Xpatzʼom ebʼ laj ilol hu

Kʼaru kiraj xyeebʼal li apóstol Pablo naq kixye «joʼkin jun kʼuulaʼal majiʼ xqʼehil chi yoʼlaak»? (1 Corintios 15:8).

Saʼ 1 Corintios 15:8 li apóstol Pablo kixye: «Saʼ rosoʼjik kixkʼut ajwiʼ ribʼ chiwu, li joʼkin jun kʼuulaʼal majiʼ xqʼehil chi yoʼlaak». Laj Pablo yook chi aatinak chirix naq li Jesús kixkʼut ribʼ chiru saʼ jun li moy u. Junxil nayeemank naq chanchan tawiʼ kikʼeheʼk re li maatan re yoʼlaak malaj wakliik wiʼ chik re xik saʼ choxa naq toj maajiʼ li xhoonalil. Naq ak xqatzʼil rix chiʼus li raqal aʼin, aajel ru naq tjalmanq li xchʼolobʼankil.

Yaal naq li raqal aʼin yook chi aatinak chirix li apóstol Pablo naq tixjal li xnaʼlebʼ. Abʼanan, kʼaru kiraj xyeebʼal naq aʼan «jun kʼuulaʼal majiʼ xqʼehil chi yoʼlaak»? Wank naabʼal li naʼlebʼ li nekeʼxye chirix aʼin.

Sachbʼachʼoolej rilbʼal naq kixjal li xnaʼlebʼ saʼ junpaat. Inkʼaʼ naʼoybʼenimank naq nayoʼlaak junaq li kʼuulaʼal li toj maajiʼ xqʼehil. Aʼin li kixkʼul laj Saulo, li kikanaak moqon choʼq apóstol Pablo, yook chi xik Damasco re xrahobʼtesinkilebʼ laj paabʼanel li wankebʼ saʼ li tenamit aʼan, ut inkʼaʼ naroybʼeni naq tixkʼut ribʼ li Jesús chiru saʼ jun li moy u. Laj Pablo inkʼaʼ raj naroybʼeni naq tixjal xnaʼlebʼ, chi moko ebʼ laj paabʼanel li wankebʼ aran. Sachbʼachʼoolej rilbʼal aʼin joʼkan naq kimutzʼoʼk chiru wiibʼ oxibʼ kutan (Hech. 9:1-9, 17-19).

Inkʼaʼ raj naʼoybʼenimank naq tixjal li xnaʼlebʼ. Li hu Traducción Kadosh Israelita Mesiánica de estudio naxye: «Xinyoʼlaak naq inkʼaʼ raj naʼoybʼenimank». Naq kixjal li xnaʼlebʼ laj Pablo, li Jesús ak wank saʼ choxa. Naq laj Pablo kiʼaatinak chirixebʼ li raqal rubʼelaj, toj maajiʼ naxik li Jesús saʼ choxa ut maajiʼ naril ru (1 Cor. 15:4-8). Naq li Jesús kixkʼut ribʼ chiru laj Pablo kixkʼe li xhoonal re naq tril ru, usta toj «majiʼ xqʼehil chi yoʼlaak».

Inkʼaʼ kixtaqsi xwankil naq kiʼaatinak chirix li xyuʼam. Wiibʼ oxibʼ li nekeʼxtzʼil rix li Santil Hu, keʼxye naq li aatin li kiroksi laj Pablo saʼebʼ li raqal aʼin, naxkʼutbʼesi naq kixkubʼsi xwankil. Wi laj Pablo kiroksi aʼin yook xyeebʼal naq moko xkʼulubʼ ta wank joʼ apóstol. Xbʼaan naq, kixye: «Laaʼin iitzʼinbʼejin chiruhebʼ chixjunil li apóstol; moko inkʼulubʼ ta naq tinkʼabʼaʼin apóstol xbʼaan naq xikʼ kiwil li xʼIklees li Yos. Abʼanan saʼ xkʼabʼaʼ li rusilal li Yos xinkanaak chi joʼkaʼin» (1 Cor. 15:9, 10).

Joʼkan bʼiʼ, laj Pablo kiʼaatinak chirix naq inkʼaʼ raj naroybʼeni naq li Jesús tixkʼut ribʼ chiru, naq tixjal xnaʼlebʼ, chi moko xkʼulubʼ naq tril li moy u aʼin. Maakʼaʼ naxye li kixkʼul, li qʼaxal wank xwankil, aʼan naq kichʼolaak chiru naq li Jesús kiwakliik wiʼ chik chi yoʼyo. Joʼkan peʼ naq rajlal naʼaatinak chirix li kixkʼul naq kipuktesink chirix li xwaklijik wiʼ chik chi yoʼyo li Jesús (Hech. 22:6-11; 26:13-18).