoxla laaʼat chirix li tijok? Wi joʼkan, tsahoʼq saʼ aachʼool xnawbʼal li naxye li Santil Hu. Naru nakaapaabʼ li naxye li Santil Hu chirix li tijok.a Tatxtenqʼa chi xsumenkil ebʼ li patzʼom aʼin:
Ma narabʼi li qatij li Yos?
Kʼaʼut inkʼaʼ naxsume junjunq li tij?
Chanru tattijoq re naq tatrabʼi?
Chanru tatxtenqʼa li tijok?
a Saʼ li Santil Hu wank li tij li keʼxbʼaanu li keʼloqʼonink chaq re li Yos joʼ ajwiʼ li xtij li Jesús. Natawmank numenaq 150 li tij saʼ li Santil Hu saʼ Hebreo li nawbʼil ru joʼ li Najter Chaqʼrabʼ.