«Jilonqex chi xkʼatq li Yos, ut aʼan taajiloq chekʼatq» (Santiago 4:8).
Ma narabʼi li qatij li Yos?
Ma ak xaakʼoxla aʼin: «Ma narabʼi lintij li Yos?». Wi joʼkan, moko kaʼaj tawiʼ laaʼat. Naabʼalebʼ nekeʼtijok chiru li Yos naq wankebʼ saʼ chʼaʼajkilal. Abʼan inkʼaʼ naʼelk li xchʼaʼajkilalebʼ. Aʼin inkʼaʼ naraj xyeebʼal naq li Yos moko narabʼi ta li qatij. Li Santil Hu naxye naq li Yos nokoorabʼi naq nokootijok joʼ naraj aʼan. Qilaq kʼaru naxye li Santil Hu.
LI YOS NOKOORABʼI
«Laaʼat nakawabʼi li qatij. Chakʼatq laaʼat nekeʼjilok chixjunilebʼ» (Salmo 65:3).
Wankebʼ nekeʼtijok re naq sa teʼrekʼa ribʼ usta nekeʼxkʼoxla naq maaʼani naʼabʼink rehebʼ. Abʼan li tijok moko kaʼaj tawiʼ re naq sa tqekʼa qibʼ naq wanqo saʼ chʼaʼajkilal. Li Santil Hu naxye naq li Jehobʼaa «nachʼ wank [...] rikʼinebʼ li nekeʼyaabʼank li xkʼabʼaʼ, rikʼinebʼ li nekeʼxyaabʼa xkʼabʼaʼ chi anchalebʼ xchʼool; [...] narabʼi li xyaabʼ xkuxebʼ» (Salmo 145:18, 19).
Chʼolchʼo naq li Yos narabʼi ebʼ li xtij li nekeʼloqʼonink re. Naxye qe li chʼinaʼusil aatin aʼin: «Tojaʼ naq teepatzʼ linkʼabʼaʼ, tulextijoq chiwu, ut laaʼin texwabʼi» (Jeremías 29:12).
LI YOS NARAJ NAQ TATTIJOQ
«Junelikaqex chi tijok» (Romanos 12:12).
Li Santil Hu naxye naq inkʼaʼ tqakanabʼ tijok. Chʼolchʼo naq li Jehobʼa naraj naq tootijoq (Mateo 26:41; Efesios 6:18).
Kʼaʼut naraj li Yos naq tattijoq? Kʼoxla aʼin: peʼyaal naq li naʼbʼej yuwaʼbʼej nekeʼwulak chiru naq ebʼ li xkokʼal nekeʼxpatzʼ xtenqʼ? Maare li yuwaʼbʼej ak naxnaw li naraj ut li narekʼa li ralal abʼan, naq narabʼi li naxye, naril naq li ralal naxkʼojobʼ xchʼool rikʼin ut naraheʼk xbʼaan. Joʼkan ajwiʼ nakʼulmank naq nokootijok chiru li Jehobʼa, naqakʼutbʼesi naq naqakʼojobʼ qachʼool rikʼin ut naqaj wank chixkʼatq (Proverbios 15:8; Santiago 4:8).
LI YOS NAXKʼE XCHʼOOL CHAAWIX
«Qʼaxtesihomaq saʼ ruqʼ li Yos chixjunil li kʼaʼuxl wiʼ eechʼool, xbʼaan naq Aʼan naʼilok eere» (1 Pedro 5:7).
Li Yos naraj naq tootijoq chiru xbʼaan naq nokooxra ut naxkʼe xchʼool chiqix. Naxnaw li qachʼaʼajkilal ut naraj qatenqʼankil.
Li awabʼej David junelik kixpatzʼ xtenqʼ re li Jehobʼa ut kixseeraqʼi re li naxkʼoxla ut li narekʼa (Salmo 23:1-6). Kʼaru kirekʼa li Yos chirix laj David? Kixra ut kirabʼi li xtij (Hechos 13:22). Li Yos nokoorabʼi ajwiʼ ut naxkʼe xchʼool chiqix.
«NINRA LI QAAWAʼ XBʼAAN NAQ NARABʼI LINTIJ»
Naqataw li aatin aʼin saʼ li Santil Hu saʼ jun rehebʼ li salmo. Li kitzʼiibʼank re li hu aʼin naxnaw naq li Jehobʼa narabʼi li xtij, ut aʼin kitenqʼank re. Kijilok chixkʼatq li Yos ut kiruuk xkuybʼal li xchʼaʼajkilal (Salmo 116:1-9).
Wi chʼolchʼo chiqu naq li Yos nokoorabʼi, inkʼaʼ tqakanabʼ tijok. Qilaq li kixkʼul laj Pedro li wank saʼ li tenamit España. Kikamk li ralal saʼ li bʼelebʼaal chʼiichʼ naq wank 19 chihabʼ re. Saʼ li hoonal aʼan, laj Pedro kixye re li Yos li narekʼa ut kokʼaj xsaʼ kixtzʼaama naq ttenqʼaaq ut tkʼojobʼaaq xchʼool. Kʼaru kikʼulmank? Laj Pedro naxye: «Li Jehobʼa kiroksihebʼ li wechpaabʼanel re xsumenkil lintij, chi joʼkan keʼxkʼojobʼ xchʼool li wixaqil ut laaʼin».
Li Jehobʼa naroksihebʼ li qamiiw re xsumenkil li qatij.
Usta yaal naq li tijok moko kixkʼam ta chaq wiʼ chik li ralal, abʼan aʼin kitenqʼank re laj Pedro ut li xjunkabʼal. Li xMaría del Carmen, li rixaqil laj Pedro, naxjultika: «Li tijok xinxtenqʼa chi xnumsinkil li rahilal aʼin. Ninnaw naq li Jehobʼa naxtaw ru li nawekʼa xbʼaan naq natuqlaak inchʼool naq ninʼaatinak chaq rikʼin».
Naqanaw naq li Yos narabʼi li qatij xbʼaan li naxye li Santil Hu ut li xeʼxkʼul naabʼalebʼ li poyanam. Abʼanan, li Yos inkʼaʼ naxsume chixjunil li tij. Kʼaʼut?
a Li xkʼabʼaʼ li Yos aʼan Jehobʼa (Salmo 83:18, TNM).