8 Yehowa tubilaka diaka Aroni nde: “Mono me pesa nge kiyeka ya kutala makabu yina bo ke pesaka mono.+ Mono me pesa nge ti bana na nge dikabu ya bima yonso ya santu yina bantu ya Izraele ke pesaka, sambu yo vanda dikabu na beno ya kimakulu.+

19 Makabu yonso ya santu yina bantu ya Izraele ta pesa Yehowa,+ mono me pesa yo na nge mpi na bana na nge ya babakala ti ya bankento bonso dikabu ya kimakulu.+ Yo kele kuwakana ya mungwa* ya mvula na mvula na ntwala ya Yehowa sambu na nge mpi bana na nge.”